காதல் காட்சி

பூனைநடை நடக்கிறது புறா
சீனப்பெண்ணின் கைவிசிறி போன்ற
சிறகு விரித்துப் பறக்கிறது
இரைக்கென அரிசியைக் கொத்தித் தின்கிறது
மாட இடுக்குகளில்
அக்கும்பக்குமென காதலோடு
ஜோடியின் அலகுகளைக் கோர்க்கிறது

வறண்ட நாவைத் தணிக்க
விரைந்து இறுகப் பற்றிய பிடியால்
தளும்பிய குவளைநீர் சிதறி
அதீத காதல் காட்சியொன்றை
வரைந்திருக்கிறது

புறாக் கொஞ்சலில்
நீர்ச்சித்திரத்தில் கரைந்த நான்
தவறி விழுந்த பூத்தொட்டியென
தரையில் உடைந்து கிடக்கிறேன்