உயிரோடை

நீல இசை

2012-01-22T08:08:00.001-08:00

நீல இசை
கழன்று எரிகிறது
இசையின் வெம்மை
இதமாய் பரவுகிறது

மேடு பள்ளமெங்கும்
நிறைகிறது
எல்லா மரமும்
வெளியேற்றிய
இசையின் நீலம்

ஆசைக் கடல்
வெண்மையாய் பொங்க
அதில் இசையின் ஊதா
அலை அலையாய்
கால் நனைக்கிறது

போகும் வழிப்பாதையெங்கும்
கம்பள உதாவை
விரித்து இசை
பரவிக் கிடந்தது

நீலக்குயில் பறக்கும்
வானமெங்கும் நீக்கமற
மிதக்கிறது இசை நீலமாய்

இசையின் நிறமா
இசைந்த மனமா
நீல வண்ணத்தோடு
மோனவெளியில் நீந்தி கொண்டிருக்கிறது

இசையும் நீலமும்
சில சமயம்
மனச்சிதைவை மீட்டெடுக்க வல்லது

பெருங்கடலாடிடும் துளி மழை

2011-12-14T09:26:00.000-08:00

எமது இரண்டாம் கவிதை நூல் காலச்சுவடு வெளியீடாக

அனைவரின் ஆதரவையும் எதிர்நோக்கி
நட்புடன்,
லாவண்யா

உலகின் பெரிய மதுக்குவளை

2011-12-03T03:51:00.000-08:00

பூங்காவின் மத்தியில் நிற்கும் இதுவே
உலகின் மிகப் பெரிய மதுக்குவளையாக இருக்கலாம்
மதுவைச் சுகிக்கும் கண்களுக்கும்
பிற பார்வைகளுக்கும்
வெற்வேறொன்றாக இக்கோப்பை தோன்றலாம்

காய்ந்த நுரையாக
பறவைகளின் எச்சம்
கிண்ணத்தின் விளிம்பிலிருந்து
எப்போதும் வழிந்து கொண்டிருக்கிறது

எந்த போதையையும்
நிரப்பித் தரவியலாத இக்கிண்ணம்
சிலபோது
பெய்யும் மழையேந்தி
தனக்குத்தானே நுரைத்துப் பொங்கி
நிரம்பி வழிகிறது

கனவின் சிறை

2011-10-29T09:27:00.000-07:00

குளியல் அறையில்
கவலையின் பெருஞ்சுவர் சூழ்ந்திருக்க
நிறமற்ற நீரை
எத்தனை நேரம் நோக்கியபடி
கனவுச் சிறையிலிருந்தேனோ

மூடிய கதவின் பின்
பழகிய காலடி ஓசையின் பட்டாம்பூச்சி
முதுகில் ஊர்ந்திட
மின்னல் வீசியதாய்
அதிர்ந்து அடங்கியது
உடலோடு உணர்வும்

மூடிய கதவிடம் பதற்றத்தை கொடுத்துவிட்டு
கனவுச் சிறையிலிருந்து வெளியே
தளிர் நீரை முகம் நிறைத்து
குளிரத் தொடங்கினேன்

அழகர்சாமியின் குதிரை

2011-05-30T07:46:00.000-07:00

பாஸ்கர் சக்தியின் அழகர்சாமியின் குதிரை எஸ்.ராமகிருஷ்ணன் சிறந்த கதைகள் என்று பட்டியலிட்ட இலக்கிய தரம் வாய்ந்த கதைகளில் ஒன்று. தன்னுடைய கரையெல்லாம் செண்பகப்பூ திரைப்படமாக எப்படி எல்லாம் சீரழிந்தது என்று சுஜாதா தன்னுடைய கட்டுரை ஒன்றில் புலம்பி இருப்பார். அப்படியில்லாமல் அழகர்சாமியின் குதிரை சிறுகதையை சிறு சிறு செழுமையூட்டல்கள் மட்டும் செய்து அதே தரத்தோடான திரைக்கதை அமைத்திருப்பதற்காக சுசீந்திரனுக்கு மிகப் பெரிய சபாஷ். பாஸ்கர் சக்தியின் சிறுகதையை ஏற்கனவே படித்திருந்ததால், அதை எப்படி திரையாக்கம் செய்திருப்பார்கள் கற்பனை செய்து வைத்திருந்தேன். அதை விட மிகச்சிறப்பாகவே செய்திருந்தார்கள்.

தேனி மாவட்டத்தை ஒட்டிய மலை கிராமங்களை மிக அழகாக கண்ணுக்கு குளுமையாக காட்டி இருக்கிறது தேனீ ஈஸ்வரின் கேமிரா. பிண்ணனி இசை மிக நேர்த்தியாக இருக்கின்றது. ராஜா ராஜா தான் எப்போதும். அதுவும் "குதிக்குது குதிக்குது" பாட்டில் என்னம்மா பாடி இருக்கிறார். இளையராஜா தமிழ்நாட்டிக்கு ஒரு பெரியவரம். மூன்று பாடல்களும் மூன்று முத்துகள். ஒவ்வொன்றும் ஒவ்வொரு விதத்தில் வித்தியாசம். பாஸ்கர் சக்தியின் வசனம் பல இடங்களில் நச்சென்று இருக்கிறது. இயல்பான வசனத்திலேயே நகைச்சுவையை ஆங்காங்கே தெளித்திருக்கிறார் பாஸ்கர் சக்தி. திரைக்கதையில் சுசீந்திரன் இன்னும் கொஞ்சம் கவனம் செலுத்தி இருந்தால் படம் இன்னும் சிறப்பாக இருந்திருக்குமென்பது என் கருத்து. ப்ளாஷ்பேக் காட்சிகள் கதையோட்டத்தோடு இல்லாமல் கொஞ்சம் தொக்கி நிற்பது போல தோன்றியது.

கிராமத்தில் மக்களுக்கு வாழ்வு எவ்வளவு எளிமையாக இருக்கிறது. அவர்களின் வெள்ளந்தி மனம், சிக்கு பிடிக்காமல் எவ்வளவு எளிதாக கையாலும் விதமிருக்கிறது. அதிகம் படித்து அதிகம் யோசித்து அதிக பைத்தியம் பிடித்து மனநோயால் வாட்டும் நகர மக்களின் வாழ்வினும், மழை பெய்ய அழகர்சாமிக்கு திருவிழா நடத்தினால் போதும் என்ற நம்பிக்கையும், அழகர் வந்து குறி சொன்னா எதுவும் நடக்கும் குருட்டு நம்பிக்கையும், அழகர்குதிரையின் விட்டை கலந்த தண்ணீரை குடித்தால் நோய் எல்லாம் போய்விடும் என்ற அசட்டு நம்பிக்கையும் கொண்டிருக்கும் கிராம வாழ்வு எவ்வளவோ மேல். அந்த கிராமிய வாழ்வு நீர்மையுடன் இருப்பதுக்கு இந்த ஏதோ ஒன்றின் மீதான நம்பிக்கை தான். நம்பிக்கை தானே எல்லாமே. ஆனால் இப்படிப்பட்ட லாகிக்லெஸ் நம்பிக்கையால் கோடாங்கிகளும், தீடிர் சாமிகளும் ஏமாற்றும் அப்பாவி மக்கள், எதாவது தில்லுமுல்லு செய்து திருவிழாவை எப்படியாவது தவிர்த்து மழை பெய்ய விடாமல் செய்யலாம் என்று எண்ணும் முன்னால் பஞ்சாயத்து தலைவர் மகன் இவர்களின் அறியாமையை நினைத்து ஆதங்கபடுவதை தவிர வேறு எதுவும் தெரியவில்லை.

என்ன தான் மூட நம்பிக்கை என்றாலும் கோடை திருவிழாவின் போது ஒவ்வொரு வருடமும் தவறாமல் மழை பொழிவதை எங்கள் கிராமத்தில் நானே கண்கூடாக பார்த்திருக்கிறேன். மழை பெய்ய திருவிழா, திருவிழா சமயத்தில் குதிரை காணாமல் போனால் தனக்கு வேலை கிடைக்கும் என்று தச்சனும், குதிரையை கண்டு பிடிக்க உள்ளூர் மற்றும் வெளியூர் கோடாங்கிகளும், கோடாங்கி "காக்கை அமர பழம் விழுமென்ற கதை" போல பிடித்து தந்த நிஜக்குதிரையும், அந்த நிஜக் குதிரையின் சொந்தக்காரனும், அவனுக்காக காத்திருக்கும் ஒரு பௌர்ணமி தேவதையும் என்று அழகாக வலைப்பின்னலாக நகர்ந்திருக்கிறது அழகர்சாமியின் குதிரை. எல்லாவற்றிற்கும் ஆதாரம் மழை. அதற்கென நடக்கும் திருவிழாவை நம்பி தான் எத்தனை ஜீவனம்.

தன் குதிரையை மீட்க வேறு ஒரு கிராமத்தில் வேறு வழியின்றி தங்கி இருக்கும் நிஜக்குதிரையின் சொந்தக்காரன், அவனுக்கும் இருக்கும் மனிதநேயம், தன்னுடைய குதிரை ஒருவேளை திருவிழாவிற்கு அப்புறம் கிடைக்காமல் கூட போகலாம் என்று தெரிந்தும் கூட, தன் குதிரையோடு இரவு தப்பிக்க வழி சொல்லு ஊர் இளைஞர்களிடம் மறுப்பது நெஞ்சை நெகிழச் செய்யும் காட்சி. கோடி கோடியாக கொள்ளையடிக்கும் இந்த நாட்டில் தம் மக்கள் பசி போக்க கிணற்று மோட்டரை திருடும் வயிரொட்டிய பஞ்ச திருடன். அவனை பிடித்து அடித்து நொறுக்கும் வீர போலீஸ். என்ன செய்து தான் எம் தாய் திருநாட்டை காப்பாற்ற?

ஹாலிவுட் படங்களை போல இரண்டே மணி நேரத்தில், தமிழ் சினிமாவின் பார்முலாவிலிருந்து மாறுபட்ட தரமான ஒரு திரைப்படத்தை வெகு நாட்களுக்கு பின் கண்டு வந்த திருப்தி நீங்கவில்லை என் மனதிலிருந்து. அழகர்சாமியின் குதிரை நீண்ட நாள் வாழவிருக்கும் காவியம்.

வானம் - சில மின்னும் நட்சத்திரங்களும் பின் விளைவாக சில சிந்தனைகளும்

2011-05-22T09:50:00.000-07:00

வானம் கிரிஷ் இயக்கத்தில் சமீபத்தில் வெளியாகி இருக்கும் திரைப்படம். கடந்த வருடம் தெலுங்கில் வெற்றிப்படமாக ஓடிய வேதம் என்ற படத்தின் மறுபதிவே இந்த வானம். ஐந்து குறுங்கதைகளை குழப்பமும் தொய்வும் இல்லாத கலவையாக தந்திருக்கும் வித்தியாசமான முயற்சிக்காகவே இந்த திரைப்படத்தினை பாராட்டியாக வேண்டும்.

அறிமுக காட்சிகளில் சிம்பு நகைச்சுவை ததும்ப நடித்திருக்கிறார். சந்தானமும் இரட்டை அர்த்தம் தராத நல்ல நகைச்சுவையை தந்திருக்கிறார். பரத் நடிப்பும் கொஞ்சம் தேவலை ரகம் தான். ஆனால் பரத்தின் தோழியாக நடித்திருப்பவர் தமிழை ஏன் விஸ்கி அடித்து விட்டு பேசுவது போல பேசி இருக்கிறார் என்று தெரியவில்லை. சிம்புவும் தன் தோழியிடம் ஆங்கிலம் அதிகம் கலந்த தமிழிலேயே பேசுகிறார். அப்படி தமிழை கொலை செய்து பேசினால் தான் உயர் தட்டு மக்கள் என்ற காட்டுவதிலிருந்து இந்த தமிழ் திரைப்படங்கள் எப்போது தப்பிக்குமென்றே தெரியவில்லை.

சரண்யாவும் வழக்கம் போல அருமையான நடிப்பினை மிக நேர்த்தியாக செய்திருக்கிறார். அனுஷ்காவின் கதாபத்திரம் நீக்கி இருந்தாலும் இந்த படத்தில் அதிக வித்தியாசமும் இருந்திருக்காது. ஆனால் அனுஷ்கா பொதுப்படையாக தெய்வ பெண்ணாக வந்தாலும் பாலியல் தொழில் செய்பவராக வந்தாலும் கச்சிதமாக பொருந்தும் முகவட்டோடு இருக்கிறார். பிரகாஷ்ராஜ்க்கு மிக முக்கிய கதாபாத்திரம் இந்த படத்தினில்.

யுவன் சங்கரின் இசை ரசிக்கும் படி இருக்கிறது. சிம்புவின் குரலில் எவண்டி உன்னை பெத்தான் பெத்தான் பாடல் கூடவே நம்மை பாட வைக்கிறது. சிறு சிறு தொடல்களாக நாட்டின் பல முக்கிய பிரச்சனைகளை அசால்ட்டாக கையாண்டு இருக்கின்றார்கள். மக்களுக்கிடையிலிலான உட்பூசல்கள் எல்லாவற்றிக்கும் மொழி, மதம், பணம் பேதம் போன்றவையே காரணம் என்று பல முக்கிய கனமான கதைகளைக்குக்கான கருவினை போகிற போக்கில் சொல்லி போயிருக்கிறார்கள். தனித்தனியாக சொல்லி இருக்கும் ஐந்து கதைகளையும் இறுதியாக இணைப்பது மனிதநேயம். இந்தப் படத்தின் மிக பெரிய பலமாகும்.

முகமதியர் நடத்தும் புனிதபோருக்கு தீவிரவாதம் என்ற பெயரை தந்து எந்த மூஸ்லீமை பார்த்தாலும் ஏதோ அவர்கள் தீவிரவாதம் செய்யவே பிறவி எடுத்தனர் என்ற பொதுப்படையான எண்ணத்தை வளர்த்து கொள்வது தவறென்று சொல்லும் முயற்சியையும், அவர்களிலும் அப்பாவிகள் உண்டென்பதையும் அவர்கள் பிற மதத்தினரால் முக்கியமாக இந்துவாவின் மேல் தீவிரம் காட்டுவோரால் பாதிக்கப்படுகின்றனர், அவர்களுக்கான நியாயம் எளிதாக மறுக்கப்படுகிறது என்று உணர்ந்த்தும் முயற்சியையும் இந்த படத்தின் மூலம் முன் வைத்திருக்கினர்கள். அதில் கொஞ்சம் வெற்றியும் பெற்றிருக்கினர். பல மதத்தினை சார்ந்தவர்களை காப்பாற்ற சில முஸ்லீம்கள் கூடி குரான் ஓதும் காட்சி உச்சக்கட்ட மனிதநேய காட்சியாகும். அப்பாவிகளை கொடுமை செய்யும் எந்த விசயமும் தீவிரவாதம் என்று புது கருத்தினை முன் வைத்திருக்கின்றார்கள். இது தான் மிக முக்கியமாக உணரப்பட வேண்டிய விசயம்.

பணம் இது என்னவெல்லாம் செய்கிறது?

எப்படியாவது பணக்காரப் பெண்ணை காதல் திருமணம் செய்ய வேண்டுமென்று என்னவோ தில்லுமுல்லு வேலைகளை ஏன் திருட கூட தூண்டும் எண்ணமும் தருவது மேட்டுகுடிக்கும் குப்பத்திற்கும் இருக்கும் பணத்தால் ஆன வேறுபாடு தவிர வேறென்ன இருக்க முடியும். திருடனிடமும் பாலியல் தொழிலாளியிடமுமிருந்து கூட ஒரு காவல்துறை அதிகாரி பணத்தையையும் நகையையும் கொள்ளையடிக்க பணத்தின் மேலிருக்கும் ஆவலன்றி வேறென்னவாக இருக்க முடியும்.

வாங்கின கடனையும் கடனுக்கு இணையான வட்டியையும் திருப்பி தர மாமனார் ஒருமுறையும் மருமகள் ஒருமுறையும் தன்னுடைய கிட்னியை விற்கும் அவலத்தினும், கிட்னியை பரிவத்தனத்தில் கிடைக்கும் பணத்தில் பாதிக்கு மேல் அமுக்கிக் கொள்ள முன்பே ரூட் போடும் இடைத்தரகர், பணம் பட்டுவாடா செய்யும் போது மேலுமொரு தொகையை மேல் செலவென்று எடுத்து கொண்டு மீதியை தரும் போது பணத்தை முழுசா குடுத்துடுங்க அய்யா என்று கெஞ்சி கண்ணீர் விடும் அப்பாவி இந்திய ஏழைகளை நினைத்து கொஞ்சம் கண்ணீர் மட்டுமே சிந்த முடிகிறது. வேறென்ன செய்ய முடியும் இந்த கையாலாகாத எழுத்தினை வைத்துக் கொண்டு?

கிணற்றடி நிறைத்த மௌனம்

2011-05-17T09:38:00.000-07:00

மௌனத்தை ஊற்று நீராக்கி
நிறைந்திருந்தது கிணற்றடி
விடாது பொலியும் நிலவை
சலசலத்து பிரதிபலித்திருந்தது

கழுத்திருக பிணைக்கப்பட்டிருந்த
காயம் பட்ட குடம்
தன் விருப்பதோடோ இல்லாமலோ
முகர்ந்தெடுத்த நீரில்
கூட வந்த துளி நிலவை
சலனமின்றி எடுத்துச் செல்லும்
கயிறோடு இருக்கும் வரை

ஒருவேளை
கயிறறுந்து விழும் குடத்தின்
மிதத்தலையோ மூழ்குதலையோ
ஏற்றுக் கொள்ளும் முனையிலிருக்கும்
கிணற்றடி
வழக்கம் போல்
மௌனமாக ஊறிக் கொண்டிருந்தது

போதை

2011-04-29T20:34:00.000-07:00

பாதியில் படித்து நிறுத்திய
கதையை தொடர்வது
அதிகாலை கனவை
தொடர்வது போல எளிதல்ல

ஊன் உறக்கம் மறந்த
வாசிப்பின் எழுத்துகள்
உதிரத்தில் மிதக்கக் கூடும்

பேய் விரட்டுவதினும்
கடினமானதே
படிப்பின் போதையை
விட்டொழிப்பது

வாசிப்பை நிறுத்தி வைத்து
சற்றே இடைவெளி விட்டு
ஒருநாள்
படிக்கும் போதுணர்ந்தேன்
போதையொன்றும்
பெரும் பரவசத்தை தருவதில்லை

வார இறுதி

2011-04-28T08:43:00.000-07:00

புலர்காலை புதுக்காற்றோடு பண்பலையில்
ஸ்ரேயா கோசலின் இன்குரல்
மாங்கனி சாராக காதில்
இறங்கிக் கொண்டிருந்தது

வசந்தத்தை தானே உண‌ர்ந்து மலரும்
கைவிரல்களென கொத்தாக பூத்திருந்த
மனமயக்கும் குளிர்சிவப்புப் பூக்கள்
விழித்திரையில் அசைந்தாடி நடனமிட்டன

மின்சார கம்பிகளின்
இசைக்குறியீடுகளென அமர்ந்திருக்கும்
காக்கைகள்
எங்கோ இசைக்கப்படும்
பியானோவுக்கு பொத்தானாகி இசைப்பரப்பின

நெடுஞ்சாலையில் வட்டச்சுற்றில்
நிறைமாத கர்பிணியின் வயிறென‌
சரிந்து அமர்ந்திருந்த
நடுக்கல்லை நனைத்துக் கொண்டிருந்தது
சுழன்றாடும் சுகந்த நீரூற்று

வார இறுதி இனிதே தொடங்கியது
கூடவே
நேற்றடித்த புயலால்
முறிந்து போன மரக்கிளை
எப்போது எடுத்து ஏறிப்படுவோமோ
என்ற பயத்துடன்
அடுத்த கிளை மேல் சாய்ந்து
ஊசலாடிக் கொண்டிருந்தது

வாழ்க்கைச் சக்கரம்

2011-04-17T01:09:00.000-07:00

சிறு பஞ்சின்
எளிமையை ஊதி ஊதி
மலைபாரமென
வனைந்து வைக்க
வலியுறுத்தபடுகிறேன்

கீழ்படிந்தோர் தலைநிமிர விடாதிருக்க
தினத்தின் பெரும்பகுதியை
செலவளிக்க நிர்பந்திக்கபடுகிறேன்

மேல்படிக்கட்டின் மேலேயே
இருக்கிறது கவனம்
முன்னேறி செல்ல
பிறர் தடை கொஞ்சமும்
இருக்கவே செய்கிறது

மனச்சக்கரத்தை
சாந்தி செய்ய
எல்லா சித்து வேலையும்
செய்யத் தானே வேண்டிருயிருக்கிறது

காதல் காட்சி

2011-04-08T23:39:00.000-07:00

பூனைநடை நடக்கிறது புறா
சீனப்பெண்ணின் கைவிசிறி போன்ற
சிறகு விரித்துப் பறக்கிறது
இரைக்கென அரிசியைக் கொத்தித் தின்கிறது
மாட இடுக்குகளில்
அக்கும்பக்குமென காதலோடு
ஜோடியின் அலகுகளைக் கோர்க்கிறது

வறண்ட நாவைத் தணிக்க
விரைந்து இறுகப் பற்றிய பிடியால்
தளும்பிய குவளைநீர் சிதறி
அதீத காதல் காட்சியொன்றை
வரைந்திருக்கிறது

புறாக் கொஞ்சலில்
நீர்ச்சித்திரத்தில் கரைந்த நான்
தவறி விழுந்த பூத்தொட்டியென
தரையில் உடைந்து கிடக்கிறேன்

இலையோடு ஓடும் ஓடை

2011-03-28T08:49:00.001-07:00

மரம் புறக்கணித்த இலை
திக்குத் தெரியாமல் மிதந்து
சிற்றோடையில் விழுந்தது

பற்றுதல் எதுவுமற்ற இலை
ஓடையின் இழுப்பில்
தன்னிச்சையின்றி நகர்கிறது

மிதக்கும் இலையை
சுமையழுந்த தெறித்து
விழுந்த துளிநீரை
தாலாட்டி பயணக்கிறது இலை

களித்தோடும் நீரோடையில்
இழை இழையாய்க் கிழிந்தும் இலை
நகர்ந்திருந்தது ஓடும் நீரோடு

சந்தேகம்

2011-03-20T03:57:00.000-07:00

சிற்றெறும்புக் கூட்டத்தின்
இரைக்கான அலைச்சலில்
எப்போதும் எறும்பாக
இருந்தில்லையிவள்

உண்மை விளம்புதலை தவிர
சாயம் பூசிய நாடகத்தின்
எந்த கதாபத்திரமும்
இவளது எதுவுமில்லை

இருப்பினும்
மென்பாசிக் குளத்தில்
கேள்விக் குறியென
மிதக்கும் வாத்திடமும்
இருக்கக்கூடும்
இவளை பற்றிய சந்தேகங்கள்

இளங்காலை பொழுதொன்றில்

2011-02-21T20:19:00.000-08:00

இருள் பிரியா
இளங்காலை பொழுதொன்றில்
வழக்கம் போல்
மௌனமாய் நீண்டு கிடந்தது பாதை

சற்று தொலைவில்
பேரிரைச்சலுடன்
வருகிறதென் பேருந்து
நிறுத்தத்தில் சற்று முன்னிறங்கி
காட்டுக்குள் காற்றசைக்கும் வெயிலென
மெல்ல நடக்கிறேன்

குளிருக்கு ஒடுங்கி
தடி கம்பளி போர்த்தி
நிறுத்தக் குடை நிழலில்
அமர்ந்திருக்கும் அவனை
பதறி விலக வேண்டாமென
சொல்லத் தான் நினைக்கிறேன்
ஆயினும் ப‌ய‌மாய் இருக்கிற‌து
அதோ என் பேருந்து
ஆமையென வந்த வண்ணமிருக்கிறது

தாங்க இயலாதவை

2011-02-07T20:17:00.000-08:00

வீட்டுக்குள் நுழைய
திறக்கவியலாத கண்ணாடியை
மீண்டும் மீண்டும் தட்டியரும்
அறியாமையின் சிட்டுக்குருவியாய்
என்னை விட்டு விடுங்கள்

இரக்கம் கொண்டு
இறுக மூடிய கதவுகளை
திறக்க வேண்டேமென்று
தயை கூர்ந்து கேட்டு கொள்கிறேன்

திறக்காத கதவு தரும்
ஏமாற்றத்தினும்
உங்கள் காருண்ய திறப்புகள்
தாங்க‌வியலாம‌ல் இருக்கக்கூடும்

பூவொன்று

2011-01-29T04:26:00.000-08:00

மழைத்துளியென
மஞ்சள் மலர்களை
உதிர்த்துக் கொண்டிருந்தது
அம்மரம்

நிழலுக்கென ஒதுங்கிய பேருந்து
அதில் சில மலர்களை
முன்கண்ணாடியில் ஏந்திச்சென்றது
கண்ணாடி வழுக்கிய பூக்கள்
சாலையில் விழுந்து நசுங்கின

வைப்பர் புறக்கணித்த
பூக்கள் சில
ரோட்டோரம் சிதறின
பெண்டுலமாக ஆடும் வைப்பரில்
சிக்கிய சில பூக்கள்
நைந்து கிழிந்தது

பின்னும் வைப்பர்
கிட்டிய பூக்களை விடாது
அலைகழித்து
கசக்கி பிழிந்து கொண்டிருக்கிறது

எதுவும் செய்யவியலாது
பூக்கள் சிதைவுறும் காட்சி
மனசுக்குள் குமைய
நிறுத்தம் வந்ததும் இறங்கி நடக்கிறேன்

கேள்வி

2011-01-23T00:59:00.000-08:00

வருவாய் என்று
துளியெனும் எதிர்நோக்கவில்லை
வந்தாலும் அழைப்பாய் என்று
சற்றும் நினைக்கவில்லை
அழைத்தாலும் அருகே வர
தயக்கமற்றிருப்பாயென தோன்றவேயில்லை
எதிர்பாரா எல்லாம் செய்தாய்
கேட்டுவிட்டும் சென்றிருக்கலாமே?

பொம்மைகளின் பிரிய‌ம்

2010-12-21T08:04:00.000-08:00

ப‌ச்சைக்கு காத்திருக்கும்
கண நேர‌த்தில்
முன் சென்ற சீருந்தின்
பின்புற க‌ண்ணாடியில்

ஒரு யானையும் ஒட்ட‌க‌ச்சிவிங்கியும்
முக‌வாயும் க‌ண்க‌ளும் காதும் ம‌ட்டும்
க‌ருமை பூசிய நாய்க்குட்டியும்
த‌த்த‌ம் பாவனையில் வெளியுல‌கை
நோட்ட‌மிட்ட வ‌ண்ண‌மிருந்த‌து

காத்திருப்பின் நொடிக‌ள்
ஒடிய ஒடிய ஒரு கணம்
வேக‌மெடுத்த முன்வ‌ண்டியில்
அவை மூன்றும்
எந்த ம‌ழ‌லைப் பிரிய‌த்தை
வீட்டோடு விட்டு வ‌ந்த‌தோ

ஏக்க‌ங்க‌ளையும் க‌ண்ணில் ப‌துக்கி
முன் செல்லும் வ‌ண்டியை
வீடு நோக்கி
பின்னே இழுத்துக் கொண்டிருந்த‌து

புதுப்பெண்

2010-12-10T08:53:00.000-08:00

வீடு புதிது
உறவுகள் புதிது
கிண்டல் புதிது
தீண்டல் புதிதென
கல்யாண புதுப்பெண்
மங்கல ஓசைகளில் இருந்து விடுபடாமல்
திளைத்திருக்கிருக்கிறாள்

“நாளைக்கு காலேல
யாரும் எழுமுன்
சாணம் கரைத்து போட்டு
வாசல் பெருக்கிட்டு வரணும்”

நாத்தனாரின் கட்டளை கேட்டு
திடுக்கிட்டு அடங்கி
பழம்பெண்ணாகினாள்.

தேடல்

2010-10-19T22:58:00.000-07:00

காற்றில் ஒரு ஓடமென
தளும்பி தளும்பி மிதக்கும்
ஒற்றை சிறகொன்று
உன் ப‌ற்றுத‌லுக்காய்
அங்குமிங்கும் அலைந்திருந்த‌து.

ஆல்பம்

2010-10-18T08:22:00.000-07:00

புகைப்பட ஆல்பம் கைக்கு வர
அவசரமாய் தேடுகிறோம்
அக்கா அக்காவை
தம்பி தம்பியை
நான் என்னை
பொறுமையாக அம்மாவோ
ஒவ்வொருவரையும்.

ஈரம்

2010-10-15T00:38:00.000-07:00

நதியோர மணல்
எப்போதுமே
மழை நனைக்கவியலாதபடி
நனைந்தே இருக்கிறது.

லாவண்யா சுந்தரராஜனின் "நீர்க்கோல வாழ்வை நச்சி" - பாவண்ணன்

2010-10-07T23:23:00.000-07:00

ஊமத்தம்பூக்களும் தானியங்கிக்குழாய்களும்

பெருநகரத்தில் பெரிய நிறுவனமொன்றில் இணைந்து பணிபுரிந்து வாழும் வாய்ப்புப்பெற்றவராக உள்ளார் லாவண்யா. ஆனால் அவர் மனம் பள்ளிப் பருவத்துக்குச் சொந்தமான கிராமத்துடன் ஆழ்ந்த பிடிப்புடையதாக இன்னும் இருக்கிறது. மனத்தளவில் கிராமத்தையும் புறநிலையில் நகரத்தையும் சுமந்தபடி வாழ்கிற இரட்டை வாழ்க்கை இன்றைய தலைமுறையினருக்கு தவிர்க்கமுடியாத ஒரு நெருக்கடி. எதையும் உதறமுடியாத, எதையும் உடனடியாகப் பற்றிக்கொள்ளமுடியாத அவர்கள் மனத்தவிப்புகள் இக்காலகட்ட இலக்கியத்தின் பாடுபொருளாக மாறியிருக்கிறது. லாவண்யாவின் படைப்புலகத்திலும் அது சுடர்விடுகிறது. ஊமத்தம்பூ அவருக்குப் பிடித்திருக்கிறது. தானியங்கிக்குழாய் அவருக்குப் பிடிக்கவில்லை. அவரையறியாமலேயே அவருடைய விருப்புவெறுப்புகள் கவிதைகளில் தன்னிச்சையாக வெளிப்பட்டுவிடுகின்றன.

"ஏரி போலும் ஏரி" இத்தொகுப்பின் சிறந்த கவிதைகளில் ஒன்று. கவிதையில் சித்தரிக்கப்படும் ஏரி வறண்ட தோற்றத்துடன் உள்ளது. சற்று முன்பாக பெய்த மழையின் வரவால் எங்கோ ஒரு பள்ளத்தில் சின்னக் குட்டையாக தேங்கி நிற்கிறது நீர். ஒரு காலத்தில் நீர் தளும்பி நின்ற தோற்றம், இன்று ஒரு சின்னக்குட்டையையும் பெருமளவு கருவேல மரங்களையும் புல்வெளியையும் கொண்ட இடமாக உருமாறிவிட்டது. உயரமான தோற்றத்தோடு எழுந்து நிற்கும் கரைகள்மட்டுமே ஏரி என்கிற பெயரைத் தக்கவைத்துக்கொள்ளும் அடையாளமாக இன்னும் எஞ்சி நிற்கிறது. உருமாறி நிற்கிற ஏரியின் சித்தரிப்பதோடுமட்டுமே இக்கவிதை முற்றுப்பெற்றிருப்பின் அதை ஒரு காட்சிக்கவிதை என்ற அளவில் கடந்துபோய்விடமுடியும். ஆனால் கவிதை சற்றே நீண்டு, அந்த ஏரியைக் கடந்துபோகிற ஒரு பெண்ணின் சித்திரத்தைத் தீட்டிக் காட்டுகிறது. தன்னைப்போலவே அந்த ஏரி என அவள் மனம் எண்ணுவதையும் கண்டறிந்து சொல்கிறது. அக்கணம் ஏரி அழகான ஒரு படிமமாக விரிவாக்கம் பெற்றுவிடுகிறது. அவள் எப்படி ஏரியாக மாறமுடியும். நீர் தளும்பிநின்ற ஏரியைப்போல அவளும் ஒரு காலத்தில் இளமை ததும்ப நின்றவள். காலம் அவள் இளமையை விழுங்கிவிட்டது. வெவ்வேறு அடையாளங்களை அவள் உடலில் ஏற்றிவிட்டது. அவள் உருவம்மட்டுமே பெண்ணுக்குரிய தோற்றமாக எஞ்சி நிற்கிறது. அகத்தோற்றத்திலும் புறத்தோற்றத்திலும் எண்ணற்ற மாற்றங்களை உருவாக்கியபடி நகர்ந்துகொண்டே இருக்கிறது காலம். காலம்மட்டுமே, மாறாத உருவத்தோடு வலம்வர, அதன் கண்ணில்பட்ட எல்லாம் மாற்றமடைந்தபடியே இருக்கிறது.

"கண்ணாடிக்கோப்பைகளும் சில பிரியங்களும்" தொகுப்பில் உள்ள மற்றொரு நல்ல கவிதை. இரண்டு கண்ணாடிக்குவளைகளை முன்வைத்துப் பேசுகிறது கவிதை. அதன் தோற்ற ஒற்றுமையை அடிப்படையாகக் கொண்டு இரட்டையர்போல இருப்பதாகவும் சொல்கிறது. தோற்றம்மட்டுமே ஒன்றாகவே இருந்தாலும் அது பயன்படும் விதத்தில் துல்லியமான வேறுபாடு உள்ளது. ஒன்றில் பிரியம் நிரப்பப்படுகிறது. இன்னொன்றில் தனிமை அகப்பட்டுத் தவிக்கிறது. இது ஒரு தருணத்தின் காட்சி. இன்னொரு தருணத்தில் இக்காட்சி மாற்றமடையலாம். பிரியத்தின் குவளையில் தனிமை அகப்பட்டுவிடுகிறது. தனிமையில் குவளையில் பிரியம் நிரம்பி வழிகிறது. தருணங்கள் இப்படி மாறிமாறி அமைந்தாலும், எல்லாத் தருணங்களிலும் ஏதோ ஒரு குவளைமட்டுமே நிரப்பப்படுகிறது, மற்றொரு குவளையில் தனிமையின் வெறுமை சூழ்ந்து நிற்கிறது. மேசைமீது வைக்கப்பட்ட கண்ணாடிக்குவளைகள் சமூகத்தளத்தில் படிமமாக மாற்றமடையும்போது கவிதையின் வலிமை அதிகரிக்கிறது. நிரப்பப்பட்ட குவளை, எப்போதும் வாய்ப்புகளைத் துய்க்கிற வகுப்பைப் பிரதிநிதித்துவப்படுத்துவதையும் வெற்றுக்குவளை, வாய்ப்புகளுக்கு வழியில்லாமல் புறக்கணிக்கப்பட்ட வகுப்பைப் பிரதிநிதித்துவப்படுத்துவதையும் உணரமுடியும். பெறுவதும் புறக்கணிக்கப்படுவதும் தருணத்துக்குத் தகுந்தபடி மாறலாம். ஆனால் புறக்கணிப்பென்ற ஒன்றே இல்லாதபடி சூழல் ஏன் மாறவில்லை என்பது முக்கியமான கேள்வி.

"எத்தனைமுறை பயந்தாலும் பயம்மட்டும் பழகுவதில்லை" என்பது லாவண்யாவின் ஒரு கவிதையில் இடம்பெற்றிருக்கும் வரி. மனம் அசைபோட நல்ல வரி. சிலருக்கு எதிர்பாராதவிதமான ஓசைகளைக் கேட்டதும் பயம் அரும்புகிறது. சிலருக்கு எதிர்பாராத மனிதர்களைச் சந்தித்தால் பயம் உருவாகிறது. சில காட்சிகளைக் கண்டால் சிலருக்கு பயம் தோன்றுகிறது. ஏதோ ஒருவிதத்தில் ஒவ்வாமையால் அல்லது அதிர்fச்சியால் உருவாகிற உணர்வுதான் பயம். அதிர்ச்சி அல்லது ஒவ்வாமை இருக்கிறவரைக்கும் பயமும் இருக்கத்தான் செய்யும். பயத்தை ஒருபோதும் நம்மால் பழகிக்கொள்ளமுடிவதில்லை. பிறவிக்குணம்போல அது நம்முடனேயே தங்கிவிடுகிறது.

"அமைதியை விளைவித்தல்" நவீன வாழ்வின் பதற்றத்தைப் பகிர்ந்துகொள்ளும் நல்ல கவிதை. வேலையிடங்கள் இப்போதெல்லாம் பெருநிறுவனத்தன்மை கொண்டதாக மாறிவிட்டன. எல்லா இடங்களிலும் அடையாள அட்டை. கைவிரல் ரேகைப் பதிவு. வரும் சமயம், வெளியேறும் சமயங்களின் பதிவு. நுழைந்ததற்குப் பிறகு தானே அடைத்துக்கொள்ளும் தானியங்கிக் கதவுகள். எங்காவது ஓரிடத்தில் இடறிவிடுமோ என்கிற பதற்றத்தை மனம் எப்பொழுதும் சுமந்தபடியே இருக்கும். தவறே செய்யாத இயந்திரங்கள் பிறழ்ந்து செயல்படும் சமயங்களில் மனிதர்கள் சூழ்நிலைக் கைதிகளாக கைகட்டி நிற்பதைப் பலமுறை பார்த்த அனுபவத்தால், உள்ளிருக்கும் வரை பதற்றமும் துணையாக இருக்கிறது. அமைதியான வகையில் வாழ்வை அமைத்துக்கொள்ளத்தான் வேலையைத் தேடுகிறோம். ஆனால் வேலைசெய்யப் போன இடத்தில் பதற்றத்தில் உழல்fகிறோம். எவ்வளவு பெரிய முரண்.

காட்சிகளையும் அனுபவங்களையும் எண்ணங்களையும் வகைப்படுத்தி கவிதைகளாக மாற்றும் முயற்சிகளில் ஈடுபட்டிருக்கும் இளையதலைமுறைக் கவிஞர் லாவண்யா. அவருடைய ஆர்வத்துக்கு சொல்லிக்கொள்ளும்படியாக வெற்றி கிடைத்திருக்கிறது என்பதற்கு இத்தொகுப்பைச் சாட்சியாகச் சொல்லலாம். அவர் மேற்கொள்ளும் இடைவிடாத புதிய முயற்சிகள்மட்டுமே இனி அவரை அடுத்த கட்டத்தைநோக்கி நகர்த்திச் செல்ல உதவும்.

( நீர்க்கோல வாழ்வை நச்சி - கவிதைத்தொகுதி. லாவண்யா சுந்தரராஜன், அகநாழிகை பதிப்பகம். 33, மண்டபம் தெரு, மதுராந்தகம்- 603 306. விலை.ரூ40)

ஒரு வேப்ப‌ ம‌ர‌மும் வ‌ழி ம‌றிக்கும் சாலைக‌ளும்

2010-09-24T02:26:00.000-07:00

எங்க‌ள் வீட்டு தோட்ட‌த்தில் மிக‌ப் பெரிய‌ வேப்ப‌ ம‌ர‌மிருக்கிற‌து. சுமார் ஒரு ஏழு வ‌ருட‌த்திற்கு முன் என‌து கை அள‌விற்கே ஒல்லியாக‌ இருந்த‌ இந்த‌ ம‌ர‌ம் த‌ற்ச‌மய‌ம் என்னை விட‌ குண்டு பெண்ணாகி விட்ட‌து. எங்க‌ள் வீட்டு மாடிக்கு மேல் வ‌ள‌ர்ந்து விட்ட‌து இந்த‌ ம‌ர‌ம். வேப்ப‌ம‌ர‌ம் வைத்த‌ கார‌ண‌மே எங்க‌ள் வீடு சாலையிலேயே அமைந்திருப்ப‌தாலும் அதில் தொட‌ர்ந்து க‌ன‌ வாக‌ன‌ங்க‌ள் புழுதியை அள்ளி இறைத்த‌ ப‌டி செல்வ‌தால் வீடு புழுதியாகி விடுவ‌தை சற்றேனும் த‌டுக்க‌லாம் என்ற‌ எண்ண‌மே.

இந்த‌ வேப்ப‌ ம‌ர‌ம் அட‌ர்ந்து வ‌ள‌ர்ந்து க‌ண்ணுக்கு எவ்வ‌ள‌வு குளுமையாக‌ இருக்கிற‌து என்று அருகிருந்து பார்ப்ப‌வ‌ர்க்கு ம‌ட்டுமே தெரியும். இடையிடையே க‌ண்ணாமூச்சி ஆடி சிரிக்கும் சூரிய‌னும் ம‌றைந்து ம‌றைந்து பொழியும் ம‌ழையும் எத்த‌னை அற்புத‌மாக‌ இருக்கும். இந்த‌ ம‌ர‌ம் சில‌ அணில்க‌ளுக்கும், ப‌ல‌ காக‌ங்க‌ள், குயில்க‌ள் ம‌யில்(எங்க‌ வீட்டுக்கே ம‌யில் வ‌ரும் ந‌ம்புங்க‌) இவ‌ற்றின் குதூக‌ல‌த்துக்கும் குர‌லுக்கும் அடித்த‌ள‌மாக‌ அமைந்திருந்த‌து.

வீட்டுக்கு முன் செல்லும் மின்சார‌ க‌ம்பிக‌ளில் வேப்ப‌ங்கிளைக‌ள் மோதுவ‌தாக‌ மின்சார‌ ஊழிய‌ர்க‌ள் வ‌ந்து இர‌ண்டு மூன்று பெரிய‌ கிளைக‌ளை வேப்ப‌ ம‌ண‌ம் ம‌ண‌க்க‌ வெட்டி சாய்த்துவிட்ட‌ன‌ர். ப‌ழைய‌ வேலைக்காரி வேப்ப‌ங்கிளைக‌ளின் மேல் க‌ண் கொண்டிருந்தாள் வெட்டிய‌து தான் தாம‌த‌ம், சில‌ரை அழைத்து வ‌ந்து வெட்ட‌ப்ப‌ட்ட‌ அத்த‌னை கிளைக‌ளையும் அள்ளிக் கொண்டு போய்விட்டாள். த‌ற்ச‌ம‌ய‌ம் வீட்டை விட்டு வெளியே வ‌ந்தால் சூரிய‌னும் ம‌ழையும் நேர‌டியாக‌ தெரிகின்ற‌ன‌.

"கூரை எரிந்து போன‌து
நில‌வு தெளிவாக‌ தெரிகின்ற‌து"

என்றொரு ஹைக்கூ க‌விதை இருப்ப‌தாக‌ கற்றதும் பெற்றதுமில் சுஜாதா எழுதியதைப் ப‌டித்திருக்கிறேன்.

வீட்டுக்கு அருகில் இருக்கும் சில‌ தெருக்க‌ளில் ம‌க்க‌ள் தா‌ங்க‌ளே அமைத்துக் கொள்ளும் வேக‌த் த‌டைக‌ளை க‌ட‌க்கும் போது என்ன‌வ‌ர் சொல்வார் "இது எல்லாம் தேசிய‌ செல‌வீன‌ம்(நேச‌ன‌ல் வேஸ்டேஜ்)". அவ‌ர் அப்ப‌டி சொல்ல‌ கார‌ண‌ம் இந்திய‌ அர‌சு அதிக‌ விலைக்கு பெட்ரோலிய‌ க‌ச்சா பொருள் வாங்கி செல‌வு செய்து பெட்ரோல் செய்து மிக‌ குறைந்த‌ விலைக்கு விற்கிற‌து. எண்ணை நிறுவ‌ன‌ங்க‌ள் பெரும்பாலும் அர‌சின் ந‌ட்ட‌ க‌ண‌க்கு பாக‌த்திலேயே வ‌ருகின்ற‌ன‌. அப்ப‌டி இருக்க‌ ப‌த்த‌டிக்கு ஒரு வேக‌த்த‌டை வாக‌ன‌த்தின் பெட்ரோல் செல‌வினை அதிக‌ரிக்கும். அதுவும் தெருக்க‌ளில் போட‌ப்ப‌டிருக்கும் வேக‌த்த‌டை விதிப்ப‌டி சீராக‌ கொஞ்ச‌ம் தொலைவிலிருந்து ஏறி இற‌ங்கி இருக்காது. கொக்கு மாக்காக‌ சுவ‌ர் போல் எழுப்பி இருப்பார்க‌ள் ஏறித் தான் குதிக்க‌ வேண்டும். என்ன‌வ‌ர் எண்ணை நிறுவ‌ன‌ர் ஆயிற்றே இத‌ற்காக‌ அலுத்துக்கொள்வார்.

சென்ற‌ வார‌ம் நேர்முக‌ தேர்வொன்றுக்காக‌ டெல்லி வ‌ரை செல்ல‌ வேண்டி இருந்த‌து. இந்திய‌ சாலைக‌ளில் முக்கால்வாசி குண்டும் குழியுமாக‌ வ‌ழி வார்ப்பதை விட்டு வ‌ழி ம‌றிப்ப‌தையே வேலையாக‌ கொண்டிருப்ப‌வை. அதுவும் டெல்லியின் தொட‌ர்ம‌ழை கார‌ண‌மாக‌ குண்டும் குழியும் மிக‌ அதிக‌மாக‌ இருந்த‌ன விழுந்து எழுந்து சென்று கொண்டிருந்தோம்‌. தெருவில் வேக‌த்த‌டைக்கே "நேச‌ன‌ல் வேஸ்டேஜ் என்பீர்க‌ளே இதை என்ன‌ சொல்வ‌து" என்றேன். இது "கொலைக்குற்ற‌த்திற்கு இணையான‌து" என்றார். ஆம் அவ‌ர் சொல்வ‌து ச‌ரி தான் அந்த‌ சாலையில் ஒரு நாளைக்கு எத்த‌னை வாக‌ன‌ங்க‌ள் க‌ட‌க்கின்ற‌ன‌? இத்தனை குண்டும் குழியுமாக‌ எத்த‌னை சாலைக‌ள் இருக்கின்ற‌ன‌? மொத்த‌ பெட்ரோலிய‌ க‌ச்சா எண்ணை இருப்பு என்ன‌? ம்ம் நாட்டை ஆள்ப‌வ‌ர்க‌ள் கொஞ்சமேனும் யோசிப்பார்க‌ளா அல்ல‌து காம‌ன் வெல்த் ம‌ட்டும் சேர்த்துக் கொண்டு இருப்பார்க‌ளா? அந்நிய‌ன் விக்ர‌ம் போல் யாராவ‌து வ‌ந்தால் தான் என் தாய்த்திரு நாட்டை காக்க‌ முடியும். ஹூம்ம்ம்ம்.

க‌விதைக‌ள் நான்கு

2010-09-15T20:00:00.000-07:00

ந‌ன்றி: அக‌நாழிகை - இத‌ழ் 5

க‌விதைக‌ள் மூன்று

2010-09-09T04:05:00.000-07:00

நீர் நிறை கலயம்
===============

நீர் நிறை கலயமொன்று
தன்னுள் சில பிம்பங்களை
தளும்பி
பிரதிபலித்தது

நிறைதலை உணரா
நீர்க்குழாயும் சுவடுகளை
மேலும் சொட்டிக்
கொண்டிருந்தது

ஒவ்வொரு சொட்டும்
ஒரு தாளத்தோடு
அதிர்வித்தது கலயத்து
பிம்பங்களை

பெருமதிர்வு
நீரில் கரைந்து
மென் அதிர்வாகும்
முன் மீண்டும்
சொட்டியது நீர்குழாய்

மீன் குட்டிகளும் பிளாஸ்டிக் பை நீரும்
=================================

நேற்றே பிறந்த மீன்குட்டிகள்
பிளாஸ்டிக் பையில் அடைக்கப்பட்டன
பிறந்த இடத்தின் நினைவுகள்
உயிர் காக்கும் நீராக நிறைந்திருந்தது
பிளாஸ்டிக் பையெங்கும்

பிரிய கண் விரிய
வந்த ஒரு குழந்தை
பிடித்த மீன்குட்டிகளோடு
தன் வீட்டிக்கு வந்தனள்

தொட்டியில் அவிழ்க்கப்பட்ட
பிளாஸ்டிக் பை நீர்
தன் அடையாளம் முற்றும்
தொலைத்து மீன் தொட்டி நீரானது

மல்க மல்க விழித்த
மீன் குட்டி தொட்டி நீருக்கு
சிறுகச் சிறுக தன்னை பழகி
நீந்தத் தொடங்கியது.

மென் பிரியம்
============

திருதுழாய் மலர்களென
சிறிய பிரியத்தை
பூத்திருந்தது
என் வனம்

கோடை மழையின்
தடதடப்பில்
அழிய ஆரம்பித்தது
சுவரின் கறையெல்லாம்

விஷ நகமென
கிளைத்து வளர்ந்தது
வெட்ட நினைத்த
நினைவுகள்

எல்லாம் பார்த்து
கொண்டிருந்த
பெருமாள் படியுள்
ச‌ய‌னித்திருக்கும் அவன்.

ந‌ன்றி:ப‌ண்புட‌ன் செப்ட‌ம்ப‌ர் மாத‌ இத‌ழ்

பிழைக்காட்சி

2010-08-26T20:33:00.000-07:00

அதிகாலை பூங்காவில்
அமைதி காற்றோடே
ச‌ண்டையென‌ பிற‌ர் நோக்க‌
ஆக்ரோச‌ ச‌த்தத்துட‌ன் கைவிர‌ல் ம‌ட‌க்கி
முக‌த்தினை தாக்க‌ வ‌ந்த‌வ‌னிட‌ம்
அதிர்வோ ச‌ல‌ன‌மோ வில‌க‌வோயில்லை
சண்டையை பயில்ப‌வ‌ன்

அந்த‌ர‌த்தில் தொங்கும் எட்டுக்காலியென‌
ஒரு ம‌லையிலிருந்து
இன்னொரு ம‌லைக்கு
க‌யிறு ஊர்த்தியில்
ப‌ய‌ண‌ப்ப‌ட்ட‌ பெட்டி
தெரிந்த‌து அந்த‌ர‌த்தில்
க‌யிறு க‌ண்ணிற்கு
அப்பாற்ப‌ட்டிருந்த‌து

சில‌ காட்சிக‌ள்
உண்மையை உண‌ர்த்தும் முன்னேயே
பிழையை உண‌ர்த்தி செல்கின்ற‌ன‌
சில‌ பிரிவுக‌ள் போல‌வும்

மீன் குட்டிகளும் பிளாஸ்டிக் பை நீரும்

2010-08-24T07:59:00.000-07:00

நேற்றே பிறந்த மீன்குட்டிகள்
பிளாஸ்டிக் பையில் அடைக்கப்பட்டன
பிறந்த இடத்தின் நினைவுகள்
உயிர் காக்கும் நீராக நிறைந்திருந்தது
பிளாஸ்டிக் பையெங்கும்

பிரிய கண் விரிய
வந்த ஒரு குழந்தை
பிடித்த மீன்குட்டிகளோடு
தன் வீட்டிற்கு வந்தனள்

தொட்டியில் அவிழ்க்கப்பட்ட
பிளாஸ்டிக் பை நீர்
தன் அடையாளம் முற்றும்
தொலைத்து மீன் தொட்டி நீரானது

மல்க மல்க விழித்த
மீன்குட்டி தொட்டி நீருக்கு
சிறுகச் சிறுக தன்னை பழகி
நீந்தத் தொடங்கியது.

முக்கோணம்

2010-08-23T00:20:00.000-07:00

அவன்:
------------

சுஜி என்னுடைய கலந்துவிட்ட உயிரவள். அவள் பேரழகி என் கண்களுக்கு மட்டுமல்ல என்னுடைய புகைப்பட கருவி கூட இதையே சொல்லும் அவளை நான் சந்தித்ததே வித்தியாசமான விதத்திலேயே. ஒரு முறை என் நண்பர் ஒருவன் சொல்லி சுஜியின் வீட்டுக்கு நான் புகைப்படம் எடுக்க சென்றிருந்தேன். சுஜி ஒரு பள்ளிக்கூடம் செல்லும் குட்டிப்பெண் போல பாவாடை சட்டையில் இருந்தார். அவளையே புகைப்படம் எடுக்க சொல்லி அவளுடைய அண்ணன் சொன்னார். நான் எடுக்கும் முன் வந்த பக்கத்து வீட்டுப் பாட்டி கல்யாணத்துக்கு பையன் பாக்க இப்படியா பாவாடை சட்டை போட்டு எடுத்து வைக்கிறது. போய் புடவை கட்ட சொல்லு என்றதும், சுஜிக்கு மிக கோபம் வந்து எங்களை விரட்டி அடித்தாள். அவள் அண்ணன் என்ன பாட்டி காரியத்தையே கெடுத்துட்ட என்று திட்டிக் கொண்டிருக்கும் போதே நாங்கள் வெளியேறி விட்டோம்.

பின்பு நான் அவளை கண்டது ஒரு திருமணத்தில், மிக அழகாக புடவை உடுத்தி தடுமாறி தடுமாறி நடந்து கொண்டிருந்தாள். திருமண புகைப்படங்கள் அதிகம் எடுத்த புகைப்படங்கள் அவளையே. அவளுக்கே தெரியாமல் எடுத்த காரணத்தால் எல்லாமே இயற்கையாக வந்திருந்தது. மிக அழகாக இருந்தது அவை அனைத்தும். அதை நான் அவளிடம் கொடுக்க போதும் போதே எங்களுக்குள்ளே நல்ல அனுக்கம் வந்தது. அதன் பின்னர் அவள் அடிக்கடி எங்கள் புகைப்பட நிறுவனத்திற்கு வந்த வண்ணமிருந்தாள். அவள் புகைப்படவியலையே தன் படிப்பாக கொண்டிருந்ததாலும் பின்னர் நல்ல விளம்பர நிறுவனம் நிறுவ வேண்டும் என்று நினைத்திருந்ததாலும் எங்களிடையே நல்ல பிடிப்பிருந்தது. ஒத்த விசயங்களை பல கண்டோம். இனம் புரியாத உணர்வலைகள் எங்கள் இருவரிடையேயும் ஓடிய வண்ணமிருந்தது.

இதுதான் என்று சொல்ல தெரியாத ஒரு தயக்கம் எனக்கிருந்தது. அவளுடன் இருக்கும் நேரமனைத்தும் அழகானதாக தோன்றியது. அவள் வரும் நேரம் காத்திருக்க ஆரம்பித்தேன். ஆனால் உன்னுடன் கழிக்கும் நேரம் நல்ல கவித்துவமான ஒரு விளம்பரம் செய்வது போல் இருக்கின்றது சொல்ல முடியாமல் தவித்தேன். அவளுக்கு என்னை பிடித்திருக்கின்றதா என்றே தெரியவில்லை. அவளுக்கு திருமணத்தின் மேல் அவ்வளவாக நம்பிக்கையில்லை என்றும் சொல்லி இருந்தாள். அவளிடம் போய் ஏதாவது உளறி வைத்து அவளுடன் கழிக்கும் கொஞ்ச நஞ்ச நேரமும் இல்லாமல் போய் விடுமோ என்று இருந்தது.

இடைப்பட்ட ஒரு காலத்தில் காதலர் தினமென்றும் அதை கொண்டாட என்று என் நிறுவனத்தில் அனைவரும் திரைப்படம் செல்வதாகவும் முடிவானது. சுஜியும் எங்களுடன் வர சம்மத்தித்தால். அளவற்ற குதுகலத்தோடு நாங்கள் அனைவரும் திரைப்படம் சென்றோம். நாங்கள் இருவரும் அன்று தான் முதன்முதலில் வெளியே சென்றோம். அதுவும் சுஜி என்னுடைய காதலியாக நான் மட்டும் தான் நினைத்திருந்தேன். ஆனால் அப்படி நாங்கள் வெளியே செல்வது தான் முதலும் கடைசியுமாக இருக்கும் நான் நினைத்தும் பார்க்கவில்லை.

0

நான்
---------

நான் சேகரை காதலித்தேனா? இந்த விசயம் என் அண்ணன் சொல்லியே எனக்கே தெரியும். எனக்கு சேகரின் புகைப்படம் சார்ந்த பல உரையாடல்கள் பிடித்திருந்தது. என் எதிர் காலத்துக்கு அந்த உரையாடல்கள் எல்லாம் மிக உதவும் என்று நினைத்திருந்தேன் ஆனால் அவன் மட்டுமே என் எதிர் காலமென்று என்றும் எண்ணியதில்லையே. நான் செய்த ஒரே ஒரு தவறு காதலர் தினமன்று சேகர் மற்றும் அவனுடைய நண்பர்களுடன் வெளியே செல்ல முடிவெடுத்தது மட்டுமே. எங்களை விதி போல தொடர்ந்து வந்தது ஒரு கூட்டம். கலாச்சார காவலர் என்று தன்னை தானே அடையாளம் செய்து கொண்டு இருவராக வந்திருந்த எல்லோரையும் அவர்கள் வாய்க்கு வந்த வண்ணம் பேசியபடி அவமான படுத்திக் கொண்டிருந்தார்கள். அந்த கூட்டத்தில் இருந்தவன் ஒருவன் நான் திரைப்படம் வந்திருந்ததை போய் அண்ணனிடம் சொல்லி விட்டான்.

என்னை இப்போதெல்லாம் எங்கும் செல்ல அனுமதிப்பதில்லை.
இவர்களிடம் எவ்வளவு சொல்லி பார்ப்பது. எங்கள் இருவருக்கும் ஏதோ தொடர்பிருப்பதாகவே எண்ணிக் கொண்டனர். சேகர் எடுத்த புகைப்படங்களை காட்டி அதற்கு காரணமென்ன என்று கேட்கும் அவர்களுக்கு என்ன பதில் சொல்வதென்று தெரியவில்லை. அதனினும் கொடிய விசயம் எனக்கு இதையே காரணமாக காட்டி அவசர அவசரமாக ஒரு திருமணத்தையும் செய்ய ஏற்பாடு செய்கின்றார்கள். திருமணமென்பதே பிடிக்காத விசயமா இருந்தேன். அதை ஒரு கொண்டாட்டமாக இல்லாவிடிலும் ஒரு தண்டனையாக எனக்கு அமைந்திருக்க வேண்டாம். என்ன சொல்லி இவர்களிடம் என் உணர்வுகளை புரிய செய்வது.

யோசித்து பார்க்கும் போது சேகருக்கு என்னை பிடிக்கும் என்று எனக்கும் தெரியும். அவனுடன் கழிக்கும் நேரம் மிக சந்தோசமாக உணர்ந்திருக்கிறேன். அது அவனிடம் கூட சொன்னதில்லை. இது தான் காதலா என்று நான் நினைத்து பார்க்க கூட எனக்கு இடைவெளி கிடைக்கவில்லை அதற்குள் இப்படி நேர்ந்துவிட்டது. இப்படி ஒருவனை பார்த்து கொஞ்சம் பழகி பின்பு அவனை மணந்தால் தானே நன்றாக இருக்கும். எனக்கு வாழ்க்கை துணையாக வருபவன் என்னுடைய எண்ணங்களையும் என் லட்சியங்களையும் நிறைவேற்றுபவனாக இருக்க கூட தேவையில்லை. எனக்கும் வேறு ஒருத்தனுக்கும் இல்லாத சம்மதத்தை எப்போதும் நினைவுறுத்துபவனாக நான் செய்யாத ஒரு விசயத்தின் பரிசாக நெஞ்சில் எப்போதும் ஒரு வலியாக இருப்பவனாக இருந்தால் என்னால் எப்படி நன்றாக இருக்க முடியும்.

திருமணம் ஆகி அவனுடன் தனித்து விடப்பட்ட நேரங்களில் எனக்கு தாம்பத்தியத்தில் ஈடுபட இப்போது விருப்பமில்லை என்று மட்டும் சொல்லி வைத்திருத்தேன். அவரிடம் எல்லா விசயத்தையும் சொல்லியே இந்த திருமணத்தை ஏற்பாடு செய்து இருப்பதாக அண்ணன் சொன்னான். இவரும் மிக பெரும் மனதுடையவர் போல உன்னுடைய கடந்த காலத்தில் நடந்தது எதுவுமே எனக்கு முக்கியமில்லை. உன்னை எனக்கு ரொம்ப பிடித்திருக்கிறது என்று சொல்கின்றார். அட கடவுளே என்னுடைய விருப்பமென்பது என்ன என்று யாருக்குமே அக்கரையில்லையா. எனக்கு காதலில்லை ஆனால் இன்னொருவனை காதலிக்கிறாள் என்று தெரிந்தும் எப்படி ஒருவரால் என்னை ஏற்று கொள்ள முடியும்.

எனக்கு இந்த வாழ்க்கையில் கொஞ்சம் கூட பிடித்தமே இல்லை. என்னை தேவையற்ற வாழ்க்கைக்குள் தள்ளி விட்டார்கள். இவரும் என்னுடைய எதிர்காலத்தில் நான் எப்படி இருக்க வேண்டும் என்று நினைத்து வைத்திருக்கிறேன் என்று கூட கேட்கவில்லை. ஆனால் என் மேல் அன்பாயிருக்கிறார். நான் உண்டேனா உறங்கினேனா அன்றாடம் என்னுடைய தேவைகள் என்ன என்று பார்த்து பார்த்து கவனிக்கிறார். இருந்தாலும் எனக்கென்னவோ இந்த வாழ்க்கை ஒட்டவில்லை. நான் பெரிதாக இழந்துவிட்டேன் என்று தோன்றுகின்றது. ஒருவேளை சேகரை மணந்திருந்தால் நன்றாக இருக்குமோ என்று கூட நினைக்க தோன்றுகின்றது.

0

மற்றுமொருவன்
------------------------------

சுஜி என் மனைவியாகி இத்துடன் கிட்டதட்ட ஆறு மாதங்கள் ஆகிவிட்டன. அவளுக்கு ஒரு காதல் இருப்பதாகவும், அவன் இவளை ஏமாற்ற திட்டமிட்டு இருப்பதாகவும் சொன்னார்கள். அது தெரியாமல் இவள் அவன் மேல் பைத்தியம் போல் இருக்கின்றாள் எப்படியாவது எங்கள் பெண்ணை மணந்து அவளையும் எங்கள் மானத்தையும் காப்பாற்றுங்கள் என்று சொன்னார்கள். சுஜியின் அண்ணன் என் காலில் விழுந்தான். அது மட்டுமில்லை சுஜியை எனக்கு ரொம்ப பிடித்திருந்தது. அவள் என் வாழ்வின் தேவதை போலவே உணர்கிறேன். அவளுக்காக எதையும் செய்ய காத்திருக்கிறேன். அவள் உள்ளம் மாறி இந்த வாழ்க்கைக்குள் வரும் வரை நான் காத்திருப்பேன். ஆயினும் என் உடல் படுத்தும் பாடு அவளுக்கு தெரியவில்லை. ஒரு முறை அவளை அணுகிய போது நத்தையின் கூட்டுக்குள் ஒடுங்குபவள் போல ஒடுங்கினாள்.

இவள் சரியாவாள் என்று தினம் எதிர்பார்த்து என் மனம் படாதபாடு படுகின்றது. இவள் காதல் விசயம் வீட்டில் தெரிந்தபோதே அம்மா இந்த பெண் வேண்டாம் என்று தானே சொன்னாங்க. அவங்க பேச்சை எல்லாம் மீறி இவளை மணந்தேனே. எப்படியாவது மாத்திடலாம் என்று எவ்வளவு அன்பா இருக்கேன் இவள் மேல். கொஞ்சம் கூட உணரமாட்டேன் என்கிறாளே. அன்புக்கு அடங்காதவர்களும் உண்டா என்று திமிராக இருந்தேன் இப்போது என் வாழ்க்கையே கேள்விகுறி போலாகிவிட்டது. மனநிலை மருத்துவமனைக்கு அழைத்து செல்ல சொல்கின்றார்கள் என் நண்பர்கள். ஆனால் இதை அவளிடம் எப்படி சொல்வது?

நான் அருகில் இருந்தாலே ஏதோ மூன்றாம் மனிதன் இருப்பது போலல்லவா இருக்கிறாள். நான் தூங்கும் வரை தூங்குவதில்லை. அப்படியே தூங்கினாலும் முழுதாக போர்த்திக்கொண்டு போர்வையை இழுத்து இழுத்து விட்டபடி நான் இவ்வளவு பொறுமையாக இருந்தாலும் இவள் நடந்து கொள்ளும் விதம் மிகவும் என்னை காயம் செய்கிறது. மற்றவர்களிடம் நன்றாகவே இருக்கின்றாள். அம்மாவின் மனதை கூட கவர்ந்து விட்டாள். ஆனால் என்னிடம் இன்னும் ஒட்டாமல் இருக்கின்றாளே. அம்மா வேறு என்னடா விசேசமில்லையா என்று கேட்க ஆரம்பித்து விட்டார்கள். என்னுடைய மன உளைச்சலை எப்படி போக்குவது? இன்று என்ன நடந்தாலும் அவளிடம் பேசி எங்களுக்குள்ளான உறவை நல்வழிபடுத்திக் கொள்ள வேண்டும். எவ்வளவு நாள் இப்படியே இருப்பது நானும் மனிதன் தானே.

0

மீண்டும் நான்
--------------------------

அவர் இப்படி நடப்பார் என்று நான் நினைக்கவே இல்லை. என்றுமில்லாமல் குடித்துவிட்டு வந்திருந்தார். மிகவும் மிருகத்தனமாக நடந்து கொண்டார். எனக்கு இதில் உடன்பாடில்லை என்று எத்தனை முறை சொல்வது. அது தான் என்ன செய்வதென்று தெரியவில்லை அவரை அடித்து விட்டேன். நெற்றியில் கொஞ்சம் பலமாகவே அடிபட்டுவிட்டது. எனக்கே தெரியாமல் நான் அப்படி நடந்து கொண்டேன். அவருடைய அம்மா வந்து பார்த்துவிட்டு ஊரை கூட்டிவிட்டார்கள். நான் அவரை கொலை செய்துவிடுவேன் என்று சொல்லியும் இதுவரை என் பிள்ளை பட்ட கஷ்டம் போதும் இவளை உங்கள் வீட்டிலேயே வைத்துக் கொள்ளுங்கள் என்றும் தயவு செய்து விவாகரத்து கொடுத்து விடுங்கள் முடிந்தால் எங்கள் பிள்ளைக்கு வேறு நல்ல வாழ்க்கை அமைத்து தருவோம் என்று சொல்லி என்னுடைய கையெழுத்து வாங்கிக் கொண்டு சென்று விட்டார்கள்.

அதுவும் ஒருவிதத்தில் சரியே என்னை விட நல்ல மனைவி அவருக்கு அமைய வேண்டும். அவர் எவ்வளவு அன்பானவர். என்னுடைய அண்ணன் மேல் இருந்த வெறுப்பின் காரணமாகவே நான் அவரிடம் நல்ல பிரியம் காட்டவில்லை. முகம் கொடுத்து கூட பேசி இருக்க மாட்டேன். இப்போது என் அண்ணன் நன்றாக வருந்துகிறான். தீர விசாரிக்காமல் தவறு செய்து விட்டதாக புலம்புகின்றான் ஆனாலும் இப்போது என்ன செய்ய முடியும் எல்லாம் முடிந்து போன கதை. என் வாழ்க்கை இனி இப்படி தான். மேலே படிக்க வேண்டும் என் லட்சியத்தை நடத்தி காட்ட வேண்டும்.

இரண்டு வருடங்கள் ஓடியதே தெரியவில்லை. என் படிப்பு முடிந்தது. அண்ணன் சேகரை அழைத்து வந்திருந்தான். என்னுடைய விளம்பர நிறுவனத்திற்கான எல்லா உதவியும் செய்வதாக சொன்னான். மேலும் என்னை மணந்து கொள்ள ஆவலாக இருப்பதாக சொன்னான். ஆனால் என்னால் சேகரையும் மணக்க முடியாது. நான் சேகரை காதலிக்கவில்லை. அப்போதும் சரி இப்போதும் சரி. மேலும் மோகனுக்கு பெரும் தவறிழைத்து விட்டதாகவே என் உடல் பொருள் ஆவி முழுதும் சொல்லிக் கொண்டிருக்கின்றது. இந்த நினைவற்று சேகரை மட்டுமல்ல என்னால் யாரையுமே மணக்க முடியாது. இப்படியே போகட்டும் என் வாழ்வு. நல்ல நிறுவனத்தை நிறுவி பலருக்கும் வேலை தந்து வாழ்க்கையை நிறைவாக வாழ முடியும் என்ற நம்பிக்கை எனக்கு இருக்கிறது. ஆண் துணையற்று பெண்ணால் தனித்து வாழ முடியுமென்று நான் காட்டுவேன் இந்த உலகத்திற்கு. சேகரும், மோகனும் என் வாழ்க்கையில் என்னை கடந்த நல்ல நண்பர்கள். ரொம்ப நல்ல மனிதர்கள் அது போதுமெனக்கு.

ந‌ன்றி:ப‌ண்புட‌ன் இணைய‌ இத‌ழ்(ஆக‌ஸ்ட்)

புத்த‌க‌ விம‌ர்ச‌ன‌ப் போட்டி

2010-08-18T19:45:00.000-07:00

அன்பின் அனைவ‌ர்க்கும்,

படிக்கும் அல்ல‌து ப‌டித்து உண‌ர்ந்த‌தை திற‌ம்ப‌ட‌ வெளிப்ப‌டுத்திச் சொல்ல எத்த‌னை பேர் இருக்கிறோம்? ந‌ம்முடைய‌ ஒவ்வொரு க‌ருத்தும் ப‌டைப்பாளிக்கு எத்த‌னைப் பெரிய‌ ஊக்க‌மாக‌ இருக்கும்! எழுதும் ப‌டிக்கும் அனைவ‌ரும் இந்த‌ ஊக்க‌த்தைப் ப‌டைப்பாளிக்குக் கொடுக்க‌ ஏதோ ஒருவித‌த்தில் த‌வறி இருக்கின்றோம். மேலும் ப‌ல‌ ந‌ல்ல‌ எழுத்தாளார்க‌ளை எழுத்தினை தேடித்தேடி ப‌டிக்க‌வில்லை என்றாலும் இதை ப‌டித்து உண‌ர்ந்த‌தை எழுதித் தாருங்க‌ள் என்று யாரேனும் கேட்டால் அத‌ற்கென‌ என் போன்ற‌ சில‌ர் எழுதலாம்.

இவ்வாறாக‌ சிலரின் எழுத்தினை ந‌ம் வ‌ட்ட‌த்தில் ப‌ல‌ருக்கு அறிய‌க் கொடுக்க‌ ந‌ம்மாலான‌ சிறுமுய‌ற்சியை செய்ய‌வேண்டும் என்று ப‌ல‌ நாட்க‌ளாக‌ நினைத்த‌துண்டு. அத‌னை நிறைவேற்றும் வ‌ண்ண‌ம் அந்த‌ர‌வெளி கூகுள் குழும‌ம் அமைந்த‌து. இந்த‌ குழும‌ம் ஒத்த‌ க‌ருத்துள்ள‌ இல‌க்கிய‌ ஆர்வ‌முள்ள‌ அல்ல‌து இல‌க்கிய‌ ஆர்வ‌த்தை வ‌ள‌ர்த்துக்கொள்ள‌ விழையும் சில‌ர் க‌ல‌ந்து உரையாடும் ஒரு சிறு த‌ள‌ம், த‌ன்னுடைய‌ முத‌லாமாண்டு நிறைவினை ஒட்டி புத்த‌க‌ விம‌ர்ச‌ன‌ப் போட்டியொன்றை ந‌ட‌த்த‌லாம் என்று முனைந்திருந்தது.

எழுத்தாள‌ர் சு.வேணு கோபால் அவ‌ர்க‌ளின் ”ஒரு துளி துய‌ர‌ம்” சிறுக‌தைத் தொகுப்பில் எல்லாக் க‌தைக‌ளும் ஏதேனும் ஒரு துய‌ர‌த்தினை சார்ந்து மிக‌ நேர்த்தியான‌ தொகுப்பாக‌ த‌மிழினியால் க‌ட‌ந்த‌ வ‌ருட‌ம் கொண்டு வ‌ர‌ப்பெற்றுள்ள‌து. ஆசிரிய‌ரின் மற்ற ‌ நூல்க‌ளான‌ பூமிக்குள் ஓடுகிற‌து ந‌தி, க‌ள‌வு போகும் புர‌விக‌ள் ம‌ற்றும் திசையெல்லாம் நெருஞ்சி மிக‌ப் ப‌ர‌வ‌லாக‌ப் பேச‌ப்ப‌ட்ட‌ புத்த‌க‌ங்க‌ள். த‌மிழ‌க‌த்தின் த‌லைசிற‌ந்த‌ எழுத்தாள‌ர்க‌ளின் வ‌ரிசையின் சு.வேணுகோபால் அவ‌ர்க‌ளுக்கு முக்கிய‌ இட‌முண்டு. ஒரு துளி துய‌ர‌ம் இந்த‌ சிறுக‌தைத் தொகுப்பு, சிறுக‌தை எழுத‌ அல்ல‌து எழுதும் ஆர்வ‌ம் கொண்ட‌ அனைவ‌ரும் நிச்ச‌ய‌ம் வாசிக்க‌ வேண்டிய‌ புத்த‌க‌ம்.

எனவே அந்தரவெளிகள் குழுமத்தின் முதலாமாண்டு விமர்சனப் போட்டிக்கான புத்தகமாக இந்த ஆண்டு சு.வேணுகோபாலின், “ஒரு துளி துயரம்” எடுத்துக்கொள்ளப்படுகிறது.

விம‌ர்ச‌ன‌த்திற்கான‌ புத்த‌க‌ம் : சு.வேணு கோபாலின் ஒரு துளி துய‌ர‌ம், த‌மிழினி வெளியீடு
நுழைவுக்க‌ட்ட‌ண‌ம் : 50 + த‌பால் செல‌வு.
ப‌திவு தொட‌ங்கும் நாள் : 20.08.2010
ப‌திவின் இறுதி நாள் : 15.09.2010
புத்த‌க‌ விம‌ர்ச‌ன‌ம் வ‌ந்து சேர‌
வேண்டிய‌ க‌டைசி நாள் : 15.11.2010
ந‌டுவ‌ர்கள் :திருவாள‌ர்.பாவ‌ண்ண‌ன், திருவாள‌ர்.ஹ‌ச்.ஜி.ரெஜூல்

இங்கு போட்டியில் கலந்துகொள்பவர்களிடம் முன்பணம் கேட்டு புத்தகம் தருவதற்கான முக்கியக்காரணம்; படைப்பில் வாசிப்பில் மற்றும் போட்டியில் உங்களின் பங்களிப்பும் இருக்க வேண்டும் என்பதனால் மட்டுமே.

தேர்ந்தெடுக்க‌ப்ப‌டும் 15 புத்தக விமர்சனத் திறனாய்வுகளுக்கு ரூ.200 ம‌திப்புள்ள‌ புத்த‌க‌ங்க‌ள் வ‌ழ‌ங்க‌ப்ப‌டும். போட்டியில் க‌ல‌ந்து கொள்ள‌ விருப்ப‌முள்ள‌வ‌ர்க‌ள் நுழைவுக் க‌ட்ட‌ண‌த்தினை செலுத்தி பின்வ‌ரும் ம‌ட‌ல் முக‌வ‌ரிக்கு உங்க‌ள் அஞ்ச‌ல் முக‌வ‌ரியை அனுப்பி உங்க‌ள் பெய‌ரை ப‌திவு செய்து கொள்ளுங்க‌ள்.

uyirodai@gmail.com, senshe.indian@gmail.com, ayyanar.v@gmail.com

க‌ட்ட‌ண‌ம் செலுத்த‌ வேண்டிய‌ க‌ண‌க்கெண் விப‌ர‌ம் பின்வ‌ருமாறு

க‌ண‌க்கெண்:619601075121,
வ‌ங்கி: ஐசிஐசிஐ,
கிளை:திருவ‌ண்ணாம‌லை

த‌பால் செல‌வுக்கான‌ விப‌ர‌ம்
இந்தியாவிற்குள்: ரூ.50
அய‌ல்நாடு: ரூ.250.

சாமானிய‌ள் நான்

2010-08-15T19:52:00.000-07:00

உங்க‌ளை போலில்லை நான்
என் சுமைக‌ளையும்
பாவ‌ங்க‌ளை போல‌
நானே சும‌க்கிறேன்

உங்க‌ளுக்கான‌ சிற‌ப்பு வ‌ழிக‌ள்
எதுவும் என‌க்கில்லை
என் வ‌ழி கூட்ட‌த்தில்
நீந்தியே ந‌க‌ர்கிறேன்

நான் இற‌ங்கிய‌ வ‌ழியில்
குடையேதும் காத்திருப்ப‌தில்லை
ம‌ழையோடு ந‌னைந்தே ந‌ட‌க்கிறேன்

நான் மிக‌ சாதார‌ண‌மான‌வ‌ள்
என்னால் குறைந்த‌ப‌ட்ச‌ம்
உங்க‌ளை ப‌ற்றிய‌ அவ‌தூறுக‌ளை
உங்க‌ளிட‌ம் ம‌ட்டும் ப‌ர‌ப்ப‌ முடியும்

(முன்னாள் க‌விஞ‌ர் த‌ற்கால‌ அர‌சிய‌ல்வாதி ஒருவ‌ருக்கு)

க‌ல்கியில் வெளியான‌ என‌து க‌விதை

2010-08-11T22:59:00.000-07:00

ந‌ன்றி:க‌ல்கி 8.8.2010 இத‌ழ்

ர‌ங்க‌ சேவை

2010-08-09T20:27:00.000-07:00

சுப்புடு என்பதற்குப் பதில் தாத்தாவின் பெயரை முசுடு என்று வைத்திருக்கலாம் என்று நினைத்தாள் ரங்கநந்தினி. கூடிய சீக்கிரம் பிரபல பின்னணிப் பாடகி ஆக வேண்டியவள். ஆனால் இந்த முசுடு தாத்தா என்ன சொல்வார் என்று தெரியவில்லை. சரியான பழம் தாத்தா. ரங்க சேவைக்குப் படிப்பித்த கலை. அதை கொலை செய்யாதே என்று கண்ணீர் வழிய சொல்லும்போது கேட்க எனக்கே கஷ்டமாக இருக்கு. அப்பாவுக்கு நான் சினிமாவில் பாடுவதில் ஆசையே, ஆனால் தாத்தாவின் பேச்சை எதிர்த்துப் பேச முடியாமலும் என்னை என் ஆசைக்கு தடை போட முடியாமலும் ரொம்ப மனம் புழுங்கி இருக்கின்றார்.

ரங்கநந்தினி என்ற பெயரை சுப்புடு இவளுக்கு வைத்த காரணமே, ஆண்டாள் போல இவள் ரங்கப்ரியை ஆக வேண்டும் என்ற எண்ணத்தாலே என்று தாத்தா அடிக்கடி சொல்வார். தவமிருந்து பெற்ற பேத்தியாம். அவர்கள் வம்சத்தில் பெண் குழந்தைகளே கிடையாதாம். இவள் அம்மா பிள்ளையாண்டிருந்த போது தாத்தா ரங்கநாதரை மிகவும் வேண்டி பிறந்த பெண்ணாம். பிறந்ததுமே உன்னுடைய மனம் மகிழ்விற்கு இந்த பெண்ணை சாஸ்திரிய சங்கீதம் படிப்பிக்கிறேன் என்று நேர்ந்திருந்தாராம். இவள் குரல் எடுத்துப் பாடும் கீர்த்தனை அரையர் சேவை அடுத்தபடியாக பிரசத்தி பெற்றது ஸீரங்கத்தில். இவள் பாடும்போது சாட்சாத் ஆண்டாளே பாடுவது போலவும் ர‌ங்க‌ன் மனம் குளர்ந்து போவதாகவும் எப்போதும் கூறிக் கொண்டே இருப்பார்.

அப்படி ஒரு நவராத்திரி சமயம் தாயார் சந்நிதியில் ரங்கநந்தினி பாடும்போது பிரபல சினிமா இசையமைப்பாளர் இவள் மெல்லிய குரலில் கவரப்பட்டு இவர்கள் வீட்டுக்கு வந்து ர‌ங்க‌ந‌ந்தினியை சினிமாவில் பாட வைக்க அனுமதி கேட்டார். ரங்கநந்தினியின் மனம் வசந்தத்தில் ஒரே நாளில் குப்பென்று மலரும் செங்காந்தள் மலர்கள் நிறைந்த மரம் போல மகிழ்வுற்றது. ரங்கநந்தினியின் தந்தைக்கும் மிகவும் மகிழ்ச்சிதான். ஆனால் சுப்புடு "ரங்க சேவைக்குப்" பிறந்த பெண்ணை சினிமாக்கு அனுப்பறதா. அங்கே சங்கீதத்தை சாக்கடையான்னா ஆக்கி வைச்சி இருக்கா" என்று ரொம்ப பிடிவாதமாக மறுத்தார்.

ரங்கநந்தினிக்கு மிகவும் ஆவலாக இருந்த காரணத்தால் ஒரே ஒரு பாடல் மட்டுமாவது பாடி விட்டு வருவதாகவும் தாத்தாவை எப்படியாவது சமாளித்து விடுங்கள் என்று கூறி ஒரு அதிகாலை சென்னைக்குப் பறந்தாள். ர‌ங்க‌நந்தினியின் குரலில் அந்த பாடல் மிக அருமையாக வந்திருந்தது. உச்சதனியில் "ரத்தாத்தா ஹரத்தாத" என்ற ஹமிங் மிக நன்றாக இருந்தது. அந்த ஒரு பாடலிலேயே மிக நல்ல பெயரையும் அடுத்தடுத்த பாடல் வாய்ப்புகளையும் பெற்று இருந்தாள் ரங்கநந்தினி. தாத்தாவின் காலை வருடியபடி மிகவும் நேசத்துடன் அவரிடம் இது போல வாய்ப்பு யாருக்கும் கிடைக்காது என்று சொல்லிப் பார்த்தாள். அவள் முதல் பாடல் அவருக்குத் தெரியாமல் பாடிவிட்டு வந்த கோபமே இன்னும் தீராமல் இருந்தார். ஒரு வாரம் தன் மகன் மற்றும் பேத்தியுடன் பேசாமல் இருந்தார். பின்னர் திருமொழியை அவர் நீண்ட நாளாகக் கேட்டும் பாடி முடிக்காமல் இருந்தவற்றைப் பாடி கீர்த்தனையாக்கி அவர் மனதைச் சமாதானம் செய்த ர‌ங்க‌நந்தினிக்கு அடுத்தடுத்த வாய்ப்புகளுக்கு அவரிடமிருந்து அனுமதி கிடைக்காத காரணத்தால் மிகவும் மனமுடைந்திருந்தாள்.

வீட்டுக்கு வந்திருந்த சுப்புடுவின் நீண்ட நாள் தோழன் சுந்தரமூர்த்தி ரங்கநந்தினியின் பாடல் மிக அருமையாக இருப்பதாகவும் மேலும் ஏன் பாடவில்லை என்றது தான் தாமதம், சுப்புடு படுகோபத்தில் "என் பேத்தி ர‌ங்க‌ சேவைக்கு மட்டுமே பாடுவாள்" என்றார். ரங்கநந்தினியின் கண்களில் கண்ணீர் முட்டிக் கொண்டு வந்தது. நிலைமையை புரிந்துகொண்ட சுந்தரமூர்த்தி சுப்புடுவை தாங்கள் வழக்கமாகச் செல்லும் பூங்காவிற்கு அழைத்துச் சென்று "உன் பேத்தி இப்போதும் ரங்க சேவையே செய்கின்றாள். அவள் சினிமாவில் பாடிய பாடலைக் கேள்" எத்தனை மனத்தை இசையால் மகிழ்விக்கிறாள், அனைவர் மனமும் மகிழ ர‌ங்க‌னுக்கு செய்யும் சேவை பூர்த்தியாகுமல்லவா என்றார். எல்லார் உள்ளும் க‌ண்ண‌ன் தானே இருக்கிறார் என்றார்.

அப்படி ரங்கநந்தினி பாடி புகழ் பெற்றாள், அதனால் அவள் சமீபத்தில் பாடிய திருப்பாவை, திருமொழி மேலும் பல பிரபந்தங்கள் அதிக கவனம் பெரறும் அதுவும் ர‌ங்க‌ சேவை தானே என்றும் கேட்டு விளக்கினார். அந்தக் காலத்தில் மக்களுக்கு நிறைய நேரம் இருந்தது. கோவில் குளமென்று வரம் கச்சேரிகள் கேட்கவும் அப்போது முடிந்த‌து. இப்போதைய வேகமெடுத்த வாழ்க்கையில் இந்தக் காலத்திற்கு ஏற்ற முறையிலேயே இசையை வளர்க்க வேண்டும். பிடிவாதம் பிடித்து ரங்கநந்தினியின் வளர்ச்சிக்கு நீயே தடையாகவே என்றார். அவள் பாடிய முதல் பாடலில் வரும் "ரத்தத்தா ஹரத்தா" ஸ்ருதியைக் கேட்டுப் பார். இசைக்கு இருக்கும் வலிமையை நீ உணர்வாய் என்றார்.

சுப்புடுவுக்கும் சுந்தரமூர்த்தி சொல்வதில் கொஞ்சம் நியாயம் இருப்பதாகவே பட்டது. நாலாயிரம் திவ்யபவிரபந்தத்தை கூடிய சீக்கிரம் உலகமெங்கும் பரப்ப வேண்டும் என்ற வாக்குறுதியுடன் ரங்கநந்தனியைப் பாடுவதற்கு அனுமதி வழங்கினார். மனமெங்கும் மகிழ்ச்சி பொங்க சரியென்றும் ஒரு வருடத்திற்குள் ப்ரபந்தம் பரப்புவேன் என்றும் மகிழ்ச்சி பொங்கக் கூறினாள் ரங்கநந்தினி. பலரைப் பாடி மகிழ்விப்பதும் ரங்க சேவையே என்று அவருக்கு அந்த ரங்கனே சுந்தரமூர்த்தி தாத்தா வடிவில் வந்து உணர்த்தியது போல தோன்றியது. எல்லாமே கண்ணன் செயல் என்று உருகி நாலாயிரம் திவ்வியப்ரபந்தத்தைக் கீர்த்தனையாக்கும் முயற்சியைத் தொடங்கினாள்.

ந‌ன்றி:உயிரோசை

பின்னும் இருக்கிற‌து

2010-07-21T06:43:00.000-07:00

உண்டு க‌ளித்த
உண‌வு மேசை மீது
ரோஜாப் பூவாக‌
ம‌ல‌ர்ந்திருந்த‌து
கை துடைத்தெறிந்த‌
காகித‌ங்க‌ள்

பெரும‌ழை தீர்ந்த‌
பின்பொழுதில்
கண்ணாடியில்
சிறிதும் பெரிதுமாக‌
பூத்திருந்த‌து ம‌ழைத்துளிக‌ள்

க‌ட‌ந்த‌ பின்னும்
மனசோடு இருக்கிற‌து
அசைந்து அசைந்து
மெல்லக் கடந்த
யானையின் ம‌ணியோசை

முடிந்துவிட்ட‌தான
சில‌ விச‌ய‌ங்க‌ள்
விட்டுச் செல்லும் அழ‌கிய‌ல்
பின்னும் உலவுகிறது
ஒவ்வொருவ‌ர் உல‌கிலும்.

நன்றி:தமிழ்தென்றல் குழுமம்.

தமிழ்தென்றல் மின்னிதழ் நடத்திய கவிதைப் போட்டியில் வெற்றி பெற்ற கவிதை.

மலை சாலை கதை

2010-07-13T20:29:00.000-07:00

மலையை துண்டங்களாக
பெருமூச்சோடு
கடத்தும் வாகனத்தில்
இடுக்குகளில்
மழைநீரோடு உருகி
வழிந்து கொண்டிருந்து
இடம் பெயரும் பாறைகள்

ஆலையிட்ட செங்கரும்பாய்
அல்லல்பட உடைந்த
பாறை சிறு கற்களாகி
கருந்தாரோடு பரந்து விரிந்து
சாலையாகி படுத்திருந்து
மலை என்னும்
கம்பீரத்தை விட்டு

தன்னை உதிர்த்து உருவான
சாலை வழி
தன்னை தேடி தனியே
நடந்திருந்தது
மலையின் உயிர்

நன்றி:பயணம் மாத இதழ்

மதராச பட்டினம் – தயிர் விட்ட பழையதும் மாவடுவும்

2010-07-11T21:23:00.000-07:00

படத்தின் டைட்டில் கார்ட் பழைய மதராச பட்டினத்தின் வரைபடத்தின் சில ஊர்களில் எழுதப்பட்டு நேர்த்தியான பிண்ணனி இசையோடு காட்டுகின்ற கணத்திலேயே மிக நல்ல படம் என்ற உணர்வுக்கு இழுத்து சென்றது.

படம் ஒரு இரங்கல் கூட்டத்தோடு (“a wonderful husband” என்கிறார் பாதிரியார் அது எப்படி அய்யா உனக்கு தெரியுமென்று கேட்க தோன்றுகிறது) ஆரம்பித்து பின்னர் எமியின் கண்ணோட்டத்தில் தொடர்கிறது. அவருக்கு தன் உயிருக்கு ஆபத்தென்று தெரிந்ததும் தன்னிடம் இருக்கும் ஒரு தமிழ் பெண்ணின் தாலியை இது என்னுடையது அல்ல இதை உரியவரிடம் சேர்க்க வேண்டுமென்று இந்தியா செல்ல வேண்டுமென்று தன்னுடைய மகளையும் இந்தியன் எம்பசியை இதெல்லாம் இருந்தாதான் இந்தியா போகனுமா என்று தமிழ் வாக்கியத்தாலும் கன்வின்ஸ் செய்து (ஒரு தமிழ் வாக்கியத்திற்கு இந்தியாவுக்கு வர விசா கிடைத்து விடுமா?) தனது தேடுதலை தொடங்கி இந்தியா வருகிறார் எமி.

எமி இந்தியா வந்ததும் தன்னுடைய சக்கர நாற்காலியில் வரும் போதே அந்த காலத்தில் தன்னை வரவேற்ற நிகழ்ச்சியை நினைவு கூர்ந்த வண்ணம் வருகிறார். சென்னையில் டாக்ஸிகாரர் உரிமையோடு அழைக்கும் விதத்திலிருந்து வெளிநாட்டுக்காரர்கள் என்றாலே அவர்களிடம் ஏமாற்றி பணம் பறிக்கலாம் என்ற திட்டதோடு இருக்கும் சென்னைவாசிகள் சிலரையும் கனகச்சிதமாக பொருத்தி இருக்கின்றார்கள். எந்த பாத்திர அமைப்பு இது தேவையற்ற இடைச்சொருகலாக இருக்கின்றதே என்று நினைக்கும்படியில்லை. எல்லா கதாபாத்திரங்களும் ஏதாவது ஒரு விதத்தில் திரைக்கதையோட்டத்திற்கு உதவி இருக்கின்றார்கள்.

எமி தற்கால சென்னையின் மாற்றங்களை நோட்டமிட்டபடி தொடங்கும் பரிதியை தேட தொடங்கும் பயணத்தில் அவரின் பழைய நினைவுகளையும் தற்கால தேடல்களையும் சரிவிகிதமாக சேர்ந்து கொஞ்சம் கூட தொய்வு குறையாத திரைக்கதை அமைத்திருக்கும் இயக்குனருக்கு ஒரு சபாஷ் போடலாம். ஒவ்வொரு இடமாக தேடி ஏமாற்றம் அடையும் எமி கடைசியாக மருத்துவமனையில் காதரை அடையாளம் காணும் போது அப்படா என்ற நிம்மதி நமக்கே பிறக்கிறது. பின்னர் அவரும் இறந்து போனதும் எமியின் தவிப்பு நமக்கும் தொத்திக் கொள்வது அற்புதமான கதையமைப்பு. என்ன தான் ஏமாற்றியும் கறாராகவும் காசு கரந்தாலும் தமிழர்கள் இரக்கமுள்ளவர்கள் என்றும் ஈரமான எந்த உணர்வுக்கும் எந்த தமிழனும் உதவுவான் என்றும் பின்னர் நடக்கும் தேடலில் காட்டி இருப்பது சற்றே ஆறுதலான விசயம்.

இந்த திரைப்படத்தில் நிறைய விசயங்கள் கவித்துவத்துடன் சொல்லப்பட்டிருக்கின்றது. எல்லோரும் நல்லவர்கள் போல் காட்டப்பட்டிருக்கின்றனர். அந்த காலத்தில் மழை கூட தோழமையோடு காட்டப்பட்டிருக்கின்றது. ஏதாவது சண்டை என்றால் கூட “வெயில் இருக்கும் போதே வேலை முடிப்போம் வாங்க” என்ற சமாதானம் போதுமானதாக இருந்திருக்கிறது. விமான சத்தம் குண்டு போடறாங்க ஓடி ஒளிஞ்சிக்கங்கன்னு ஒருவன் சொல்ல அனைவரும் ஓடி மறையும் வெள்ளெந்தியாக இருக்க முடிகிறது, Floating point வாய்ப்பாடு போகிற போக்கில் சொல்லி தர முடிகிறது, ஒரு மல்யுத்தத்தில் ஜெயித்தால் அரசால் ஆக்கிரமிக்க பட இருக்கும் நிலம் மீண்டும் உரியவர்க்கு கைவசமாகும் சாத்தியமிருக்கிறது. (வெள்ளையர்கள் நம் அரசியல்வாதிகளினும் நல்லவர்கள் என்றே நினைக்க தோன்றுகின்றது)

படத்தில் நகைச்சுவை திணிக்கமல் போகிற போக்கில் சொல்லி இருக்கின்றார்கள். அத்திரிபாட்சா கொழுக்கட்டை கதை கணக்கா எமிக்கு நன்றி சொல்ல பரிதியும் அவன் நண்பர்களும் தான்கூ தான்கூ என்று சொல்லிக்கொண்டே வந்து சைக்கிள் பள்ளத்தில் விழுந்தெழுந்ததும் மங்கு மங்கு என்று சொல்லிக் கொண்டே வருவதும் பின்னர் எமியே தாங்யூ பிரேவ் மேன் என்று சொன்னதும் அதான் அதே தான் தாங்யூ என்று சொல்லி முடிப்பது அழகான நகைச்சுவை. கோல்ப் விளையாட்டை கோலி குண்டு விளையாட்டா என்று என்று கேட்கும் மொழிபெயர்பாளாராக வரும் நம்பி அதையே குச்சி வைச்சி தள்ளிவிட்டு விளையாடுவது என்பதும், ஆங்கில எழுத்துகளை தமிழ் எழுத்து போல சொல்லி தர சொல்லி எ, ஏ, பி, பீ, சி, சீ என்று படிப்பது மாசற்ற நகைச்சுவை.

பிண்ணனி இசை குறிப்பிட்டு சொல்லப்பட வேண்டிய ஒன்று, கொஞ்சம் இந்தி பட சாயல்களில் வரும் பிண்ணனி இசையானாலும் இசையும் பாடல்களும் நன்றாக இருக்கின்றன. அதுவும் எமியுடன் பரிதி கற்றுக் கொண்டு வந்து பேசும் நான்கு வாக்கியங்களுக்கு தடுமாறும் போது மறந்துட்டியா என்று எமி முதல் முறையாக தமிழ் பேசும் போதும் அரும்பும் காதலுக்கு பிண்ணனியாக வந்த இசைத்துளிகள் ரம்மியமாக ரசிக்கும்படி இருக்கின்றது. வெள்ளைக்காரி என்பதால் கொஞ்சம் படித்த அறிவாளி மற்றும் கவர்னர் மகள் என்பதால் எளிதாக தானே கற்றுக் கொள்ள ஏதுவான தமிழ் புத்தகங்களை வாங்கி பயில்கிறாள். உங்களிடம் கொடுக்க இந்த தாலி இருக்கே என்று தன் காதலையும் தயக்கமின்றி அவளே தான் சொல்கிறாள்.

அந்த கால கேமிரா, டிராம், கூவம் நதி, பங்கம் கால்வாய், வால்டாக்ஸ் ரோட் மணிக்கூட்டு அந்த கால கார், ரயில் கைவண்டிகள் கட்டங்கள் என்று மொத்தத்தையும் பழைய மதராஸ் பட்டினமென்று காட்ட மிகவும் கடுமையாக உழைத்திருக்கிறார்கள். கலை இயக்குனரை இதற்காக பாராட்டாமல் இருக்கவே முடியாது. உண்மையாகவே சிங்கார சென்னை என்பது பழைய மெட்ராஸ் தான் என்று ஒவ்வொருவரும் உணரும் வண்ணம் செய்து இருக்கின்றார்கள்.

படத்தில் சில விசயங்கள் நெருடாமல் இல்லை. கதை களம் நடந்த வருடம் 1945 முதல் 1947 வரை அந்த காலகட்டத்தின் சுதந்திர போராட்டம் பற்றி தொடும் தொடாத வண்ணம் காட்டி இருப்பது சுதந்திரத்திற்காக இவ்வளவு தான் போராடினார்களா என்று நினைக்க ஏதுவாக இருக்கின்றது. அதே போல் ஆர்யா வெள்ளையர்களை எதிர்ப்பது போல அதற்காக அடிக்க வரும் போது எமி அந்த இடத்தில் இருப்பதை கண்டு விட்டுவிட்டு போவதும் பின்னர் யாரை அடிக்க நினைத்தானோ அவனை அடிக்காமல் இருப்பதும் எதோ விடுப்பட்டது போல இருக்கின்றது. அதே போல ஒரு பத்து இருபது பேர் சென்று ஒரு பிரஸ் மிட் போன்ற இடத்தில் எப்போது சுதந்திரம் தேதியை இப்போதே சொல்லுங்கள் என்று கேட்டதும் கவர்னர் ஜென்ரல் சொல்வது போல காட்டி இருப்பதும் கொஞ்சம் அபத்தமாக இருக்கின்றது. லண்டனில் பிறந்து வளர்ந்திருந்தாலும் வந்த இடத்தில் யார் சம்மதமுமின்றி ஒருத்தியை மணந்து அதே கலாச்சாரத்தை பின்பற்றும் கவர்னரான எமியின் தந்தை இந்திய மனப்பான்மையுடன் உன்னை கொன்றாலும் ஒரு இந்தியனுக்கு மனம் செய்து தர மாட்டேன் என்று சொல்வது ஏற்புடையதாக தோன்றவில்லை. படத்தின் முதல் பாதி கொஞ்சம் மெதுவாக நகர்வது போல இருக்கின்றது அதற்கு இதன் நீளம் காரணமாக இருக்கலாம். மேலும் இடைவெளி முடிந்து வரும் பாடல் ஒன்று மட்டும் கொஞ்சம் இடைச் சொருகல் போல இருக்கின்றது. ஆனால் அவ்வளவு எழிலான மதராச பட்டினம் காட்டிய காரணத்திற்காக இந்த குறை அனைத்தையுமே மறந்து விடலாம்.

படத்தில் குறியீட்டு கவிதை போல பல காட்சிகள் இருக்கின்றன. கோல்ப் மைதானத்திற்காக இடத்தை பிடுங்க வரும் அதிகாரிகளிடம் பேசும் போதும் சரி அதற்காக மனு எழுதும் போதும் மற்ற எந்த விசயங்கள் பேசும் போதும் தூங்கி கொண்டே இருந்த ஒரு கதாபத்திரம் தன் இடத்தை மீட்க பரிதி மல்யுத்தம் புரியும் போது மட்டும் விழுத்து எழுந்து ஆரவாரம் செய்வது, நம் பொதுஜனத்தை குறியுட்டு சொல்லப்பட்ட கதாபத்திரம், அதே போல் நாட்டின் சுந்திரத்திற்கான பேச்சு வார்த்தை நடக்கும் அதே சமயம் எமி தன்னுடைய காதலை வெளிப்படுத்தும் காட்சிகளை மாறி மாறி காட்டி இருப்பதும் ஒரு அழகியல் கவிதை. இந்தியா சுதந்திரம் பெற்ற அதே நாள் கொண்டாங்கள் யாவும் எமியும் பரிதியும் காதலை கொண்டாட நடத்தப்படுவது போன்றே காட்டப்பட்டிருந்தது. சரியாக சுந்திர விடியலில் வெள்ளைக்கார ஐஜியாக வருபவனை கொன்று அவனிடமிருந்து தப்பிப்பதும் ஒரு குறியீட்டு கவிதை போன்றே இருக்கின்றது.

படத்தின் ஆரம்ப இடைப்பட்ட சில காட்சிகள், இசை டைட்டானிக், லாகான் மற்றும் 1942 ஏ லவ் ஸ்டோரி போன்ற படங்களை நினைவுக்கு கொண்டு வந்தாலும் மதராஸ பட்டினம் திரைப்படம் பார்த்துவிட்ட வந்த பொழுதில்
சிங்கார சென்னை உண்மையாகவே சிங்காரமாக இருந்த தினங்களில் வாழ்ந்து விட்ட மனம் நிறைந்த உணர்வு இருந்தது. இதை அப்பட்ட காப்பியடித்தல் என்று சொல்ல வேண்டியது இல்லை. நல்ல படத்திலிருந்து சில நல்ல விசயங்களை எடுத்து நம் காட்சிகளத்திற்கு பயன்படுத்தி கவிதை போன்ற இந்த படத்தை தந்தால் அது மிகவும் வரவேற்க்கபட வேண்டிய விசயமே.

படத்தின் இறுதிகாட்சி முற்றிலும் இருட்டாக ஆக்கப்பட்டு சில வசனங்களில் முடித்திருந்தனர். அப்படி முடிந்த பின் வரும் புகைப்படங்களில் மதராஸ பட்டினத்தின் அழகும் இவை இப்போது மாற்றப்பட்டிருக்கும் விதமும் காட்டி இருப்பது கூட ஒரு அழகியல் செயலாக இருக்கின்றது. படம் முடிந்து விட்டது என்று தெரிந்தாலும் எழுந்து நடந்த எல்லோரும் நின்ற வண்ணமே அத்தனை புகைப்படங்களையும் ரசித்து விட்டு பின்னரே சொல்கின்றார்கள். சென்னையின் அடையாளமாக எத்தனை விசயங்கள் அவற்றில் சென்ரல் மணிக்கூண்டை தவிர எல்லாவற்றையும் இழந்திருக்கிருறோம்.

எமி கூவம் நதிக்கரையை பார்த்து, அதன் பழைய அழகை உணர்ந்தும் பின் தற்சமயம் சிறுவர் தங்கள் காலைக்கடனை அங்கே முடிந்து கொண்டிருப்பதை கண்டு முகம் சுளிப்பார். அந்த சமயம் நிச்சயமாக நம் நெஞ்சை ஏதோ செய்வது போல இருப்பது மிகவும் உண்மை. இன்று கொசுக்களில் உற்பத்தி பண்ணையாக இருக்கும் பங்கிம் கால்வாய் அந்த காலத்தில் அத்தனை எழிலோடு இருந்ததா? 1942களில் அத்தனை எழிலோடு திகழ்ந்த சென்னை மாபட்டினம் இத்தனை எழில் குறைந்து போக நாடாள்வோரை தவிர வேறு யாரும் காரணமாக இருக்க முடியாது. மக்களில் வாழ்வாதாரத்திற்கு சென்னை தவிர வேறு இடமே இல்லை என்று மொத்த தமிழ்நாட்டின் முக்கால் பாகம் சென்னையில் இருந்தால் சிங்காரம் எங்கிருக்கும்? கோடி கோடியாய் கொள்ளையடிக்கும் சிலர் தங்கள் கொள்ளையடித்ததில் கொஞ்சத்தை செலவளித்தாலே சென்னை சிங்காரம் பெறும். யோசிப்பார்களா? மதராஸ பட்டினம் படம் இந்த கேள்வியை என் மனதில் வைத்தது. சென்னை நேசிக்கும் இன்னும் பல கோடி மக்களிடம் இதே எண்ணத்தையே விதைக்கும்.

அமில‌ம் தோய்தெரிந்த‌‌ நினைவுக‌ள்

2010-07-11T04:16:00.000-07:00

ப‌க‌ல்கொள்ளைகார‌னிட‌ம்
காட் பிர‌மிஸ் கேட்கும்
சிறுமியின் அறியாமையோடு
தானிருந்த‌து என்
சகோத‌ர‌த்துவ‌ம் உன்னுட‌ன்

மெல்ல அதிர்ந்தேன்
முன்பொருமுறை
மேலும் அதிர்ந்தேன்
ப‌ல‌முறை சில‌முறை

இன்று தான் புரிகின்ற‌து
நான் என்றுமே அதிர‌வில்லை
இது தெரியும் வ‌ரை
போக‌ட்டும்

உண்மையும் பிரிய‌மும்
எங்கானும் ஒரு ஓர‌த்தில்
ஒளிந்திருக்கிற‌தா
தேடிப்பார்கிறேன்

பையெங்கும்
அமில‌ம் தோய்த்த‌த்
தெரிந்த‌ அம்பென‌
கையெங்கும் மிஞ்சிய‌து
நினைவுக‌ள்

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி VII

2010-07-04T21:14:00.000-07:00

ஐந்திணை எழுப‌து (அறுப‌தாம் பாட‌ல்) - உண‌ர்வுநிலை உற‌க்க‌ம் ம‌றுக்கும் த‌னிமை

மணி நிற நெய்தல் இருங் கழிச் சேர்ப்பன்
அணி நலம் உண்டு அகன்றான்; என்கொல், எம்போல்
தணி மணல் எக்கர்மேல் ஓதம் பெயர,
துணி முந்நீர் துஞ்சாதது?

வெண்ணிற‌ முத்துக‌ள் ம‌ல‌ர் போல‌ ம‌ல‌ர்ந்து காண‌ப்ப‌டும் உப்ப‌ங்க‌ழிக‌ளை கொண்ட‌ நெய்த‌ல் நில‌ த‌லைவ‌ன் த‌ன்னுடைய‌ சிற‌ப்பான‌ ந‌ல‌ம் க‌ருதி என்னை விட்டு நீங்கி விட்டான் என்னை போல‌வே த‌ணியாது த‌னிமையில் கிட‌ந்து வாடும் ம‌ண‌ல்க‌ளை நினைத்து க‌ட‌ல் உற‌ங்க‌வில்லை போலும்.

என்ன‌ சொல்ல‌ இப்ப‌டி வாடும் ச‌ங்க‌த‌லைவியை? க‌ட‌லென்றும் அமைதியாக‌ இருக்க‌ இய‌லுமா? ம‌ண‌ல் தான் த‌னிமையில் வாடுமா? த‌ன்னுடைய‌ த‌லைவ‌ன் நீங்கிவிட்ட‌ ம‌ன‌வ‌லியை த‌ன்னை விடாது பிராண்டி எடுக்கும் த‌னிமையை உற‌ங்க‌ முடியாது ஊர‌ட‌ங்கிய‌ வேலை த‌ன்னால் கேட்க‌ முடிந்த‌ க‌ட‌லின் அலையோசையை, ப‌கலில் சூரிய‌ ஒளியில் ஜொலிக்கும் ம‌ண‌ல் துக‌ள்க‌ளை இர‌வில் நினைத்த‌ ப‌டி க‌ட‌லும் தன்னை போல் உற‌ங்காம‌ல் இருப்ப‌து போல‌வும் நினைத்து த‌ன்னுடைய‌ த‌னிமையை ம‌ன‌வ‌லியை அவை யாவையும் காட்டி பாடி இருக்கின்றார்.

ஒளிய‌றியாக் காட்டுக்குள் தொகுதியில் தேன்மொழி தாஸ் ஆலியோடு தூங்கும் த‌னிமை என்ற‌ க‌விதையில் இதே உண‌ர்வை மிக‌ நெகிழ்வாக‌ உண‌ர்த்தியுள்ளார். அவ‌ரால் உண‌ர‌ப்ப‌ட்ட‌ த‌னிமை த‌ன் வீட்டு சாயுங்கால‌ம் த‌ன் வீட்டு வாச‌லேறி வ‌ருதாக‌ தொட‌ங்கும் இந்த‌ க‌விதையில் த‌னிமை தான் செய்யும் அனைத்தையும் க‌வ‌னிப்ப‌து போல‌வும் அது உற‌ங்க‌ பிரிய‌ப்ப‌டுவ‌து போல‌வும் பின்னும் உற‌ங்காம‌ல் த‌விப்பதாக‌வும் எழுதி இருக்கின்றார். த‌னிமையையே ப‌டிம‌ம் போல காட்டி இருக்கும் இச்சித்திர‌ம் வித்தியாச‌மான‌. மொழுகு வெப்பதால் உருகுவ‌தை க‌ருந்துருகுவ‌தாக‌ சொல்லும் இவ‌ர் காட்சியிலு காணும் பொருட்க‌ள் எல்லாம் த‌ன்னை போல‌ வ‌ருந்துவ‌தாக‌ சொல்லி இருக்கின்றார் மேல் சொன்ன‌ ச‌ங்க‌ க‌விஞ‌ர் போல‌வே. த‌ன் வீட்டுக்கு வ‌ந்த‌ த‌னிமை

மெழுகுத்திரி வெளிச்ச‌த்தின‌டியில்
க‌ருமையாக‌ தேங்கி இருக்கின்ற‌து

என்கின்றார். மேலும் அது என்ன‌ன்ன செய்கிற‌து என்றெல்லாம் சொல்லிவிட்டு

அத‌ற்கு பிற‌கும் பார்த்துக் கொண்டிருக்கின்றேன்
த‌னிமை என் வீட்டுக்குள்
இட‌ம்மாறி இட‌ம்மாறிப்
ப‌டுத்துற‌ங்குவ‌தை

இதே ச‌ங்க‌க‌விதையில் த‌லைவியுண‌ரும் வ‌லியை ஒத்த‌தொரு வ‌லியை ஒரு அவ‌மான‌த்தின் பெய‌ரில் உண‌ர்ந்துவிட்டு பின் தான் உற‌க்காம‌ல், த‌ன்னை போல‌வே விழித்திருக்கும் ஆந்தை த‌ன‌க்கு வேறு எதையோ நினைவூட்டுவ‌தாக‌ ச‌ல்வாவும் த‌ன்னுடைய‌ ப‌ச்சை தேவ‌தை தொகுப்பில் த‌னித்தொரு பொழுது என்ற‌ க‌விதையில் சொல்லி இருக்கின்றார்.

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி VI

தொட‌ரும்...

இழந்த பிரியம்

2010-07-03T04:52:00.000-07:00

க‌ட‌லின் உவ‌ப்பும்
க‌ங்கையின் புனித‌மும்
க‌ல‌ந்த‌ பிரிய‌ங்க‌ள்
சூழ்ந்த‌ ம‌ழைமேக‌மென்று
உன் வாச‌ல் வ‌ந்த‌டைந்த‌து

பிரிய‌ப் பார்வை கிட்டாத‌
ஏக்க‌த்தோடு
மழையாய்‌
இற‌ங்கின‌ மேக‌ங்க‌ள்

இறுக‌ மூடிய‌ ச‌ன்ன‌ல்க‌ளை
த‌ய‌ங்கி தொட்டு விர‌வி
திரையென‌ வ‌ழி‌ந்த‌து
பிரிய‌த்தின் ம‌ழைத்துளிக‌ள்

த‌விப்பும் ப‌ட‌ப‌ட‌ப்பும்
கூடிய‌ நீர்த்துளிகள்
வாச‌ல் க‌த‌வு வந்து
வ‌ண‌ங்கிய திருப்தியோடு

விரைந்தோடி
சாக்க‌டைக் க‌ழிவோடு
க‌ல‌ந்தது பிரியங்கள்
ததும்ப ததும்ப

துளித்துளியாய் தொலையும் வெறுப்பு

2010-07-01T08:38:00.000-07:00

பாலைவ‌ன‌மெங்கும்
தேடிக் கிடைக்காத‌
க‌டுங்கான‌ல்க‌ளை
தொடுத்த ச‌ர‌மென‌
நீண்டிருந்த‌ மௌன‌ம்
இருள் வில‌க்க‌
மென்னொளித்திருந்த‌
மெழுகுவ‌ர்த்தியாய்
வெறுப்பை துளித்துளியாய்
உதிர்த்திருந்த‌து

எடுக்க‌வும் கோர்க்க‌வுமியாலாத‌
துரிய‌னின் ம‌னைவி
இடை மேக‌லை ம‌ணிக‌ளாக‌
ஏக்க‌ங்க‌ள் உருண்டோட
த‌னித்து‌ த‌வ‌மிருந்தது நிமிட‌ங்க‌ள்
கை சொடுக்க‌ காத்திருந்த‌
வார்த்தைக‌ள் எல்லாம் கொட்டி
க‌ம‌ழ்ந்திருந்த‌து க‌விதையாக‌.

நன்றி:பண்புடன் ஜூலை இதழ்

ஏன் அண‌ங்குற்ற‌னை?

2010-06-29T23:41:00.001-07:00

ம‌ல்லிகைக்கும் என‌க்கும் மிக‌ அழ‌கான‌ பொருத்த‌முண்டு. சில‌ நிக‌ழ்வுக‌ள் வாழ்வில் ம‌ல்லிகையோடு பிணைத்து க‌ட்டி என்னை இழுத்து சென்ற வ‌ண்ண‌மிருக்கிற‌து. ஓரிரு மாத‌ங்க‌ளுக்கு முன் என் உற‌வின‌ர் இல்ல‌ திரும‌ண‌த்தில் எதிர்பார்த்த‌ அள‌வு ம‌ரியாதை கிடைக்காம‌ல் நான் சற்றே அண‌ங்குற்றிருந்த‌(துன்ப‌முற்றிருந்த‌) நேர‌ம். உற‌வின‌ர் வீட்டிக்கு செல்லும் முன்ன‌மே என் த‌லையில் கொஞ்ச‌ம் ம‌ல்லிகை இருந்த‌து. உற‌வுப் பெண் என‌க்கு இறுவாச்சி ம‌ல்லிகைச்ச‌ர‌ம் கொடுத்து உப‌ச‌ரித்தாள். நான் வேண்டாமென்றேன். இறுவாச்சி ம‌ல்லிகை திருச்சிக்கார‌ர் அனைவ‌ர்க்கும் பிடிக்கும் என்னை தவிர‌. இறுவாச்சி பார்க்க‌ குண‌மாக‌ இருக்காது(க‌ர‌டுமுர‌டாக‌ இருக்கும்) ஆனால் குண்டு ம‌ல்லியை விட‌ ரொம்ப‌ செரிவாக‌ ம‌ண‌க்கும். அதுவும் அந்த‌ பெண் கொடுத்த‌ ச‌ர‌ம் ஏக்கு மாக்காக‌ தொடுக்கப்பட்‌டிருந்த‌து. பார்க்க‌ நேர்த்தியாக‌ கூட‌ இல்லை. வேண்டாமென்றேன். நான் கொஞ்ச‌ம் துய‌ர‌மாக‌ இருந்த‌து என் அக்காவிற்கு ம‌ட்டும் தெரியும். அத‌ன் கார‌ண‌மாக‌ ம‌றுக்கிறேன் என்றும் என்னை த‌வ‌றாக‌ நினைப்பார்க‌ள் என்றும் வ‌ற்புறுத்த‌ என்று அதையும் வைத்துக் கொண்டேன். ஆனால் ம‌தியாதார் வாச‌லென்றால் ம‌ல்லிகைச்ச‌ர‌ம் கூட‌ அண‌ங்குற‌ செய்யும் போலும்.

எங்க‌ள் வீட்டுத் தோட்ட‌த்தில் மூன்று ம‌ல்லிகைப்புத‌ர்க‌ள் இருக்கின்ற‌ன‌. அனைத்தும் அடுக்கு குண்டு ம‌ல்லிகை ம‌ல‌ர்க‌ளை அள்ளி அள்ளி த‌ருப‌வை. ஒவ்வொன்றும் சின்ன‌ ரோஜாப்பூ போல‌ இருக்கும். இங்கே டெல்லி வாழ் ம‌க்க‌ள் யாருமே ம‌ல்லிகை ம‌ல‌ர்க‌ளை தொடுத்து த‌ங்க‌ள் த‌லையில் சூடுவ‌தில்லை. அவ‌ர்க‌ள் வீட்டில் எத‌ற்கு ம‌ல்லிகை ம‌ர‌ங்க‌ளை வ‌ள‌ர்க்கின்றார்க‌ள் என்றே தெரியாது. கேட்பார் எவ‌ருமின்றி அவையும் தாம் பாட்டுக்கு ம‌ல‌ர்ந்து ம‌ண‌ம் வீசி ம‌ண்ணில் வீழும். இந்த‌ கார‌ண‌த்தினால் டெல்லியின் ம‌ல்லிகைக‌ள் எல்லாமே அண‌ங்குற்ற‌து போலும். இந்த‌ வ‌ருட‌ம் ம‌ல‌ரும் எந்த‌ மல்லிகை ம‌ல‌ரிலும் அந்த‌ அள‌விற்கு ம‌ண‌மில்லை.(வெப்பம் மிக அதிகரித்திருப்பது காரணமாக இருக்கலாம்). திருச்சியில் அம்மா ம‌ல்லிகை பூவை இர‌வு குளிரூட்டியில் சேமிக்க‌ வேண்டுமென்றால் வாச‌ம் வெளியேறாம‌ல் இருக்க பிர‌த்தியோக‌ க‌வ‌ன‌மெடுத்து சேமிப்பார்க‌ள். க‌வ‌ன‌ம் குறைந்தால் ம‌றுநாள் காப்பி, இட்லி எல்லாமே ம‌ல்லிகை பூவாச‌த்தோடே ப‌றிமாற‌ப்ப‌டும். டெல்லியின் ம‌ல்லிகைக‌ள் எப்போதும் அந்த‌ அள‌வு ம‌ண‌க்காதென்றாலும் இந்த‌ வ‌ருட‌ம் மெல்ல‌ முன‌கிய‌ப‌டி ம‌ண‌ப்பதாக,‌ ஏன் அண‌ங்குற்ற‌னை ம‌ல்லிகையே என்று கேட்டு வ‌ருந்தும்ப‌டியே இருக்கின்ற‌து.

குறிப்பு:அண‌ங்குற்ற‌னை என்ப‌து "யார் அண‌ங்குற்ற‌னை க‌ட‌லே" என்றும் குறுந்தொகையிலும் "இவ‌ள‌ ண‌ங்குற்ற‌னை போறி" என்று ஐங்குறுநூற்றிலும் சொல்ல‌ப்ப‌ட்ட‌ வார்த்தை. அந்த‌ வார்த்தையால் க‌வ‌ர‌ப்ப‌ட்டு எழுதிய‌ ப‌திவிது. யார் கார‌ண‌மாக‌ இவ்வ‌ள‌வு "துய‌ர‌மாக‌" ஓயாது அலைபாய்ந்து கொண்டிருக்கின்றாய் என்று குறுந்தொகையில் த‌லைவி க‌ட‌லை நோக்கி கேட்ப‌து போல‌வும், ஐங்குறுநூற்றில் த‌ன் ம‌னை விடுத்து பிற‌ரிட‌ம் போன‌ த‌லைம‌க‌னிட‌ம் த‌லைவியின் தோழி நீ யாரிட‌ம் த‌ற்ச‌மய‌ம் யார் மேல் மைய‌ல் கொண்டாயோ அவ‌ளை விட்டு நீ நீங்கி சென்றாள் தலைவியை போல் அல்லாது அவ‌ள் "துன்புற்ற‌வ‌ள்" போல பாசாங்கு ம‌ட்டுமே செய்வாள் என்று எடுத்துரைப்ப‌து போல‌வும் அமைந்த‌ பாட‌ல்க‌ள் அவை.

புறா போல‌ர‌ற்றும் வாழ்வு

2010-06-27T19:42:00.000-07:00

நெடுந்தொலைவில்
ஒற்றை க‌முகென‌
வ‌றண்டு வ‌ள‌ர்ந்திருந்த‌து
உன் பிரிய‌ம்

குடுவைக்குள் க‌டித‌மென‌
அடைக்க‌ப்ப‌ட்டு
ஆழ்க‌ட‌லின் அடியில்
அலைந்திருந்த‌து
என் பிரிய‌ம்

துரித‌ ப‌ய‌ண‌த்தை
எதிர்த்திருக்கும்
காற்றின் வெளியெங்கும்
காக‌ங்க‌ள் ப‌ற‌ந்து ப‌ற‌ந்து
தேடிக் கொண்டிருக்க‌லாம்
அப்பிரிய‌ங்க‌ளை

இருந்தாலும்
கோவில் புறாவென‌
த‌ன‌க்கு தானே
அர‌ற்றிக் கொண்டிருந்த‌ன‌
ந‌ம் வாழ்க்கை

துய‌ர‌த்தின் ம‌ர‌ம்

2010-06-23T01:27:00.000-07:00

பாறையெனச்
சமைந்திருந்தது
வெட்ட‌ப்ப‌ட்ட‌ ம‌ர‌மொன்று

வான் நோக்கி
கிளைத்திருந்த‌ ம‌ர‌த்தில்
ப‌ற‌வைக‌ளும் இருந்த‌ன‌
ஒரு ச‌ம‌யம்

வேருக்குத் தெரிய‌வில்லை
வெட்ட‌ப்ப‌ட்ட‌ ம‌ர‌த்தின் வ‌லி
விடாது தேடிய‌து
த‌ன‌க்கான‌ நீர்மையை

விருப்ப‌த்தின் சிறுத‌ளிர்க‌ள்
துளிர்க்க‌லாம் நாளையோ
ம‌ற்றுமொரு நாளோ

ஆனால் ப‌ற்றிக் கொள்ள
போதுமான‌தா அது
பறவைகளுக்கு.

ராவ‌ண‌ன் : ந‌வீன‌ கோப்பையில் புராண‌ கஞ்சி

2010-06-21T21:58:00.000-07:00

புராண‌ங்க‌ளில் என்னைக் க‌வ‌ர்ந்த‌ இரண்டு பாத்திர‌ங்க‌ள் ராவ‌ண‌ன் ம‌ற்றும் க‌ர்ண‌ன். பிற‌ன்ம‌னை நோக்காத‌வ‌ன் ம‌ட்டும‌ல்ல‌ பிற‌ பெண்டிர் த‌ம்மிட‌த்தே இருப்பினும் அவ‌ர்த‌ம் ச‌ம்ம‌த‌மின்றி விர‌ல் கூட‌ ப‌டாம‌ல் வைத்திருத்த‌ல்தாம் உண்மையான‌ பேராண்மை என்ப‌து. ராவ‌ண‌னை ப‌த்து த‌லை கொண்ட‌வ‌ன் என்ற‌ ஒரே கார‌ண‌த்திற்காக‌ அர‌க்க‌ன் என்ப‌து என‌க்கும் எப்போதும் ஏற்புடைய‌து அல்ல‌. சீதையை அவ‌ன் க‌ட‌த்திய‌தும் கூட‌ த‌ன் த‌ங்கையை அர‌க்கி என்ற‌ கார‌ண‌த்தால் ஒரு தெய்வ‌ நிலைக்கு அருகில் இருந்த‌ ஒருவ‌ன் இய‌ற்கையான‌ அவ‌ள் விளைவை அழ‌காக‌ ம‌றுக்காம‌ல் அவ‌ள் மூக்கினை அறுத்த‌ ஒரே கார‌ண‌த்திற்கே என்றே தோன்றும். சீதை மேல் காத‌ல் என்ப‌து ர‌ச‌ம் சேர்க்க‌ பின்ன‌ர் புனைய‌ப்ப‌ட்ட‌தாக‌ இருக்க‌க் கூடும்.

வெகு நாட்க‌ளாக‌ ஆவலோடு எதிர்பார்ப்புகளை ஏற்படுத்தி வெளிவ‌ந்த‌ ‘ராவ‌ண‌ன்‘ ராமாய‌ண‌த்தை ஒட்டி எடுக்க‌ப்ப‌ட்ட‌து என்ப‌து எல்லா தரப்பினராலும் வெளிப்படையாக பேசப்பட்டதுதான்.ஆயினும் இந்த‌ அட்டை காப்பியை சொதப்பி எடுப்பார் என்பது ம‌ணிர‌த்தின‌த்திட‌ம் இருந்து நாம் எதிர்பார்க்காத‌து. என்னதான் நவீன கோப்பையில் வ‌ழ‌ங்கி இருந்தாலும் சீதையின் மேல் ராவ‌ண‌ன் சுண்டு விர‌ல் கூட‌ ப‌ட‌வில்லை ப‌ட‌த்தில் (‘U‘ சான்றிதழ் ப‌ட‌ம் பார்க்க‌ற‌துன்னா சும்மாவா?) கொஞ்ச‌ம் நெருட‌ல்க‌ளில் ஒன்று சூர்ப்ப‌னகையை மூக்க‌றுக்க‌த‌ற்கு ப‌தில் கூட்டு சேர்ந்து க‌ற்ப‌ழித்திருக்கின்றார்க‌ள்.

‘ஏன் ம‌ணி சார், ஒரு பெண்ணை விசாரிக்க‌ கூட்டுட்டு போனா, அவ‌ங்க‌ளை காவ‌ல்நிலைய‌த்தில் இர‌வு தங்க வைக்க‌ கூடாது, அப்ப‌டியே இருந்தாலும் பெண் காவலர் கூட‌வே இருக்க‌ வேண்டும் என்ப‌து கூடவா உங்க‌ளுக்கு தெரியாது?‘

அதென்ன‌ காவ‌ல்துறையை சார்ந்த‌வ‌ர்க‌ள் எல்லோருமே ஈவு இர‌க்க‌ம‌ற்ற‌வ‌ர்க‌ளா...

சமாதான‌ம் பேச‌ வ‌ந்த‌வ‌ரைக்கூட‌ சுட்டுக் கொல்வாங்களா என்ன‌? த‌ன்னுடைய‌ காத‌ல் ம‌னைவியானாலும் எதிரியை கொல்ல இல்லாத‌தும் பொல்லாத‌தும் சொல்வாங்க‌ளா என்ன‌? என்ன‌வோ போங்க‌...

சுஹாசினி வ‌ச‌னம் ப‌ல‌ இட‌த்தில் ந‌ன்றாக‌ இருந்த‌து.

"ஏழு பொருத்த‌ம் பார்த்தாங்க‌ கைக்கால் வழ‌வ‌ழ‌ப்பா இருக்கான்னு பாத்தாங்க‌ளா?"

"என்னை கோப‌த்தோடே வைத்திரு இவ‌ங்க‌ பிரிய‌ம் என்னை ப‌ல‌வீன‌ப‌டுத்தாமா பார்த்துக்கோ"

இது போல‌ இன்னும் ப‌ல‌ இட‌ம். ஆனா சுஹாசினி "பொம்ப‌ளை பின்னால‌ ஒளிஞ்சி த‌ப்பிச்சிட்டானா" என்ற வசனடம் கேவலமாக இருந்தது. மிக‌வும் வ‌ருத்த‌ப‌ட‌வைத்த‌ வ‌ச‌ன‌மிது. ப‌ல‌ இட‌த்தின் நீண்ட‌ வ‌ச‌ன‌ம்... இதுவ‌ரை ம‌ணிரத்னம் ப‌ட‌த்தில் இதுவ‌ரை இல்லாத‌து. சில‌ இட‌த்தில் கொஞ்ச‌ம் ச‌லிப்பா கூட‌ இருந்த‌து. அடுத்த‌ ப‌ட‌த்தில் க‌வ‌ன‌ம் செலுத்துவீங்க‌ன்னு நினைக்கிறேன். உங்க‌ள் ப‌ட‌ப‌ட‌ பேச்சை ஹாசினி பேசும் ப‌ட‌த்தில் ர‌சிப்ப‌தை போல‌ இங்கே “ப‌க்..ப‌க்.. டாண்டன‌... டாண்ட‌ன‌... இந்த‌ வச‌ன‌ங்க‌ளை ர‌சிக்க‌ முடிய‌வில்லை. படத்திற்கு கதை என்று யார் பெயரையும் போடாமல் விட்டு விட்டது ஒரு ஆறுதலான விஷயம்.

ரொம்ப‌வே ஒட்டாம‌ல் இருந்த‌ விட‌ய‌ம் தேவ் (வாசுதேவ்??) க‌தாப‌த்திர‌மாக‌ வ‌ந்த‌ பிருத்விராஜ். மீசையில்லாம‌ல் கிட்ட‌த்த‌ட்ட‌ அர‌வாணி போல் தோன்ற‌ம‌ளிக்கிறார். உய‌ர் காவ‌ல் அதிகாரியாக‌ மென‌க்கெடும் மிடுக்கும் கொஞ்ச‌ம் கூட‌ பொருந்த‌வில்லை. அது ச‌ரி... ப்ரியாம‌ணியின் க‌ண‌வ‌னாக‌ வ‌ருப‌வ‌னிட‌மும் ஏன் அந்த‌ அள‌வு கொடூர‌மாக‌ ந‌ட‌ந்து கொள்ள‌ வேண்டும். அவ‌ருக்கு தெரியாத‌ அவ‌னுக்கு அந்த‌ கூட்ட‌த்திற்கும் எந்த‌ ச‌ம்ம‌ந்த‌மும் இல்லை என்று. ச‌ர்க்க‌ரையை ஏன் கொல்ல‌ணும்? வெண்ணிலாவுக்கு ந‌ட‌ந்த‌ விச‌ய‌ம் தேவ் அவ‌ர்க‌ள் கவனத்திற்கு வ‌ராம‌லா இருந்திருக்கும். பின் அதுக்கு ஏன் எந்த‌ ந‌ட‌வ‌டிக்கையும் எடுக்க‌லை. ப‌ட‌த்தில் கேட்க‌ப்ப‌டும் “உங்க‌ பொண்ணு என்றால் ம‌ர‌க‌த‌ம்... எங்க‌ பொண்ணுன்னா“ என்ற‌ கேள்வி என‌க்கு கேட்க‌ தோன்றிய‌து. இதுபோல படத்தில் நிறைய கேள்விகள் எழுகின்றது. கொஞ்சமும் லாஜிக் இல்லாத கதையமைப்பு, காட்சிகள் சலிப்பூட்டுகின்றன.

சில‌ காட்சிக‌ளை வ‌ச‌ன‌மின்றி சொல்லி இருக்க‌லாம். உதார‌ண‌த்துக்கு, வெண்ணிலா த‌ன் அண்ணிட‌ம் த‌ன‌க்கு ந‌ட‌ந்த‌தை சொல்கிற இடம். ஆனா சில‌ காட்சிக‌ளை காட்சிப‌டுத்தி இருந்த‌ வித‌ம் அழ‌கா இருந்த‌து. நிறைய‌ இய‌ற்கை எழில், ம‌ழை அந்த‌ பெரிய‌ விஷ்ணு சிலை இருக்குமிட‌த்தில் வ‌ரும் க‌விதை போன்ற‌ காட்சி இப்ப‌டி ப‌ல‌.

ஆனால் க‌டைசிவ‌ரை ராவ‌ண‌ன் த‌ன் ஆசையை சொல்லி கிட்டே இருக்கான், ராகினி த‌ன்னுடைய‌ க‌ண‌வ‌ன் மேல் இருக்கும் காத‌லை விடாம‌ல் இருக்கா. அவ‌ரை விட்டுங்க‌ நான் இங்கேயே இருக்கேன் என்று சொல்லும் இட‌த்தில் கூட‌ க‌ண‌வ‌ன் மேல் காத‌ல் கொண்ட‌வளாக‌வே இருக்கா ராகினி.

ச‌ரி... இந்த‌ க‌ண்ண‌கி முன்னே “இப்ப‌டி இருக்க‌றவ‌ங்க‌ளை சுட்டுக் கொல்ல‌ தானே உங்க‌ளுக்கு துப்பாக்கி கொடுத்திருக்காங்க‌ன்“னு சொன்ன‌வ‌ “தேவ் த‌ப்பாபில்லாம‌ சுட்டு இருக்க‌மாட்டாரு“ என்று முர‌ண்ப‌டும் அதே அவ‌ங்க‌ த‌ன்னை கொல்ல‌ வ‌ரும் நேர‌த்தில் கூட‌ “என்னை கொல்ல‌ நீ யாருன்னு“ கேட்கும் புர‌ட்சி பெண், த‌ன்னை ச‌ந்தேகித்த‌ க‌ண‌வ‌னுக்கு எதுவுமே சொல்லாம‌ல் அந்த‌ர‌த்தில் தொங்கிய‌ப‌டி முடிக்க‌ப்ப‌டிருக்கும் அவ‌ள் கதாபாத்திர‌ம் இன்னும் என்னுள் பேசிய‌ப‌டி இருக்கிற‌து. இதைதானே ம‌ணிரத்னம் நீங்க எதிர்பார்த்தீங்க‌.

எதிர்ம‌றை க‌தாநாய‌க‌ர்க‌ள் மிக‌ ந‌ல்ல‌வ‌ர்க‌ள் என்று காட்சிப்ப‌டுத்தும் ப‌ல‌ ப‌ட‌ங்க‌ளை நிஜ‌க்க‌தைக‌ளை கேட்டும் பார்த்தும் இருந்த‌ கார‌ண‌த்தால் ராவ‌ண‌ன் மேல் இர‌க்க‌ம் வ‌ந்தாலும் மணிரத்னம் மேல் பெரும் ஏமாற்ற‌ம் வ‌ந்த‌தே மிக‌வும் உண்மை.

பெட்ட‌ர் ல‌க் நெஸ்ட் டைம் ம‌ணிர‌த்ன‌ம் & சுஹாசினி.

வார்த்தைக்கு அட‌ங்காத‌ வார்த்தைக‌ள்

2010-06-17T22:27:00.000-07:00

ஏக்க‌ச் சார‌ல் அடித்து
போட்ட‌ உட‌ல்
வ‌டித்த‌ வார்த்தைக‌ளை
வார்த்தைக‌ளாலான‌ பெட்ட‌க‌த்தில்
அட‌க்கி ப‌துக்க‌ க‌டும் ப‌யி‌ற்சி
செய்து வைத்தேன்

பெட்ட‌க‌ம் தீண்டிய‌ வார்த்தைக‌ள்
ச‌ற்றைக்கெல்லாம்
ஏறு வ‌ந்து இற‌ங்கிய‌து போல‌
ஆடி தீர்த்த‌ன‌ த‌ன‌க்கான‌
ந‌ர்த்த‌ன‌த்தை
பெட்ட‌க‌ம் அதிர்ந்த‌து
பெருகி வ‌ழிந்த‌ன‌
வார்த்தைக‌ள்

அம்மா சொல்லுவாங்க‌
"சொல்லி கொடுத்த‌
சொல்லும் க‌ட்டி
குடுத்த‌ சோறும்
எத்த‌னை நாளைக்கு"

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி VI

2010-06-15T20:32:00.000-07:00

குறுந்தொகை (பாடல் 6) உண‌ர்வுநிலை வ‌ருத்த‌மும் கூற‌ல் இயலாமையும் ஏக்க‌மும் எதிர்நோக்க‌லும்

கழனி மாஅத்து விளைந்துகு தீங்கனி
பழன வாளை கதூஉம் ஊரன்
எம்மில் பெருமொழி கூறித் தம்மில்
ஆடிப் பாவை போல
மேவன செய்யும்தன் புதல்வன் தாய்க்கே

இந்தப் பாடல் ஒரு பரத்தை கூறுவது போல இருக்கின்றது. என் தலைவன் மகனின் தாய் அவனை வீட்டில் கண்ணாடி பிம்பம் எப்படி தன் முன் நின்பவரின் ஆட்டத்தை அப்படியே பிரதிபலிக்குமோ அப்படியே ஆட்டி வைப்பவளாம். என் தலைவன் அப்படிப்பட்ட இடத்திலிருந்து அவன் தானே வந்தான். மாமரத்தில் முதிர்ந்து உதிர்ந்த கனியானது வயலில் இருக்கும் வாளை மீன்கள் கவ்வி செல்வது போல தான் இதுவும் இதிலென்ன தவறு என்கிறாள்.

இந்த பாடலில் ஆடிப்பாவை என்பது தான் சிறப்பான திருப்புமுனையான வார்த்தை. ஆடிப்பாவை என்பது நிலைக்கண்ணாடியை படிமமாக கொண்ட விசயம். நிலைக்கண்ணாடி என்பது நம்மை மறைக்காமல் பிரதிபலிக்கும் ஒன்று. நிறைகளை குறைகளையும் சேர்த்தே ந‌ம்மை காட்டும். அப்படிப்பட்ட நிலைக்கண்ணாடியை தனது கவிதையின் அருமையாதொரு படிமமாக உபயோகித்து இருக்கின்றார். ச‌ல்மாவின் பச்சை தேவதை கவிதைத் தொகுதியில் நீக்கமுடியாத வரிகள் என்ற கவிதையில்

நீ அருகிருந்த வேளை
நிலைக்கண்ணாடி பிம்பமென
எப்படியோ வந்துவிட்டது
சில வருத்தங்களும் வலிகளும்

இவ்வ‌ரிக‌ளில் த‌தும்பும் வ‌ரிக‌ளின் வேத‌னை உற்று நோக்க‌ப்ப‌ட‌ வேண்டிய‌து. மிகுந்த‌ துய‌ர‌மும் வேத‌னையும் வெளிக்காட்டிக்க‌வியலாத‌ அல்ல‌து காட்டிக் கொடுக்க‌ விரும்பாத‌ ஒரு உயிரின் ம‌ருக‌லும் இதில் த‌தும்பி வ‌ழிகின்ற‌ன‌. என்னதான் நான்கு சுவருக்குள் ந‌ட‌க்கும் அதிகார‌ங்க‌ளும் அடுக்கு ஆளுமுறைக‌ளுமாயினும் பெண்ணின் வருத்தங்களையும் வலிகளையும் அவ்வீட்டு நிலைக்கண்ணாடி அறியுமன்றோ?

இந்த பாடலில் மாற்று பொருளாக ஆடிப்பாவையை ஆடும் விழிப் பாவைகள் என்றும் கொள்ளலாம். அப்படி பொருள் கொள்ளும் போது இந்த பாடல் தலைவியின் கோணத்தில் சொல்லப்பட்டதாக பொருள் கொள்ளலாம். முதிர்ந்த மாங்கனியை கழனியில் வாளை மீன்கள் கவர்வதை போல பரத்தை உன்னை கவர்ந்து சென்று விட்டால் ஆயினும் என்றேனும் நீ வாருவாய் என உன் புதல்வனின் தாயாக விழிப்பாவைகள் இடையறாது ஆடிய வண்ணம் காத்திருக்கின்றேன்.

தேன்மொழி தாஸ் ஒளியறியாக் காட்டுக்குள் என்ற தன் தொகுப்பில் ஒரு கவிதையில்

எப்போதாவது உனது வருகை
கண்களுக்குள் தலைகீழாய் விரியும் காளானாய்க்
கருவிழி அசைய
கதவு திறப்பேன்.

க‌ருவிழி அசைய‌ என்ப‌தை ஆடிப்பாவை என்ப‌தோடு ஒப்பிட்டு, த‌லைம‌க‌ன் வ‌ருகைக்கு ஏங்கி காத்திருக்கும் பெண் ம‌யிலென‌ இந்த‌ க‌விதையின் உண‌ர்வுநிலையை ஒப்பீடு செய்ய‌லாம். தலைகீழாய் விரியும் காளானாய்க் இங்கே விஞ்ஞானம் பேசுகின்றது. விழிக்குள் காணும் காட்சி த‌லைகீழாக‌ தான் ப‌தியும் அதை சொல்வ‌தாக‌வும் அல்ல‌து இந்த‌ வ‌ரிக‌ளை நீ வ‌ரும் வேளை என் த‌லைகீழ் விச‌ய‌ங்க‌ள் பெரும் பிர‌ச்ச‌னைக‌ள் யாவும் நேராகி சென்றுவிடுகின்ற‌ன‌ என்று சொல்வ‌தாக‌வும் எடுத்துக் கொள்ள‌லாம். நீண்ட நாளாக்கு பின் வரும் தலைவனுக்கு காணும் இருக்கும் கண்களில் ஏக்கம் கவிதையில் சொல்லப்பட்டிருக்கின்றது.

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி V

தொட‌ரும்...

‘உயிர் எழுத்து‘ இதழில் வெளியான எனது கவிதைகள்

2010-06-10T02:37:00.000-07:00

‘உயிர் எழுத்து‘ ஜுன் 2010 இதழில் வெளியான எனது கவிதைகள்

கவிதைகளை பின் வரும் சுட்டியிலும் படிக்கலாம்

கானல் நதி கலந்த கடலொன்று

வார்தைகளாலான சிறகு வீடு

நன்றி:உயிரெழுத்து

க‌ன‌வின் முத்த‌ம்

2010-05-27T19:32:00.000-07:00

த‌ற்செய‌லாய்
காதுக‌ளை முத்த‌மிட்ட‌து
க‌ன‌வின் நிழ‌ல்

இருள் ம‌டித்த‌
நினைவின் க‌ர‌ங்க‌ளில்
இத‌மாய் சுகித்திருந்த‌து
விழி மூடிய‌ உட‌ல்

ப‌ழ‌கிய‌ பாதையின்
கையிருந்த‌ புத்த‌க‌த்தை
விழிக‌ளால் புர‌ட்டிய‌ப‌டி

கூட‌வே வ‌ரும் எல்லாவ‌ற்றையும்
வெற்றாய் நுக‌ர்ந்த‌ப‌டி
ந‌க‌ர்ந்து கொண்டிருந்த‌து நான்

ந‌ன்றி: அக‌நாழிகை

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி V

2010-05-25T20:14:00.000-07:00

ஒரு பெண் த‌ன் ப‌ருவ‌த்தின் விழைவை எவ‌ரிட‌மும் ப‌கிர‌ முடியாத‌ சிக்க‌லான‌ சூழ‌லில் தான் ந‌ம் ச‌மூக‌ம் இருக்கின்ற‌து. பெண்ணுக்கே அமைந்த‌ நாண‌ம் த‌ன் தாயிட‌ம் கூட‌ த‌ன் ப‌ருவ‌த்தின் உட‌ல் மாற்ற‌ங்க‌ளையும், அத‌ன் விழைவையும் ப‌கிர‌ முடியாம‌ல் வைத்திருக்கின்ற‌து.

பெண்ணின் காம‌ம் பொதுவாக தவறாகவே சமூகம் பார்க்கின்றது. இத்த‌கைய‌ சிக்க‌லான‌ உண‌ர்வின் போராட்டம் ச‌ங்க கால‌ம் முத‌ல் இந்த‌ கால‌ம் வ‌ரை தொட‌ர்ந்து வ‌ருகின்ற‌து.

கைந்நிலை (பாட‌ல் 59) உண‌ர்வுநிலை நாண‌மும் (கூற‌ல்) துணிவின்மையும்

தாழை குருகு ஈனும் தண்ணம் துறைவனை-
மாழை மான் நோக்கின் மடமொழி! - 'நூழை
நுழையும் மட மகன் யார்கொல்?' என்று, அன்னை
புழையும் அடைத்தாள், கதவு.

வெகுளித்த‌ன‌மான‌ பேச்சினையும் ம‌ருளும் மான் போல‌ பார்வையும் கொண்ட‌ த‌லைவி, தாழை ம‌ட‌ல்க‌ளும் நாரையும் நிறைந்த‌ நீர் நிலை கொண்ட‌ நெய்த‌ல் நில‌த்தின் குளுமையை தன்னுட‌ன் கொண்ட‌ த‌லைவ‌னை, "புழ‌க்க‌டை க‌த‌வின் வ‌ழி நுழைந்து செல்லும் அறிவ‌ற்ற‌வ‌ன் யார்?" என்று புழ‌க்க‌டை கதவினை அடைத்துவிட்டாள் ந‌ம் அன்னை என்றாள் தோழி.

க‌ள‌வொழுக்க‌த்தில் திளைத்திருக்கும் த‌லைவிக்கு அவ்விச‌ய‌ம் அன்னைக்கும் தெரிய‌வ‌ந்த‌ கார‌ண‌த்தால் விரைவாக‌ உன் தலைவனிட‌ம் பேசி ம‌ண‌ம் புரிவாயாக‌ என்று குறிப்பால் உணர்த்தினாள் என்றும் இதை எடுத்துக்கொள்ள‌லாம்.

களவொழுக்கம் சரியா தவறா என்ற பிரச்சனையை புறந்தள்ளி வைத்துவிட்டு பார்ப்போமேயானால், நான் இன்னாரை என் வாழ்க்கை துணையென ஏற்க பிரியப்பட்டேன் என்பதை கூட சொல்ல தயக்கம் கொள்ளும் தலைவிக்கு அவள் நாணம் அல்லது இன்னபிற காரணமோ இருக்கலாம். அன்னைக்கு தன்னை தன் உள்ளம் உணர்த்தி விரும்பியவனை மணந்து கொள்ளுமாரு தோழி அறிவுருத்துவதே இதற்கு சாட்சி.

இதையே சக்தி ஜோதியின் நிலம் புகும் சொற்கள் என்ற தொகுப்பில் அறியாமை என்ற கவிதையில் சிறுவயதிலிருந்து தாயின் விரல் பற்றி நடந்த நான், இப்போது அவள் அறிந்த இவ்வுடலை அவளிடமிருந்து மறைக்கும் பருவம் அடைந்து விட்டேன் என்று வாதையில் வருந்தும் இவர் அன்பான தாயிடம் எப்படி சொல்வேன்

உன் மேல் கொண்ட
காதலையும்
என்
பருவம்
உன்னை நாடுவதையும்

என்று வினவும் இவர் மனநிலையும் உணர்வும் சங்க தலைவிக்கு சற்றும் மாறுப்பட்டதில்லை. இங்கும் நாணமே தடையாக இருக்கின்றது. ஆனால் உள்ளம் அவனையே மேலும் மேலும் உருகி உருகி நினைத்து வாடுகின்றது.

வெளிப்படையாக தனக்கு திருமணம் செய்ய சொல்லி எந்த காலத்திலும் பெண் தன் பெற்றோரிடம் கூட கேட்க இயலாது. இந்த சிக்கலையே சங்கத்தலைவியும் சக்திஜோதியும் பகிர்ந்திருக்கின்றார்கள்.

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி IV

தொட‌ரும்...

பிரிய‌த்தின் பெருங்க‌ன‌வு

2010-05-20T07:13:00.000-07:00

க‌ன‌வுக‌ளை செங்கொன்றை
ம‌ல‌ர் போல‌
உதிர்த்தெடுகிற‌து இவ்விர‌வு

வீதியோர‌ம்
கொட்டி கிடக்கிற‌து
க‌ன‌வின் ம‌ண‌ல் துக‌ள்க‌ள்

உல‌கெங்கும் த‌ளிர்க‌ன‌வு
பெய்து கொண்டே
உயிர் ந‌னைகிற‌து

பிரிய‌த்தின் பெருங்க‌ன‌வு
க‌ன‌வின் பெரும்விளைவு
நீயெனும் ம‌ந்திர‌ம்

ர‌க‌சிய‌ங்க‌ளாலான ர‌க‌சிய‌ங்க‌ள்

2010-05-18T21:51:00.000-07:00

நேற்றின் ர‌க‌சிய‌ங்க‌ளாலான‌ ஆடையை
துவைத்து காற்றாட
உல‌ர்த்தி இருந்தேன்
கொடிக்க‌யிற்றில்

சொட்டி வ‌டியும் நீர்த்துளிக‌ள்
ரக‌சிய‌ ராக‌ங்க‌ளால்
சில்லிட்டு அதிர்வித்தது‌
கூட‌த்தின் பெருந்த‌‌ரையை

துளித்துளியாய் சேர்ந்த‌வைக‌ள்
விழைவித்திருந்த‌ன‌
பிரிய‌ங்க‌ளின்
பெரும் வெளியை
‌
ர‌க‌சிய‌மான‌வை ர‌க‌சிய‌ங்க‌ள்

நீர்க்கோல வாழ்வை நச்சி - ஒரு விம‌ர்ச‌ன‌ம்

2010-05-16T20:25:00.000-07:00

திருமதி.லாவண்யாவிற்கு ,

தங்களின் 'நீர்க்கோல வாழ்வை நச்சி' படிக்கக் கிடைத்தது.முதலில் கவர்ந்தது அந்த தலைப்பு. படிப்பதில் சாதாரண வாசகி எனினும் தெரிவு என் பிடிவாதம் என்பதால் அதிகமாக படிக்க முடிவதில்லை. உங்கள் தொகுப்பு படித்தது பாக்கியம். மனம் சார்ந்த எழுத்துக்கள் என் இஷ்டம்.அற்புதமாக இருந்தது. ஒரு நாள் முழுவதும் மனம் அலைந்தது.

மனவெளியின் இருள் நினைவுகளை உங்கள் தொகுதியின் கடைசி கவிதையால் அனாயாசமாக கடந்தேன். அதற்காக உங்களுக்கு நன்றி. பல நூறு விஷயங்களை மனமுதிர்ச்சியால் கடந்து விடுகிறோம். கடக்க முடியாத சிலவற்றை வலி மிகுந்த தருணமாக காலம் மாற்றிவிடும். அப்படிப்பட்ட தருணங்களை உங்கள் கவிதைகள் சொல்லியது. கவிதை வாசிப்பவர்களே லாவண்யாவாக நிற்கும் தருணத்தை உணர முடிந்தது.

எழுதும்போது எழுத்துக்காரன் நிற்கிற உணர்வுபூர்வமான தளத்தில் இருந்து அவனாலேயே போற்ற முடியாத, வாசிப்பின் மூலமாக வாசகன் பெற்றுக்கொள்ளும் அபூர்வமான தளம். இதில் எழுதினவன் கூட சிலசமயம் அன்னியனே. பொது வெளியில் உணர்வு பாரம் நிறைந்த எழுத்துக்காரனோடு , அதைவிட மென் இயல்பு கொண்ட வாசகனுக்கு என்ன வேலை? ஒரு கூடல் பற்றிய கவிதை அற்புதமாக இருந்தது லாவண்யா. மனம் நிறைந்த கூடலை உங்கள் கவிதை சொல்லியது.

ஒவ்வொரு சொட்டாக அமிலம் இடப்படும் தவறான புரிதல் கொண்டுவிட்ட, நம் தரப்பு வாதங்கள் கேட்கப்படாத , நட்பின் பிரிவுக்குப்பின் , 'பறத்தல் என் சுதந்திரம்' என்று பறந்த உங்கள் கவிதை எனக்கு தந்தது ஒரு பறத்தலை. பறத்தலுக்கான சுதந்தரத்தையும் ,அதற்கான நியாயத்தையும். சொல்ல இடம் தராத, முடிந்துபோன நட்பு ஒரு கசப்பை நிரந்தரமாக நம்மீது வீசி விடுகிறது . பறப்பது என் சுதந்திரம், பறக்க வைத்ததற்கு என் நன்றி தோழி

பிரியங்களின் பிரியத்தை பிரியமாக சொல்லி இருக்கிறீர்கள். தனிமையின் வயிறு அழுந்தி படுத்துக்கிடக்கும் ஓரிரவு, கூட படிக்காமல் கிடக்கும் புத்தகம், ப்ரியம் ப்ரியத்துக்காகவே என்று வண்ணதாசன் சொல்வார். வந்துவிட்டு போகும் பிரியங்களையும், அதை கொண்டாடுவதையும் பார்த்தால் லாவண்யாவின் உறவும் , நட்பும் இன்னும் கிராமத்தின் வேர்களில் உண்டு.

வாழ்க்கையை மீள் நோக்க பயணம் ஒரு படிமம் என்று அபிலாஷ் எழுதி இருந்தார். பயணம், நெடுஞ்சாலை, ரயில் போன்றவை உங்களில் ஏற்படுத்தும் துல்லியமான அதிர்வுகள், அதுகுறித்தான பதிவுகள், பயணம் தரும் நினைவுகள்தான் நம் வரமும் , சாபமும்.

எத்தனை முறை பயந்தாலும் பயம் மட்டும் பழகுவதேயில்லை, என்று லாவண்யா சொல்வது எத்தனை பயங்கள், சடன் ப்ரேக் போடும் வாகன அதிர்வு, தானியங்கி கதவு, எப்போதும் என்னையும் பதட்ட மேற்படுத்தும் அடையாள அட்டைகள் போன்ற மெல்லிய பயங்கள் .பயம் மனம் சார்ந்தது என்று சொல்கிறபோதே, இருப்பை பதிவிக்கும் அடையாள அட்டைகள் இல்லாத பொது அமைதியின் நெற்பயிர் தானே விளைந்திடுமா என்கிறபோது , அதைத் தள்ளிநின்று பார்க்கும் எழுத்துக்காரியின் கர்வமும்.

பத்ராட்சி பூக்களை அந்த பேரில் சொல்லவேண்டும் என்று எப்படி தோன்றியது ?அந்தி மந்தாரை என்று அதன் பேரை மாடர்ன் ஆக்கி விட்டார்கள். ஊமத்தை பூக்களையும் , ஸ்ப்பீக்கர் போனையும் சேர்த்து நினைக்கிற பால்யம் உங்களுக்கும் உண்டா ? பூவரசம் பூக்களை ஏன் விட்டுவிட்டேர்கள் ? ஆரஞ்சு சுளைகளுடன், வாசனையை உள்ளே வைத்திருக்கும் ரசனையையும் ,வெள்ளையுடன் வயலட் பூக்களை கொடுக்கும் எருக்கங்செடிகளை சொல்லும் உங்களை பிடிக்கிறது.

தனிமையும் பிரியமும் சேர்ந்தது. அதீத பிரியங்களின் தடயங்கள் விலகி வெறும் ப்ரியங்களாக மாறுவது நுணுக்கமான இடம்.அதை கவனிக்கும் நுண்மனம் கொண்டவர்கள், அந்த வினாடி இறந்து போய்விடுவார்கள். அந்த மனசுதான் வார்த்தைகளில் ஆன பிரியத்தையும் மனசை தொடும்படி எழுதி இருக்கவேண்டும். மன முதிர்வு கொண்ட அறிவு சார் மனம், தினப்படி வாழ்வை திட்டமிட்டு வாழ்கிறது. அதற்கு எதிர் பக்கத்தில் உன்மத்தம் கொண்ட மனம் ஒன்று பிரியத்தின் பாற்பட்டவர்களிடம், பேசிக்கொண்டே இருக்கவும், வார்த்தைகளிலேயே மனசு நிறையவும் விழைகிறது. இந்தக்கவிதையும் முதலில் இருந்து கடைசி வரி வரை என்னை அதிர்வித்தது. லாவண்யா என் அடி மனசின் வார்த்தைகளை திருப்பிக்கேட்டால் சொல்ல வராது.

மனம் காயப்பட்டு விடும்போது பதில் சொல்லதோன்றாது. அது வேதனையின் உச்சம். உனக்கான உன் நிலையில் இருந்து கவிதையில் உனக்கான எப்போதும் கிடைக்கப்போவதில்லை பதில்கள் என்பது அற்புதமான வெளிப்பாடு லாவண்யா.
உடலோடு மறைந்திருந்த உணர்ச்சிகளை ஒவ்வொன்றாய் புரட்டினாய். பேசிக்கொண்டே வரும்போது இணையிடம் இருந்து திடீரென பெறப்படும் எதோ ஒன்றில் ,சட்டென நுணுக்கமான தள மாற்றம். உடம்பெங்கும் முத்தப்பூவை பூக்கச் செய்பவன். அந்த மாறுதலை கவனித்து கவிதையில் கொண்டு வந்த ரசனைககாரியே நீங்கள்.

விடை அறியா கேள்விகளில் இரண்டாவது பத்தி நெருடுகிறது. அதே போல காற்றும் கனமான அட்டைகளும் மூன்றாவது பத்தி.என்ன என்று சொல்ல தெரியவில்லை.

வழிபோக்குவில் ஒரு பிரிவின் துல்லியமான தருணத்தை சொல்லியுள்ளீர்கள்.ஒரு ப்ரியம் முடியும்போது ஏதோ ஒரு அசட்டு எதிர்பார்ப்பில் காத்திருப்போம். அவ்வளவுதான் என்று நாம் ஏற்றுக்கொள்ளும் தருணம் [உணரும் தருணம் வேறு ,ஏற்றுக்கொள்ளும் தருணம் வேறு] வலியை தாண்டிய வெறுமை வரும்.அந்த தருணம் அதில் பதிவாகியுள்ளது. லாவண்யா எல்லாம் தெரிந்து கொள்வது சுலபம். என்னை மாதிரி. உங்களை போல் பதிவது ,அதுவும் துல்லியமாக பதிவது கஷ்டம்.

எதிர்மறை ரசவாதம் என்ற கவிதையில் நான் புரிந்துகொண்டது ஒரு ஆளுமையை நீங்கள் சந்திகிறீர்கள். அவன் கவர்கிறான். அவனை புரிகிறது. தவறு சொல்ல முடியவில்லை.விலகவும் முடியவில்லை. ஈர்க்கிறான். அவனை அப்படியே ஏற்றுக்கொள்கிறீர்கள். நெருடவும் செய்கிறது. லாவண்யா ,என் பார்வை உங்கள் பார்வை அல்ல. தவறாய் எடுத்துகொண்டு விடாதீர்கள்.

காத்திருத்தல், அதுவும் பெண்களுக்கு எவ்வளவு தர்மசங்கடம். சிகரெட் பிடித்து, டி குடித்து, நான் காத்திருக்கிறேனாக்கும் என்று பெண்களால் காத்திருக்க முடியாது. மனம் சார்ந்த அவள் தவிப்புகளூடே கொஞ்சம் கொஞ்சமாக நெகிழ்ந்து கொண்டு வரும் தருணங்களை நீரடியில் காத்திருத்தலும், மழை தீர்ந்த பின் பொழுதில் என்று தலைப்பே கவிதை ஆனவற்றிலும் வைத்திருந்த நேசங்கள் எல்லாம் காற்று வந்து கலைத்தது போல் துடித்திருந்தேன் தூரத்தில் துயரங்கள் விழித்திருக்க.என் இருப்பை என்ற இடத்தில் காத்திருத்தல் இருப்பாகி விடுகிறது தலைவி ஏங்கி சொல்வது போல.

ஒரு வாழ்கை போல எல்லாம் இருந்தும் நகர்ந்து கொண்டு இருக்கிறது யாருமற்ற நதி. இந்த கவிதையில் வாழ்வது ,ஒரு சிநேகிதியின் மனம். சிநேகமாகவாவது நின்றிக்கலாம் என்ற ஏக்கம் , கைநழுவி போய்விட்ட நட்பு, தனிமை,குழப்பம் மனம் என்று அது ஒரு சிறுகதை.

திரும்பக்கிட்டாதவை கவிதையில் ”அவர் பிரியத்தில் மீண்டும் மீண்டும் தொலையும் நான்” அட போட வைத்த வரிகள் அவை தன்னை தொலைத்தல் என்பது சுயம் தொலைப்பது எவ்வளவு அருமையான வாழ்க்கை தத்துவமது. “எதைக்கொண்டும் நிரப்பமுடிவதில்லை யாரோவாகிப்போன நீ தந்த நிராகரிப்பின் ரணத்தை” வலி தரும் வரிகளிவை.

வரவேற்பறையே ஒரு இறுக்கமான இடம்தான். “நமதற்ற வரவேற்பறை” அழகான சொல்லாடல். உன் நான் ,என் நீ சொல்ல நினைப்பதும் சொல்வதுமாக அமைத்திருந்தது அழகு.

”பக்கத்துக்கு இருக்கையின் பார்வையை தவிர்த்திருந்தேன்”, “முத்தம் ஓசை களாய் நின்று விடுவது”, “என்னோடு பேசிக்கொண்டு இருந்தாய் துணையாக தனிமை மட்டும்” , “வாசல் தாண்டி உள் வருவதில்லை அழகிய கோலங்கள் கூட”, “கற்காலத்தில் சொல்வது கற்களையா மனிதர்களையா” போன்ற வரிகள் எல்லாம் அடிக்கோடிட்டு சொல்லப்பட வேண்டிய வரிகள். மிகவும் அனுக்கமாக உணர்ந்தேன் இந்த வரிகள் அனைத்தையும்.

வார்த்தைகளிலான ப்ரியம் ....முழுக்க பிடித்தது. என் தோழி ஒருத்தி பேசிக்கொண்டே இருப்பாள். அவள் கணவர் மௌனம். என்னுடைய மற்றுமொரு தோழியால் ,தன் கணவரின் மௌனத்தை தாங்க முடியவில்லை, மோனத்துடன் எப்படி தொடர்ந்து பேசுகிறீர்கள் என்பாள் ? அடி மனசு தெரிந்தால் போதாதா ?

உங்கள் புத்தகம் என் முன்னால் உள்ளது. நினைவில் இருந்து சொல்லவில்லை. என் நெஞ்சில் ஆடும் நினைவின் ரசனையை உங்கள் மூலமாக பார்கிறேன். மனசு கொண்டு பேசுபவரின் மொழி அது.

எல்லோரும் சொல்லிப் போவதுதான் அன்பு ,எல்லோரும் வாழ்ந்து பார்பதுதான் ப்ரியம். அதை எல்லோரும் சுமந்து திரிவதில்லை. அபூர்வமான மனிதர்களே அதை உணர்ந்தும்,தேம்பியும் திரிகிறோம். அந்த மொழியை உங்கள் தொகுப்பு பேசுகிறது. நம்மை போன்ற மனிதர்கள் இருக்கிறார்கள் என்ற ஆசுவாசத்தையும் தருகிறது.

ஒரு எழுத்து நல்ல எழுத்தா என்று பிரிக்க நான் இலக்கிய ஜாம்பவான் இல்லை. அது எனக்கு பிரியமாக இருக்கிறதா. பிடித்தது விலை மதிக்க முடியாதது. பிடிக்காதவையின் கூட ஒரு இலட்சம் குடுத்தாலும் வேண்டாம். மனம் பொங்கிக்கொண்டு இருக்கிறது. கண்களில் இருந்து ஒரு சொட்டு நீர் வழிந்து விட முடிந்தவர் பாக்யசாலிகள். அற்புதமான தருணம் ஒன்றை அடைந்தேன் உங்கள் கவிதைகளை வாசிக்கும் போது. லா.சா.ரா.சொல்வது போல தரிசன நிமிடம். வாழ்ந்தது போதும் என்ற நிறைவு. அந்த வினாடியின் பரவசமாக , ஒருசின்ன வெளிப்பாடு. கவிதை தொகுப்பிற்காக உங்களுக்கும் வாசிக்க அனுப்பியவர்க்கும் என் நன்றிகள்.

மிகுந்த ப்ரியங்களுடன்,
ந‌ந்தினி

மழைப் பிரிய‌ம்

2010-05-12T23:45:00.000-07:00

புகைப்ப‌ட‌ வைப‌வ‌ல‌ட்சுமி
கையுதிர்த்த‌ பொற்காசுக‌ள்
அவ‌ள் கால‌டியில் புதிதாக‌
ம‌ல‌ர்ந்திருந்த‌ ரோஜா பூவின்
ம‌க‌ர‌ந்த‌ துக‌ள்களாக‌
ஒளிர்ந்திருந்த‌ன‌

சாலையோர‌ம் ப‌ச்சையாய்
வசீக‌ர‌ புத‌ர் ஒன்றில்
அதிய‌மாய் ஆங்காங்கே
இள‌ம்ப‌ச்சை பூக்க‌ள்
காற்றிசைத்தால்
சிற‌க‌சைத்து கொஞ்ச‌ம் ப‌ற‌ந்து
மீண்டும் அதே இட‌த்தில் பூத்த‌ன‌
ப‌ட்டாம் பூச்சிக‌ளாய்

நில‌வு ம‌றைத்த‌
கோபுர‌ வெளிச்ச‌ங்க‌ளாக‌
புதிர் கோப‌ங்க‌ள்
பிரிய‌ங்க‌ளை ம‌றைந்து
காட்டும் மாய‌ உல‌கில்
காட்சிப் பிழையாக‌
என் ம‌ழைப்பிரிய‌ம்
ந‌னைக்க‌விய‌லாத‌ தூர‌த்தில்
ந‌தியோர‌‌ ம‌ண‌லாக‌
உன் பிரிய‌ம்
வ‌ற‌ண்டு போயிருக்க‌ கூடும்

ந‌ன்றி:ப‌னிமுலை இணைய‌ இத‌ழ்

வீச்ச‌மெடுக்கும் வார்த்தைக‌ள்

2010-05-10T19:38:00.000-07:00

பாச‌மெனும் நூலாம்ப‌டையின்று
பிடுங்கி எடுக்கிறேன் வார்த்தைக‌ளை
ஒவ்வொன்றும்
துர்நாற்ற‌மெடுக்கும்
பிண‌க்குவிய‌லை ஒத்திருந்த‌து

பெரும் பாறையை ஒற்றையாய்
ந‌க‌ர்த்தும் சிர‌ம‌த்தோடு
செய‌ற்கை ந‌றும‌ண‌த்தை
சூழ‌லெங்கும் ப‌ர‌ப்பிவிட்டு
இத‌ழை பொய்யென‌
புன்ன‌கைக்க‌ வைத்து

என்ன‌வெல்லாம் செய்தாலும்
வீச்ச‌மெடுக்கும் வார்த்தைக‌ள்
கூட‌வே வ‌ருகின்ற‌ன‌
மீண்டுமொரு முறை
இற‌க்கும் வ‌ரை

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி IV

2010-05-07T01:13:00.000-07:00

கைந்நிலை (பாட‌ல் 23) உண‌ர்வு நிலை ந‌ம்பிக்கையின் ஊற்று

சிலை ஒலி வெங் கணையர், சிந்தியா நெஞ்சின்
கொலை புரி வில்லொடு கூற்றுப்போல், ஓடும்
இலை ஒலி வெங் கானத்து, இப் பருவம் சென்றார்
தொலைவு இலர்கொல் - தோழி! - நமர்?

ஒலி எழுப்பும் அம்பேற்றிய‌ வில்லும் கொடுங்கோப‌மும் கொண்ட‌, எதை கொல்கின்றோம் என்ற‌ சிந்த‌னையோ இர‌க்க‌மோ இல்லாமல் கொல்வ‌தை ம‌ட்டுமே தொழிலாக‌ கொண்ட‌ ந‌ம‌ன் போன்ற‌ வேட‌ர்க‌ள் ஓடும் போது ச‌ருகான‌ இலைக‌ள் ஓசையெழுப்பும் மிகுந்த‌ வெப்ப‌முடைய‌ இந்த‌ கான‌த்தில் இந்த‌ வேனிற்ப‌ருவ‌த்தில் சென்ற‌ ந‌ம் த‌லைவ‌ன் ந‌ம்மை விட்டு நீங்கிய‌ சொன்ற‌ தொலைவை நினைத்து பாராம‌ல் இருக்க‌வா இய‌லும் சொல் தோழி.

இப்பாட‌லின் உட்பொருளாக‌ க‌ண்டால் தோழி த‌லைவ‌ன் மேல் கொண்டிருந்த‌ அதீத‌ காத‌ல் அவ‌ன் வ‌ழியில் அவ‌னுக்கு நேர‌ இருக்கும் துய‌ர‌ங்க‌ளை, அபாயங்க‌ளை எண்ணி அஞ்சி இருப்ப‌தாக‌ நினைக்க‌ தோன்றுகின்ற‌து. வேனிற் கால‌ம் சென்று இருக்கும் தலைவ‌னின் ப‌சி, தாக‌ம், கொலை செய்த‌ அஞ்சாத வேட‌ர் இவையல்ல‌ இப்பாட‌லில் கார‌ணி, இடையாற‌து பிரிவால் மௌனமாக‌ அர‌ற்றும் உட‌லை தான் ஓடும் இலை ஒலி வெங் கானத்து என்று கான‌த்தின் மேல் ஏற்றி விட்டு சொல்லி இருக்கின்றாள். என்னை போல‌ த‌லைவ‌னும் ஏக்க‌முற்று இருக்கின்றானோ என்ற‌ க‌வ‌லையும் வேறு சேர்ந்தே வாட்டுகின்றது அவ‌ளை. ச‌ர‌ ச‌ர‌க்கும் ச‌ருகை போலும் இவ‌ளுட‌ல், இவ‌ள் பிரிவை ஏதாவ‌து ஒரு கார‌ண‌த்தால் நினைவூட்டிய‌ப‌டியே இருக்கின்ற‌ர் உட‌னிருப்போர். பிரிவு தொலைவு த‌ன்னை த‌கிர்ப்ப‌து போல் த‌லைவ‌னைக்கும் த‌ன் நினைவினை ஏதாவ‌து ஊட்டிய‌ வண்ணிருக்கும் என்ற‌ ந‌ம்பிக்கை அவ‌ளுக்கு நிறைய‌ இருக்கின்ற‌து. இந்த‌ உண‌ர்வையே அகத்திணையில் மிச்ச‌ம் என்ற‌ க‌விதையில் கனிமொழி கூறி இருக்கின்றார்.

ந‌ட்போ காத‌லோ இர‌ண்டும் ம‌ற்ற‌ அதீத‌ பிரிய‌மோ ஏதோ ஒன்றால் பிணைந்த‌ இருவ‌ரை மென்திரை போல‌ ப‌டியும் சிறு இடைவெளி கால‌ப் பெருவெளியில் நீண்டு வ‌ள‌ர்ந்து இவ‌ரும் பிரிய‌ கார‌ண‌மாகி போகும் க‌தை அனைவ‌ரும் உண‌ர்ந்த‌தே. அப்ப‌டிப்ப‌ட்ட‌ இடைவெளியையும் பெரிவையும் பேசும் இக்க‌விதையில்

என்றேனும் ஒரு க‌ண‌ப்பொழுதில்
ந‌ம் க‌ன‌வுக‌ள் உர‌ச‌க்கூடு‌ம்
ந‌ம்பிக்கையில்
வீசியெறியாம‌ல் வைத்திருக்கின்றேன்
இவ்விருட்ச‌த்தின் விதையை

என்ன‌ ஒரு ஆதர்ச‌மான‌ ந‌ம்பிக்கை த‌ன் காத‌ல் நினைவுக‌ள் மீது. அந்த‌ நினைவுக‌ள் உனை என்னோடு சேர்க்கும் மீண்டும் ஒரு விருட்ச‌த்தை உருவாக்கும் முன்பிழுந்திருந்த‌ அவ்விருட்ச‌த்தின் விதை என்ற‌ க‌னிமொழிக்கு ச‌ங்க‌கால‌ த‌லைவியின் ம‌ன‌நிலை பெருதும் பொருத்த‌மாக‌வே இருக்கின்ற‌து.

இதே பாடலில் தலைவி தொலைவு இலர்கொல் என்று கூறுமிடத்தை மிகைப‌டுத்தி பார்க்கும் போது அவ‌ள் சிறு கவலையும் கொண்டவாளாகவும் எனக்கு தெரிகின்றாள், தான் தலைவனை பிரிந்து வாடுகின்றாள் தன் காதலை காமத்தால் தவிக்கும் உடலை மறைக்க இயலாது தவிக்கிறாள். இந்த‌ உண‌ர்வுநிலை மேல் சொல்ல‌ப்ப‌ட்ட‌திலிருந்து ச‌ற்றே மாறுபட்டதாக‌ இருந்தாலும், இதே உண‌ர்வின் நிலையை பச்சை தேவதை தொகுப்பில் சல்மாவும் கூறி இருக்கின்றார்.

பாதி இரவில் ஒரு மிருகமென
என்னை அடித்து வீழ்த்திக்கொண்டிருக்கிறது
உனக்கான இந்தக் காமம்.

தன்னருக்கில் இல்லாத தலைவனை அவன் நினைவில் வாடும் தலைவியின் மனநிலையை ஒட்டி மிக அருகில் தான் இருக்கின்றது சல்மாவின் நீங்குதலின்றி கவிதையும்.

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி III

புகையும் ப‌ட‌ங்க‌ளிர‌ண்டு

2010-05-04T20:19:00.000-07:00

நினைவின் புகைப்ப‌ட‌ங்க‌ள்
நேற்றின் ஒன்று
நாளையின் ம‌ற்றொன்று

இருக்கைக‌ள் சில‌
இட‌ம் மாறியும்
ஒன்றிர‌ண்டு காணாமலும்
இர‌ண்டேனும் புதிதாக‌வும்
இருக்கின்ற‌ன‌
புகையும் ப‌ட‌ங்க‌ளில்

இப்ப‌டியாக‌
க‌ட‌க்கிற‌து
வாழ்க்கை

பய‌ண‌ சாலை

2010-04-27T20:05:00.000-07:00

ஓவிய‌ தூரிகை
ந‌ளின‌மாக‌ சொட்டிய‌
க‌ரு மையால்
வ‌ளைந்தும் நெளிந்தும்
நீண்டிருந்த‌து சாலை

ப‌க‌லின் மிருக‌ம் மூச்சிரைத்த‌
சாலையின் வெக்கையை
த‌ணிக்க‌ முடிவ‌தில்லை
தார் பூச்சின் எண்ணிட்ட‌
எந்த‌ ம‌ர‌த்தாலும்

இர‌வு வ‌ந்து
போர்த்திய பின்னும்
உற‌ங்கு‌வ‌தில்லை
மின்மினுக்கும்
சாலைக‌ள் ஒவ்வொன்றும்

புள்ளியில் தொட‌ங்கி
புள்ளியில் முடியும்
எந்த‌‌ பய‌ண‌த்தை
இணைத்திருக்கும்
ஏதோ ஒரு சாலை

மீன் மொழியும் நில‌வும்

2010-04-20T00:04:00.000-07:00

அன்று ஒரு நாள்
நில‌வை ம‌ட்டும்
சாட்சியாக்கி
நீர்நிலையொன்றில்
மீனாகி நீந்தி இருந்தோம்
நெடும் நேர‌ம்
நெடுந்தொலைவு

விடிய‌ல் வ‌ந்த‌தும்
ப‌ற‌வையாகி ப‌ற‌ந்து போனாய்
உன‌த‌ருமை கூடு நோக்கி
நீ கைம‌ற‌தியாய்
விட்டு சென்ற‌
சில‌ சிற‌குக‌ளை
வெட்டி எடுக்க‌ இய‌லாத‌
செதில் நினைவுக‌ளை
வ‌ன‌மெங்கும் நிறைத்திருந்தேன்
வாசனை திர‌விய‌ங்க‌ள் பூசி

ஒற்றை நில‌வென்ன‌ செய்யும்
மீன் மொழி
புரிவ‌தில்லை அத‌ற்கு
புரிந்திருந்தால் ஒருவேளை
சிரிக்காம‌ல் புல‌ர்ந்திருக்குமது

-லாவ‌ண்யா சுந்த‌ர‌ராஜ‌ன்

ந‌ன்றி:ப‌னிமுலை இணைய‌ இத‌ழ்

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி III

2010-04-17T06:10:00.000-07:00

கைந்நிலை (பாடல் 26) - உணர்வு நிலை காட்சிப் பிழை போல மனப்பிறழ்ச்சி

இந்த‌ பாட‌லின் ஓரிரு வார்த்தை சிதைந்து போயிருக்கின்ற‌ன‌.

குருதி மலர்த் தோன்றி கூர் முகை ஈன,
.... .... சேவல் எனப் பிடவம் ஏறி,
பொரு தீ என வெருளும்; - பொன் நேர் நிறத்தாய்! -
அரிது, அவர் வாராவிடல்.

செந்காந்த‌ள் ம‌ல‌ர் க‌ண்ட‌ சேவ‌ல் த‌ன்னோடு ச‌ண்டையிடும் மற்றுமொரு சேவ‌ல் என்றெண்ணி பிட‌வ‌ம் கொடுமேலேறி நின்ற‌ சேவ‌ல் பின் அதை பொருந்தீ என்று அஞ்சி அங்கிருந்து அக‌ன்று சென்று விட்ட‌து. பொன்னை போல் மின்னும் நிற‌த்தை உடையவளே அவ‌ர் வாராம‌ல் போனால் ந‌ம் வாழ்வ‌து அரிதாகிவிடும்.

செந்நிற‌ காந்த‌ள் ம‌ல‌ர்க‌ள் க‌ண்ப‌தற்கு எரியும் நெருப்பென‌ இருக்கும், அதை தொலைவிருந்து க‌ண்ட‌ சேவ‌ல் தோற்ற‌ மயக்கத்தில் அது ஒரு சேவ‌லென்றும் பின் அதையே தெளிவாக‌ காணும் போது நெருப்பென்று அஞ்சுவ‌தாக‌ வ‌ரும் இந்த‌ பாட‌லில் உட்க‌ருத்தாக‌ த‌லைவ‌ன் மேல் த‌லைவி கொண்ட‌ அவ‌ந‌ம்பிக்கை நன்கு புல‌ப்ப‌டுகின்ற‌து, கான‌ல் நீரை காத‌லென்று எண்ணி ஏமார்ந்த‌ விச‌ய‌த்தை சூச‌க‌மாக‌ சொல்லி இருக்கின்றாள் த‌லைவி மேலும் அவ‌ன் திரும்பி வார‌விடில் அரிது என்று சொல்லுமிடத்தில் அவ‌ளுடைய‌ ம‌ன‌வ‌லியை வெளிப்ப‌டுத்தி இருக்கின்றாள். இந்த‌ பாட‌லை அக‌த்திணையின் மாறும் உன் முகம் என்ற‌ க‌விதையோடு ஒப்பிட‌லாம்.

மிக‌ அசாதார‌ண‌மான‌ மொழியில் காத‌ல் க‌ண‌வ‌னின் காத‌ல் மற்றும் க‌ல்யாண‌ம் அல்ல‌து அதை போன்ற‌தொரு பிணைக்கப்பட்ட‌ சூழ‌லின் போது நிக‌ழும் ஏமாற்ற‌ங்க‌ளை அழ‌காக‌ பேசியுள்ளார் இக்க‌விதையில். க‌விதை ஆர‌ம்பிக்கும் போது அவ‌ன் காத‌லின் க‌ட்டுண்டு கிட‌க்கும் த‌ன்னிலையை மென்மையாக‌ தெரிவித்துள்ளார். அத்த‌னை காத‌லும் ஆண்மைச் செருக்கும் வெற்றியின் வெறியும் என்னை த‌கிக்கின்ற‌ன‌ என்று சொல்லுமிடம் த‌ள‌ர்ந்து போகிறார்.

விளிம்புக‌ள் சிவ‌ந்த‌ விழிக‌ளின்
இருளில் த‌ட‌ம் தெரியாது த‌டுமாறுகிறேன்
நீ யாரென்று அறியாது

என்ற‌ வ‌ரிக‌ளில் க‌னிமொழியின் உயிர்வ‌லி உர‌க்க‌ ஒலிக்கின்ற‌து. நெரும்பை செந்காந்த‌ள் ம‌ல‌ரே நினைத்து ர‌சித்து நுக‌ர்ந்து பின் வெதும்பிய‌ நிலை புரிகின்ற‌து. இதையே தமிழ்நதியின் சூரிய‌ன் த‌னித்த‌லையும் ப‌க‌ல் தொகுதியில் பிள்ளைகள் தூங்கும் பகற்பொழுது என்ற கவிதையில்

படகேறி வந்தபோது பார்த்த கடல்
இளம்பச்சை என்றான்
பின் தயங்கி இரத்தம் என்றான்

என்ற வரிகளை படிக்கும் போது பதறுகிறது. அந்த அளவு வன்முறை வாட்டிய மனிதர்களுக்கு இயற்கை கூட வேறு வடிவமாக தெரிகின்றது. வேதனை தான்.

(தொடரும்...)

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி II

வெயில் துர‌த்தும் ப‌ய‌ண‌ம்

2010-04-14T22:01:00.001-07:00

ய‌ன்ன‌லோர‌‌ வெயில்
இடையறாது துர‌த்த
இட‌ம் மாறி இட‌ம் மாறி
என் இருக்கை தொலைந்திருந்த‌து

க‌ண்ண‌ய‌ர விடாத‌
க‌டும் பிரிய‌த்தை ர‌கசிய
கச‌க‌ச‌ப்பாய் பூசிச் சென்ற‌து
காற்றோடு க‌ல‌ந்து‌ வ‌ந்த‌ வெயில்

வெயில் த‌ணிந்த‌ மாலை
கன‌ல் மித‌க்கும் ந‌தியொன்று
என் ர‌க‌சிய‌ங்க‌ளை
க‌ழுவி மீன்க‌ளுக்கு உணவாக்கி
சுழித்தோடி ம‌கிழ்ந்திருந்த‌து.

நிழ‌லோடு க‌ரைத‌ல்

2010-04-12T21:44:00.000-07:00

அணுக்க‌மான‌ நினைவுக‌ளை
ப‌துக்கி வைத்திருந்தேன்
உன‌க்கான‌ பெருந்தின‌த்தில் ப‌ரிச‌ளிக்க‌

தீட்டித்தீட்டி திட்ட‌மிட‌ல்க‌ளை
செதுக்கி வைத்தேன்
வைர‌த்தை வ‌னைவ‌தை போல‌

எந்த‌ ஒரு அறிவிப்பையும்
சொல்லாம‌ல் வ‌ந்து போன‌து
அந்த‌ நாளும்

க‌ண் எதிரே தொலைத்த‌
அத்தின‌த்தை
மீட்டெடுக்க இய‌லாம‌ல்
நிழ‌லோடு க‌ரைகிறேன் நான்‌.

கெடுவ‌தில்லை கேடு நினைக்க‌ப் பெற்ற‌வ‌னும்

2010-04-09T01:19:00.001-07:00

சிவாவும் பாஸ்க‌ரும் ந‌ல்ல‌ ந‌ண்ப‌ர்க‌ள். ந‌ல்ல‌ ந‌ண்ப‌ர்க‌ள் என்று தானே க‌தை தொட‌ங்கும் முத‌ல் பொழுதில் சொல்ல‌ வேண்டும். முன்ன‌மே அவ‌ன் பிரிந்து விட்டார்க‌ள் பாஸ்க‌ர் சிவாவுக்கு கேடு நினைத்தான். அத‌னால் சிவா பாஸ்க‌ரை விட்டு நெடுந்தொலைவு சென்று விட்டான். அப்ப‌டி சென்ற‌ சிவா பாஸ்க‌ர் செய்த‌ கேட்டினால் கெட்டும் போக‌லை. பாஸ்க‌ர் தான் நினைத்த‌ப‌டி ஓஹோ என்றும் வாழ‌வில்லை என்றெல்லாம் சொன்னால் க‌தையின் முடிவை சொன்ன‌து போல‌ அல்ல‌வா ஆகிவிடும். என்ன‌ கேடு செய்தான் என்று இப்போதே சொன்னால் முழு க‌தையில் என்ன‌ சொல்வ‌து.

ச‌ரி க‌தைக்கு வ‌ருவோம். சிவா, பாஸ்க‌ர் ப‌க்க‌த்து ப‌க்க‌த்து தெருவில் வாழ்ந்து வ‌ந்தார்க‌ள். இருவ‌ரும் ஒரே ப‌ள்ளியில் ப‌டித்தார்க‌ள். அவ‌ர்க‌ள் வாழ்ந்த‌து கிராமுமில்லை ஆனால் பெரிய‌ ந‌க‌ர‌முமில்லை. க‌தை ந‌ட‌ந்தது சுமார் எண்ப‌துக‌ளில் என்ப‌தால் அந்த‌ கிராம‌முமில்லாத‌ ந‌க‌ரமுமில்லாத‌ அவ்வூரில் அதிக‌ம் ப‌டித்த‌வ‌ர்க‌ள் இல்லை என்றே சொல்ல‌ வேண்டும். ஆனால் அந்த‌ ஊருக்கென்று த‌னியாக‌ ப‌ள்ளிக்கூட‌ம் இருந்த‌து போல‌வே நூல‌க‌ம், அர‌சு அங்காடி, சிறிய‌ அள‌வில் வ‌ங்கி, த‌பால் நிலைய‌மென்று த‌ன்னிறைவான‌ கிராம‌ம் தான் அது. ஒரு குள‌க்க‌ரையும் உண்டு.

சிவாவின் அப்பாவின் அப்பா எல்லோரும் விவ‌சாயிக‌ள். ந‌ல்ல‌ பாட்டாளிக‌ள். சிவாவின் த‌ந்தை ஐந்தாம் வ‌குப்பு ப‌டிக்கும் போதே சிவாவின் தாத்தா ப‌டிச்சி கிழிச்ச‌து போதும் விவசாய‌ம் பார்த்தா வீட்டு பொழ‌ப்பையாவ‌து பார்க்க‌லாம் என்று அவ‌ரை ப‌டிப்பில் இருந்து பாதியில் நிறுத்தி வ‌ய‌லுக்கு இழுத்து கொண்டு சென்று விட்டதாக‌வும் ஆர‌ம்ப‌த்தில் ப‌ள்ளி ப‌டிப்பு தொல்லைக‌ள் இல்லாது போனாலும் த‌ன்னுடைய‌ ந‌ண்ப‌ர் போல‌ ப‌டித்து ஒரு அர‌சு ஊழிய‌ர் ஆக‌ முடியாம‌லும் ச‌தா நிர‌ந்த‌ர‌ம‌ற்ற‌ வ‌ருமான‌த்தை வான‌த்தை ந‌ம்பியே பிழைக்க‌ வேண்டி இருப்ப‌தாக‌வும் த‌ன்னை போல‌ அல்லாமல் த‌ன் பிள்ளையாவ‌து ப‌டித்து த‌லையெடுத்து குடுப்ப‌த்தை ந‌ன்கு காப்பாற்ற‌ வேண்டுமென்றும் அடிக்க‌டி சிவாவிட‌ம் சொல்வார்.

பாஸ்க‌ரின் குடும்ப‌ம் சிவாவின் குடும்ப‌ம் போல‌ ப‌ஞ்ச‌ம் பிழைக்கும் குடும்ப‌ம‌ல்ல‌. அந்த‌ கிராம‌த்தில் ஒர‌ள‌வு வ‌சதியோடு இருந்தார் பாஸ்க‌ரின் த‌ந்தை. பாஸ்க‌ரின் தாத்தா என்ன‌ செய்யார் என்ப‌து க‌தைக்கு அவ‌சிய‌மில்லாத‌ கார‌ண‌த்தால் அதை விடுத்து க‌தை தொட‌ர்வோம். பாஸ்க‌ரின் த‌ந்தை அந்த‌ கிராம‌த்தில் ப‌ல‌ச‌ர‌க்கு க‌டை வைத்திருந்தார். அத‌னால் பாஸ்க‌ருக்கு க‌ண்டிப்பாக‌ ப‌டித்து முடித்து ஒரு அர‌சு வேலைக்கு சென்றாக‌ வேண்டுமென்ற‌ க‌ட்டாய‌மில்லை. அத‌னால் எப்போதும் ஏனோதானோ என்று தான் ப‌டிப்பான். சிவாவை போல‌ சுட்டிகையில்லை. சிவா எப்போதும் ந‌ன்கு ப‌டிப்ப‌தாலும் ஆசிரிய‌ர்க‌ளிட‌ம் ந‌ல்ல‌ பெய‌ர் வாங்குவ‌தாலும் சிவா மேல் கொஞ்ச‌ம் பொறாமையோடே இருப்பான் பாஸ்க‌ர். அதுவும் பாஸ்க‌ரின் த‌ந்தை வேறு ச‌தா அவ‌னை பாரு விவ‌சாயி பிள்ளையா இருந்தும் கிழ‌ங்கை தின்னு வ‌யித்து பொழ‌ப்பை பார்த்தாலும் எப்ப‌டி ப‌டிக்கிறான். நீ ந‌ல்லா கொட்டிக்க‌தான் லாய‌க்கு என்று திட்டிக் கொண்டி இருப்ப‌தும் அவ‌ன் மேல் ஒரு பொறாமையை வ‌ள‌ர்க்க‌ கார‌ண‌மாக‌ இருந்த‌து.

சிவா க‌ட்டாய‌த்தின் கார‌ண‌மாக‌வே ந‌ன்றாக‌ ப‌டித்தாலும் இய‌ற்கையாக‌வே அவ‌ன் அறிவாளி. ந‌ல்ல‌ புத்தி கூர்மையுள்ள‌வ‌ன். எதையும் எளிதில் புரிந்து கொள்ளும் திறமை இருந்த‌து. ஆனாலும் ஏனோ பாஸ்க‌ரின் க‌ள்ள‌ குண‌ம் ம‌ட்டும் என்று அவ‌னுக்கு புரிவ‌தில்லை. ஏனென்றால் பாஸ்க‌ர் அவ‌னுக்கான‌ கேட்டை என்றும் நேர‌டியாக‌ அவ‌னுக்கு தெரிந்து செய்வ‌தில்லை. வியாபாரியின் ம‌க‌ன் என்ப‌தால் சில‌ நுணுக்க‌ங்க‌ள் அவ‌னுக்கு இய‌ற்கையாக‌வே தெரிந்திருந்த‌து. யாரை பென்சிலையாவ‌து திருடி சிவாவின் பையில் போட்டு விட்டு, எப்ப‌டியாவ‌து அவ‌னை ச‌ம்ம‌ந்த‌ப்ப‌ட்ட‌வ‌ர்க‌ளிட‌ம் மாட்டி விட்டு விடுவான். சிவா அடிப‌ட‌ இருக்கும் போது குறுக்கே விழுந்து ச‌மாதான‌ம் செய்வ‌து போல‌ சிவாவிட‌மும் ந‌ல்ல‌ பெய‌ர் பெற்று விடுவான். இதன் கார‌ண‌மாக‌ சிவா த‌ன் வாழ்வின் மிக‌ முக்கிய‌ ந‌ப‌ர்க‌ளில் ஒருவனாக‌ பாஸ்க‌ரை எப்போதும் க‌ருதி வ‌ந்தான்.

ஒரு வ‌ழியாக‌ பொருளாத‌ர‌ ரீதியாக‌ க‌டும் சிர‌ம‌ங்க‌ளுக்கு கிடையில் த‌ன்னுடைய‌ ப‌தினொன்றாம் வ‌குப்பை முடிந்திருந்தான் சிவா. பாஸ்க‌ர் ப‌தினொன்றாம் வ‌குப்பில் வெற்றி பெற‌வில்லை. அத‌னால் இருவ‌ரும் க‌ல்லூரிக்கு போகவில்லை. தந்தையின் க‌டையை க‌வ‌னிக்க‌த் தொட‌ங்கினான் பாஸ்க‌ர். வேலை தேட‌ ஆர‌ம்பித்தான் சிவா. வேலைக்கு விண்ண‌ப்ப‌ம் அனுப்ப‌ கூட‌ அவ‌னுக்கு ப‌ண‌ம் கைவ‌ச‌மிருப்ப‌தில்லை. அத‌னால் த‌ன்னுடைய‌ புத்தி கூர்மையை உப‌யோக‌ப‌டுத்தி அந்த‌ ஊர்க்கு த‌பால் அனுப்பு வ‌ரும் அந்த‌ கிராம‌ம் ம‌ற்றும் சுற்றுவ‌ட்டு கிராம‌ ம‌க்க‌ளுக்கு த‌பால் எழுதுவ‌து, மணியாடார் அனுப்புவ‌து போன்ற‌ சிறு சிறு உத‌வி செய்து அதற்கு உத‌வி ஊதிய‌மாக‌ சில‌ காசுக‌ளை பெற்று விண்ண‌ப்ப‌ங்க‌ளை அனுப்பி வ‌ந்தான்.

சிவா நாள‌டைவில் அந்த‌ இட‌த்தில் சிறிய‌ க‌டை போடும் அள‌விற்கு வ‌ள‌ர்ந்துவிட்டான். த‌பால் நிலைய‌த்திலிருந்து அஞ்ச‌ல் அட்டை ம‌ற்றும் இன்லெண்ட் க‌வ‌ர், த‌பால் த‌லைக‌ள் ம‌ற்றும் ம‌ணியாட‌ர் பார‌ம்க‌ளை வாங்கி வ‌ந்து வைத்து ஒரு சிறு தொழில் போல‌வே ந‌ட‌த்தி அதில் இருந்து க‌ணிச‌மாக‌ வ‌ருமான‌ம் ஈட்ட‌ ஆர‌ம்பித்தான் நாளாடைவில் த‌பால்த‌லைக‌ளுக்கு ஒரு பைசா வீத‌ம் க‌மிச‌ன் வைத்தும் வியாபார‌ம் செய்ய‌ ஆர‌ம்பித்தான். ந‌ண்ப‌னின் வ‌ள‌ர்ச்சி பாஸ்க‌ருக்கு பொருக்க‌வில்லை. எப்ப‌டியாவ‌து வேலை கிடைத்து ஊரைவிட்டு போய்விடுவான் என்று நினைத்திருந்த‌வ்னுக்கு அவ‌ன் அங்கேயே த‌ன்னை போல‌ வியாபாரியாக‌ வ‌ள‌ர்வ‌து பிடிக்க‌வில்லை.

சிவா த‌பால் நிலைய‌ பொருட்க‌ளுக்கு க‌மிச‌ன் அடிப்ப‌டையில் காசு வசூலிப்ப‌து த‌வ‌று தான் என்றாலும் எழுத‌ ப‌டிக்க‌ தெரியாத‌வ‌ர்க‌ளுக்கு அவ‌ர்க‌ளுடைய‌ தபால் துறை ச‌ம்ம‌ந்த‌ப்ப‌ட்ட‌ உத‌விக‌ளையும் செய்து வ‌ந்தான். வேலை கிடைக்கும் வ‌ரை அவ‌ன் த‌ன்னுடைய‌ குடும்ப‌த்தை காப்பாற்ற‌ என்று ஆர‌ம்பித்த‌வ‌னுக்கு இது ந‌ல்ல‌ வியாபார‌ உத்தியாக தோன்றிய‌து. ஒரு முறை ஒரு பெரிய‌வ‌ரின் ம‌க‌ன் வ‌யிற்று பேர‌னுக்கு ஏதோ முக்கிய‌மான‌ அறுவை சிகிச்சைக்கு ப‌ண‌ம் அனுப்ப‌வேண்டிய‌ க‌ட்டாய‌ம். அந்த‌ நேர‌ம் பார்த்து த‌பால் நிலைய‌த்தில் ம‌ணியாட‌ர் நேர‌ம் முடிந்து போயிந்த‌து. அதை தானே கொண்டு கொடுப்ப‌தாக‌வும் போக்குவ‌ர‌த்து செல‌வுக்கு ம‌ட்டும் காசு த‌ரும்ப‌டியும் கேட்டான் சிவா. அந்த‌ பெரிய‌வ‌ரும் அதை த‌ந்துவிட‌ அவ‌ன் இதையே தொழிலாக‌ செய்தால் என்ன‌ என்று தோன்றிய‌து.

சில‌ ச‌ம‌ய‌ம் அவ‌ர‌ச‌மாக‌வும் க‌ண்டிப்பாக‌வும் சேர்க்க‌ வேண்டிய‌ த‌பால்க‌ளை அவ‌னே நேரில் சென்று ப‌ட்டுவாடா செய்து வ‌ந்தான். அத‌ற்கான‌ போக்குவ‌ர‌த்து செல‌வும் உரிய‌வ‌ர்க‌ளிட‌ம் ப‌கிர்ந்து பெற்றான். இந்த‌ வியாபார‌த்தில் அவ‌னுக்கு ந‌ல்ல‌ லாப‌ம் கிடைக்க‌ ஆரம்பித்த‌து. சிவாவின் வ‌ள‌ர்ச்சிக்கு கெடு நினைத்த‌ பாஸ்க‌ர் த‌பால் துறை அலுவ‌ல‌ர்க‌ளிட‌ம் புகார் ம‌னுவை அளித்தான். விசார‌ணை செய்த‌ த‌பால் துறையை சார்ந்த‌வ‌ர்க‌ள் சிவாவின் இப்ப‌டிப்ப‌ட்ட‌ த‌னியார் சேவைக்கு த‌குந்த‌ ப‌திவு செய்யாத‌ கார‌ண‌த்தால் அவ‌னுக்கு கோர்ட் மூல‌ம் த‌ங்க‌ள் வியாபார‌த்தை கெடுப்ப‌தாக‌ நோட்டீஸ் அனுப்பிய‌து. இத‌னால் க‌டும் ம‌ன உளைச்ச‌லுக்கு ஆளான‌ சிவா அத‌ற்கு பாஸ்க‌ர் தான் கார‌ண‌ம் என்ற‌தும் குடும்ப‌த்தோடு அந்த‌ ஊரை விட்டே சென்றான்.

அருகில் இருந்த‌ பெரிய‌ ப‌ட்ட‌ணத்தில் போய் வேலையும் தேடிக் கொண்டே த‌னியார் நிறுவ‌ன‌ம் ஒன்றை ப‌திந்து அதன் மூல‌ம் க‌மிச‌ன் பெய‌ரில் ப‌ண‌ப‌ட்டுவாடா ம‌ற்றும் குரிய‌ஸ் ச‌ர்வீஸ் போன்ற‌வ‌ற்றை ஆர‌ம்பித்தான். தானே வேலை தேடி கடும் சிர‌ம‌ங்க‌ளை க‌ண்டு இருந்த‌வ‌ர்ன் த‌னியார் வேலைவாய்ப்பு அலுவ‌ல‌க‌ம் ஒன்றை கூட ஆர‌ம்பித்தான். இப்ப‌டியாக‌ கொஞ்ச‌ம் கால‌த்தில் அவ‌ன் பெரும் தொழில் அதிப‌ர் ஆகி நிறைய‌ பேருக்கு வேலை த‌ந்தான். லட்சாதிப‌தியானான். சிவாவை இவ்வ‌ள‌வு பெரிய‌ ம‌னித‌னாக்கிய‌ பாஸ்க‌ர் அதே கிராம‌த்தில் அதே ப‌ல‌ச‌ர‌க்கு க‌டையில் அதே நிலையில் இருந்தான். கேடு நினைப்ப‌வ‌னும் கெடுவ‌தில்லை சில‌ ச‌ம‌ய‌ம்.

- லாவ‌ண்யா சுந்த‌ரராஜ‌ன்

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி II

2010-04-04T21:58:00.000-07:00

சங்கப்பாடலில் இருக்கும் சிக்கலே அதை நாம் உள்வாங்கி கொள்ளும் விதமே. இந்த சிக்கலுக்கு பெரும் சவாலாக இருக்கின்றது இதன் மொழி. மொழி நமக்கு புரியாதவரை இப்பாடல்களுக்கு எழுதப்பட்டிக்கும் உரையையே நாம் பெரிதும் நம்ப வேண்டி இருக்கின்றது. உரை எழுதுவரின் புரிதலும், அவர் கற்பனைக்கு எட்டும் விசயங்கள் சங்கபாடல் களத்தில் எல்லையை வகுக்கின்றது. எனக்கும் அப்படி சில சங்கப்பாடல்கள் சிக்கலை வகுத்தன. அப்பாடலின் வரும் சில வார்த்தைக்கு வேறு அர்த்தம் எடுத்தால் முழுப்பாடலின் பொருளே மாறிவிடுகின்றது. அப்படி பொருள் மாறும் கூறப்பட்ட உணர்வு நிலையும் மாறிவிடுகின்றது. அப்படிப்பட்ட உணர்வு நிலையையும் முடிந்த அளவில் பொருத்தி சில கவிதைகளை எடுத்துக் காட்டியுள்ளேன்.

கைந்நிலை (பாட‌ல் 2) - உணர்வு நிலை தனிமையில் உடல் வாதை

வெந்த புனத்துக்கு வாசம் உடைத்தாகச்
சந்தனம் ஏந்தி, அருவி கொணர்ந்திடூஉம்
வஞ்ச மலை நாடன் வாரான்கொல்? - தோழி! - என்
நெஞ்சம் நடுங்கி வரும்

பகுதி ஒன்றில் சொல்லப்பட்ட கைந்நிலை பாடலின் வரும் வெந்தபுனம் என்ற வார்த்தையை வெந்த + புனம் என்று பிரிந்து பார்த்தால் அப்பாடலின் பொருளே முற்றாக மாற வாய்ப்பிருக்கின்றது வெந்த என்பது முதிர்ந்த அல்லது அடர்ந்த என்ற பொருளாக நாம் உட்கொள்ளவும் இயலும். அப்படிப்பட்ட பொருள் எடுக்கும் போது இந்தப்பாடலின் முழு பொருளும் உணர்வு நிலையும் மாறிவிடுகின்றது.

அடர்ந்து முதிர்ந்த காட்டில் மேலும் சுகந்தமாக்க சந்தன மணத்தை சுமந்து வருக்கின்றது அருவி. அப்படிப்பட்ட அடர்ந்த காட்டினை சார்ந்தவர் நம் தலைவன், அவர் வரும் வழியில் காட்டின் அடர்ந்த தன்மையாலும், அருவிக்கு நீர் வரும் மிருகங்களாலும் பல ஆபத்துகள் இருக்கலாம் அதை நினைத்தும் அதனால் அவன் வாராது போய் விடுவோனே என்று எனக்கு நடுக்கமாக இருக்கின்றது என்று தோழியிடம் கூறுகின்றாள்.

இப்படி தலைவி புலம்ப காரணம் தலைவன் மேல் கொண்ட காதலும், காதலால் தனிமையுற்ற தன் உடல் படுத்தும் பாடேயன்றி வேறென்ன காரணமாக இருக்க இயலும்.

இப்படிப்பட்ட பிரிந்த அல்லது இழந்த காதலை பற்றி அழகான பல படிமங்களை சூரியன் தனித்தலையும் பகல் கவிதை தொகுப்பில் பல இடங்களில் தொகுத்து கொடுத்திருக்கின்றார் தமிழ் ந‌தி. ஒரு நாளும் இரண்டு அறைகளும் என்ற கவிதையில் (கவிதையின் கரு வேறு ஆனால் இந்த சங்கப்பாடலுக்கு உகந்த வரிகள் என்பதால் இந்த வரிகளை இங்கே குறிப்பிடுகின்றேன்)

“நெடுநாளாய்த் தீண்டப்படாத மார்புகள்
கண்ணீர்த் துளிகளெனத் ததும்புகின்றன”

பிரிந்த தலைவனை நினைத்து புலம்பும் தலைவி தன் உடல் வாதையை இதை விட அளவாக அழகாக சொல்ல இயலுமா என்று வியக்கிறேன். இந்த தனிமையும் தவிப்பும் இன்னும் பல இடங்களில் பதியப்பட்டிருக்கின்றது. அதே தொகுதியில் வண்ணங்களாலான நீர்க்குமிழி என்ற கவிதையில்

"பூட்டப்பட்ட அறையினுள்
விலங்கென அலைகிறது வேட்கை"

தொட‌ரும்...

குறிப்பு: இந்த‌ தொட‌ர் க‌ட்டுரையின் சில‌ ப‌குதிக‌ள் அக‌நாழிகை மார்ச் இத‌ழில் கைந்நிலை சில‌ பாட‌ல்க‌ளும் க‌னிமொழியின் அக‌த்திணையும் என்ற‌ த‌லைப்பில் க‌ட்டுரையாக‌ வெளி வ‌ந்திருக்கின்ற‌து. ச‌ங்க‌ப்பாட‌ல்க‌ளும் த‌ற்கால‌ பெண்க‌விஞ‌ர்க‌ளும் என்ற இந்த‌ ஆக்க‌ம் அக்க‌ட்டுரையின் நீட்சியே. வெளியிட்ட அக‌நாழிகைக்கு என் சிர‌ம் தாழ்ந்த‌ வ‌ந்த‌ன‌ங்க‌ளும் ந‌ன்றியும்

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி I

வார்த்தைக‌ளின் வீடு

2010-03-29T22:42:00.000-07:00

சிறுபிள்ளைக‌ள் அடுக்கி
விளையாடும் சீட்டுக்க‌ட்டு
வீடென‌ வார்த்தைக‌ளாலான‌ ஒன்றை
வெண்சாம‌ர‌ சிற‌குக‌ளால்
கட்டி வைத்திருந்தேன்

எந்த‌ நொடியும்
உடைந்திட‌வே காத்திருக்கும்
அச்சிறு வீட்டை
க‌ண்ம‌ணியாய் பாதுகாத்திருந்தேன்

க‌ண் ப‌ட்டு சித‌றிய‌
வாழ்ந்து கெட்ட‌ குடும்ப‌மென‌
மென்மேலும் அடுக்க‌ப்ப‌ட்ட‌ வார்த்தைக‌ளால்
கைமீறி சிதைந்து ப‌ர‌வின‌ சிற‌குக‌ள்
வீட்டின் வ‌டிவ‌ம் உதிர்த்து

ஒற்றை சிறகொன்று
உன் ப‌ற்றுத‌லுக்காய்
அங்குமிங்கும் அலைந்திருந்த‌து.

நத்தையின் கூட்டுக்குள் ஒளிந்தவள்

2010-03-23T01:47:00.000-07:00

க‌ன‌வில் நின் கண்கள்
காய்ந்தீயலென
துரத்திக் கொண்டிருக்க
ஒளியவே இடமின்றி
தேடியெடுத்தேன்
நத்தையின் கூடொன்றை

செய்யாத குற்றத்திற்கும்
மருளுமென் இதயத்திற்காக‌
இன்னுமின்னும்
உடல் சுருக்கி அடங்கிக் கொள்ள
கூடதிரத் தொடங்கியது ஒரு க‌ண‌த்தில்

ஓற்றைக் காலூன்றித் த‌வ‌மிருந்து
காய‌ங்க‌ள் ம‌றைய‌ காத்திருக்கிறேன்
கால‌மும் ந‌த்தையாகி ஊர்ந்து ந‌க‌ர‌
ஏக்க‌ங்க‌ளை
அனிச்சையாய்
சேலைப்பூக்கள் போல‌ உதிர்த்து
ப‌ற‌க்கிறேன் வனதேவதையாய்.

கோப‌ம் ச‌ருகென‌ உதிரும் போது

2010-03-21T22:11:00.000-07:00

சோப்பு நுரைக‌ளில் சுழ‌ன்றாடும்
வ‌ண்ண‌ நிற‌ங்க‌ளால் ‌
நெய்ய‌ப்ப‌ட்டிருக்கின்ற‌ன‌
உன் மீதான‌ என‌து கோப‌ங்க‌ள்

மாய‌க்கோபுர‌ங்க‌ளில் ப‌டிந்த‌ நிழ‌ல்
ச‌ருகென‌ உதிர்வ‌தைப்போல்
பிரிய‌ங்க‌ளை உதிர்த்த‌ப‌டி
இருக்கின்ற‌து உன் கோப‌ம்

பொய்க் கோப‌ங்க‌ளை
கொண்டாடும் ‌பிம்ப‌ங்க‌ளை
ப‌ற்றிக்கொண்டு புகையென‌க்
க‌ரைகின்ற‌து ந‌ம‌துட‌ல்

கோப‌ம் தெளிந்தழிந்த க‌ண‌மொன்றில்
ஆழ்ந்த‌ மௌன‌த்தில்
த‌டுமாறுகின்ற‌ன‌
வார்த்தைக‌ள‌ற்ற‌ சமாதான‌ங்க‌ள்.

வெளியிட்ட‌ உயிரோசை இணைய‌ இத‌ழுக்கு என் ந‌ன்றி.

- லாவண்யா சுந்தரராஜன்

விக்ரமாதித்தனும் வேதாளமும்

2010-03-17T19:46:00.000-07:00

சற்றும் மனம் தளராத
விக்ரமாதித்தன் முருங்கை மரமேறி
வேதாளத்தை சுமந்தபடி இறங்கினான்

வேதாளம் கதை சொல்ல ஆரம்பித்தது
அவன் இவனுக்கு நண்பன்
இவள் அவளுக்கு தோழி

இவள் இவனின் காதலி
என்று அவளிடம் சொல்லி இருந்தாள்
ஆனால் அது அவனுக்கு தெரியாமல் இருக்கலாம்

அவன் அவளின் காதலன்
என்று இவளிடம் அவன் சொன்னான்
சொன்னபின் பொய் என்றும் சொன்னான்
இவளும் அந்த விசயத்தை இவனிடம் சொல்லி இருந்தாள்

இவள் அவனுடன் பேசிய போது
அவளுடன் வெளியே சென்றேன் என்றான்

அவனும் இவனும் சந்தித்தார்கள்
இவளும் அவளும் வேறுவேறு இடத்தில் இருந்தார்கள்
இவள் அவளிடம் பேசும் போது
அவளும் வெளியே சென்றதாக சொன்னாள்
இவள் இதை இவனிடம் சொல்லவில்லை

அவனுக்கு அவளுக்கும் உண்மையாகவே காதல் இருந்ததா
இவனும் இவளும் காதலிப்பது
அவனுக்கு தெரியவந்திருக்குமா

உனக்கு விடை தெரிந்தும் சொல்லவில்லை என்றால்
உன் மண்டை சுக்குநூறாகும் என்றது
விக்ரமாதித்யன் ஙே என்று விழிக்க
வேதாளம் மீண்டும் முருங்கை மரம் ஏறியது

- லாவண்யா சுந்தரராஜன்

கார‌ணிக‌ள் வேறில்லாத‌வை

2010-03-07T03:26:00.000-08:00

தாழப் ப‌றந்திடும் மேக‌மொன்று
பிடிவாத‌மாய்
இட‌ம் மாறி மாறி
ம‌றைந்திருக்கும் உனது
பாறைப் பிரிய‌ங்க‌ளில் பொழிவிக்க‌
காத்திருக்கும் அட‌ர்ம‌ழையை

காற்றை அலைக்க‌ழிக்கும்
பிரிய‌ங்க‌ளில் நிழ‌ற்குடை
க‌டும் சிர‌ம‌த்தோடு த‌ன்னை
ஆழ‌ப் ப‌ற்றிக் கொண்டு
உன‌து வெயிலிலும் ம‌ழையிலும்
ந‌னைந்த‌ப‌டி த‌ந்திருக்கும் நிழ‌லினை

பெருங்கருணையோடிருக்கும்
பிரிய‌ங்க‌ளுக்கும் பிரிய‌மென்ப‌தை
த‌விர‌
கார‌ணிக‌ள் வேறு
எப்போதுமில்லை

-லாவண்யா சுந்தரராஜன்

உணர்வு நிலை சங்கப்பாடல்களும் தற்கால பெண்கவிஞர்களும் - ப‌குதி I

2010-03-04T20:01:00.000-08:00

ச‌ங்க‌பாட‌ல்க‌ளில் ஏனோ பெரும் ஈர்ப்பென‌க்கு. ஏன் என்று சொல்ல‌வியலாத‌ ஆவ‌ல். அவ்வ‌ப்போது சில‌ க‌விதைக‌ளை வாசிப்ப‌தும் அது சொல்ல‌ வ‌ரும் ஆழ்க‌ருத்துக்க‌ளை உள்வாங்கி அசைபோடுவ‌தும் பின் அப்ப‌டியே விட்டு விடுவ‌துமாக‌ ந‌க‌ர்ந்த‌ப‌டி இருந்த‌து என் ப‌ய‌ண‌ம்.

ச‌மீப‌ கால‌மாக‌ சில‌ பெண்க‌விஞ‌ர்க‌ளின் தொகுப்பை தொட‌ர்ந்து வாசிக்கும் போது ஆழ்ம‌ன‌தில் புதைந்து கிட‌க்கும் சில‌ ச‌ங்க‌ப்பாட‌ல்க‌ளில் சொல்ல‌ப‌டும் ஒரு சில‌ விச‌ய‌ங்க‌ள் அப்ப‌டியே ஒரு மென் அலை போல‌ க‌ண் முன் வ‌ந்து போகும்.

பசி, தூக்கம், காமம் என்ற அடிப்படை உணர்வு நிலை சங்ககாலம் முதல் இந்த காலம் வரை தொடர்வதே. உணர்வுகள் எதுவும் புதிதில்லை எல்லாமே எப்போதும் உணரப்பட்டதாகவே இருக்கின்றன். ஆனால் ஒவ்வொருவரும் அதை வெளிப்படுத்தும் விதமே வேறாகும்.

ப‌தினென்கீழ்க‌ண‌க்கு நூல்களில் கைந்நிலை, ஐந்திணை எழுபது, திணைமொழி ஐம்பது மேலும் குறுந்தொகை இவற்றில் இருந்து கவர்ந்த சில பாடல்களில் உணர்வு நிலை அப்படியே ஒத்தும் அல்லது அதே உணர்வை வேறு வடிவத்திலும் படம் பிடித்திருக்கும் தற்கால பெண்கவிஞர்களில் சில கவிதைகளையும் தொகுத்து வழங்க நினைத்திருந்தேன்.

இதை ஒரே க‌ட்டுரையாக்காம‌ல் ஒரு தொட‌ராக‌ வ‌ழ‌ங்க‌ நினைத்திருக்கிறேன்.
என்னை வாசிக்கும் அன்ப‌ர்க‌ள் தொட‌ர்ந்து என‌க்கு அளிக்கும் ஊக்க‌த்திற்கு என்னுடைய‌ ம‌ன‌மார்ந்த‌ ந‌ன்றிக‌ள். அவ‌ர்க‌ள் இதையும் வாசிப்பார்க‌ள் என்ற‌ ந‌ம்பிக்கையோடு...

கைந்நிலை (பாட‌ல் 2) - உண‌ர்வுநிலை ந‌ம்பிக்கையின்மை

வெந்த புனத்துக்கு வாசம் உடைத்தாகச்
சந்தனம் ஏந்தி, அருவி கொணர்ந்திடூஉம்
வஞ்ச மலை நாடன் வாரான்கொல்? - தோழி! - என்
நெஞ்சம் நடுங்கி வரும்

வெந்த‌ காட்டிற்கு அத‌ன் வாச‌ம் மாறி சுக‌ந்த‌ம் உண்டாகும் வண்ணம் ச‌ந்த‌ன‌ம் ஏந்தி வ‌ரும் அருவியை கொண்ட‌ ம‌லைக‌ளை உடைய‌ த‌லைவ‌ன் வ‌ருவானோ அல்ல‌து ராம‌ல் போவானோ என்று என் நெஞ்ச‌ம் ந‌டுக்குகின்ற‌து என் தோழி என்ப‌தே இந்த‌ பாடலின் பொருள்.

இந்த‌ வெந்த‌ காடு என்ப‌து ஒரு ப‌டிம‌ம். த‌லைவ‌ன் இன்னும் தலைவியை ம‌ண‌க்க‌வில்லை அவ‌ளோடு காத‌ல் கொண்டு அல்லது அவ‌ளை காத‌ல் கொள்ள‌ செய்து பிரிந்து போய் விட்டான் என்பதையும் அவ‌ன் பிரிந்த‌ துய‌ரையே அப்ப‌டி சொல்லி இருக்கின்றாள் என்ப‌தே இந்த‌ பாட‌லின் சிற‌ப்பு. வெந்த‌ காட்டிற்கு சந்த‌ன‌மிட்டு அதன் நாற்ற‌த்தை போக்க‌ இய‌லுமா என்ன‌? காடு வெந்து கிடந்தாலென்ன‌ த‌ன் பாட்டுக்கு ச‌ந்த‌ன‌ ம‌ண‌ம் ப‌ர‌ப்பி ஓடிக் கொண்டிருக்கின்ற‌து அருவி. அது வாச‌ம் ப‌ர‌ப்புவதை போன்ற‌ ஒரு மாயை ந‌ம்பி இருப்ப‌தை போல‌வே தானும் த‌லைவ‌ன் வருவானோ என்று ந‌டுக்க‌முற்று இருப்ப‌தாக‌ குறிப்பாக‌ உணர்த்துகின்றாள்.

அவ‌ள் ப‌ச‌லையை ம‌றைத்து, திரும‌ண‌ம் த‌விர்த்து த‌லைவ‌னும் வருவானோ மாட்டானோ என்று ந‌ம்பிக்கை த‌ள‌ர்ந்து ந‌டுக்க‌முறுவ‌தாக‌ கூறும் இவ‌ள் ந‌ம்பிக்கையின்மையை ஒத்து இருக்கின்ற‌து கனிமொழியின் சிக‌ர‌ங்க‌ளில் உறைகின்ற‌து கால‌ம் என்ற தொகுதியில் இருக்கும் வில‌க‌ல் என்ற‌ க‌விதை. க‌விதையின் க‌ரு முற்றாக‌ வேறு ஆனால் இர‌ண்டுக்கும் ஆதார‌ம் இழையோடும் ந‌ம்பிக்கையின்மை

எப்ப‌டிச் சொல்வாய் என்று ஆர‌ம்பிக்கும் இக்க‌விதையில் இவ‌ரின் பிரிய‌த்துக்குரிய‌ ஒருவ‌ரை சார்ந்த விச‌ய‌மொன்று இவ‌ருக்கு தெரிந்து விட்ட‌து அந்த‌ விச‌ய‌த்தை அவ‌ர் கூறுவாரோ அல்ல‌து சொல்லாம‌லே விடுவாரோ என்ற‌ ந‌டுக்க‌ம் க‌விதை முழுவ‌தும் பரவி இருக்கின்ற‌து. அந்த‌ பிரிய‌மான‌ ந‌ப‌ருக்கு அது ச‌ந்தோச‌ம் தரும் விச‌ய‌ம் தான் இனிப்போடு வ‌ருவாயோ என்று கேள்வியூடே இதை ந‌ம‌க்கு உண‌ர்த்துகின்றார் க‌னிமொழி. ஆனால் அந்த‌ விசயத்தை இவ‌ரிட‌ம் சொல்ல‌ த‌யங்கும் அல்ல்து சொல்லி விட்டு த‌ன்னுடைய‌ உற‌வை முறித்துக் கொள்வாரோ என்ற‌ ப‌ய‌த்தை என் க‌ண்க‌ளை த‌விர்த்து கூறுவாயோ என்று கேட்டு ந‌ம் ம‌ன‌த்தையும் ஆழ‌ பாதிக்கின்றார். இவ‌ருக்கு மிக‌ நெருக்க‌மான‌வ‌ர் என்ப‌தையும் விய‌ர்வைத் துளிக‌ள் காய‌த்துவ‌ங்கும் கிற‌ங்கிய‌ த‌ருண‌த்திலா என்று கேட்டு விள‌க்குகின்றர். இவ்வ‌ள‌வு நெருக்கம் ஆயினும் ஏதோ கார‌ணத்தால் சொல்லாம‌ல் கூட‌ பிரிந்து விடுவாயோ என்ற‌ வ‌லியை அழுந்த‌ கூறி இருக்கின்றார்.

எப்போது சொல்வாய்
என்று காத்திருக்கின்றேன்
ந‌ல்லெண்ண‌ங்க‌ளையும்
புன்ன‌கையையும்
ஒரு நேர்க்கோட்டில் குவித்து
உன் க‌ண்க‌ளைச் ச‌ந்தித்து
உறுதியான‌ கைகுலுக்க‌லுட‌ன்
வாழ்த்துச் சொல்ல‌...

வழியினுடேயும் உன்னை வாழ்த்த‌வே இருக்கும் என் அன்பை புரிந்து கொள் என்று கூறி த‌விக்கும் இந்த‌ க‌விஞ‌ரின் ம‌ன‌த்தில் இருக்கும் ந‌ம்பிக்கையின்மை ஆறுத‌ல் நாடி த‌விக்கும் இவ‌ர‌து க‌வி வ‌ரிக‌ள் ம‌ன‌திலிருந்து நீங்க‌ நீண்ட‌ நாட்க‌ள் ஆன‌து.

தொட‌ரும்....

கான‌ல் ந‌தி க‌ல‌ந்த‌ க‌ட‌லொன்று

2010-02-27T22:59:00.000-08:00

என் நினைவு காக்கையின்
கால்க‌ளில் பின்னி
தோகையாக‌ காத்திருந்த‌து
மின்சார‌ க‌ம்பியில்
உல‌ர்ந்து கொண்டிருந்த‌
பாலிதீன் பை ஒன்று

மேக‌ம் கிழித்து விருட்டென‌
மேலேறிக் கொண்டிருந்த‌
ராக்கெட்டின் வாலென‌ நீண்ட
புகைக் க‌யிறு அதை
ப‌ற்றி ஏறி வ‌ர‌
மேலே மேலே ப‌ற‌ந்து கொண்டே
அழைப்பு விடுத்த‌து

நீல‌ம் பூத்த‌ நெருப்பொன்று
நிற‌ம் மாறிய
தாம‌ரையோ குவ‌ளையோ
அல்ல‌து என‌க்கு பிடித்த‌
ம‌ல‌ரொன்றின் வ‌சீக‌ர‌த்தை ஏற்ப‌டுத்தி
சூடிக் கொள்ளுமாறு
தூண்டில் போட்ட‌து

கான‌ல் நதி க‌ல‌ந்த‌
க‌ட‌லொன்றில்
நீச்ச‌ல் க‌ற்கும் ஆர்வ‌த்தில்
ம‌கிழ்ந்து குதித்திருந்தேன்
ஆழிப் பேர‌லை
என்னை அமிழ்த்தி இழுக்கும்
என்ப‌தை அறியாம‌லே

-லாவண்யா சுந்தரராஜன்

உறங்க மறுக்கும் உரையாடல்கள்

2010-02-21T20:16:00.000-08:00

முடியாத உரையாடலின் முடிவில்
விரவிடும் மௌனத்தை போர்த்தியபடி
உறங்க போகிறேன்

மெத்தென பதியும்
தலையணையில் உறுத்தியபடி
இருக்கும் காதணியாக
என்னை திரும்பி திரும்பி
படுக்க செய்கிறது என்னுடன்
உறங்க வந்த உரையாடலில்
சில நெருடிய வார்த்தைகள்

வரவேற்பறையிலேயே நான்
வைத்துவிட்டு வந்த
உரையாடலின் சில வார்த்தைகள்
அங்குமிங்கும் உலாவி
ஒளிர்ந்தபடி இருக்கின்றன
உறங்க மறுத்து.

-லாவ‌ண்யா சுந்த‌ர‌ராஜ‌ன்

ஏமாற்றம்

2010-02-19T23:13:00.000-08:00

அம்மாயி வீட்டு வாச‌ல்
சாண‌ம் ம‌ண‌க்கும்
மாக்கோல‌ம் போடுவாங்க‌

பின்ன‌ அவ‌ங்க‌ வாச‌ல்
சிமெண்ட் ஆச்சு
மாமாலு கோல‌ மாவுல‌ தான்
கோல‌ம் போடுவாங்க‌

இப்போ மாமாலு ம‌ருமக‌
பெயிண்ட் அடிச்சி
வாச‌ல்ல‌ நிர‌ந்த‌ர‌மா
கோல‌ம் போட்டு இருக்கா

பெயிண்ட் கோல‌ம் முக‌ர்ந்த‌
எறும்பு கொஞ்ச‌ம் த‌டுமாறி

வாச‌ல் தாண்டி
ச‌மைய‌ல‌றை ச‌க்க‌ரை ட‌ப்பா
தேடி வ‌ந்துச்சி

-லாவண்யா சுந்தரராஜன்

நினைவுக‌ளிலிருந்து பிற‌ழ்ந்த‌ ப‌ருவ‌ம்

2010-02-18T00:23:00.000-08:00

ப‌தின்ம‌ வ‌ய‌து நினைவுக‌ளை என்னை ப‌திய‌ அழைத்த‌ யாழினிக்கு என் ந‌ன்றிக‌ள்.என‌க்கு ப‌தின்ம‌ வய‌தின் நினைவுக‌ள் எதுவுமே அதிக‌ம் நினைவில் இல்லை வீட்டு க‌டைப்பெண் என்ப‌தாலும் மேலும் நான் ப‌தின்ம‌ வ‌ய‌தில் இருந்த‌ ச‌ம‌ய‌ம் என் அக்காக்க‌ளுக்கு திரும‌ண‌ம் ந‌ட‌ந்து அவ‌ர்க‌ளுடைய‌ வாழ்வின் ப‌ல‌ இன்ன‌ல்க‌ள் என் வ‌ய‌திற்கு உரிய‌ எந்த‌வித‌ ம‌கிழ்வையோ ஆழ் நினைவுக‌ளையோ வைத்திருக்க‌ உத‌வ‌வில்லை.

மேலும் ப‌தின் ப‌ருவ‌த்து முதிர்வு ம‌ற்றும் சிந்த‌னை என‌க்கு இப்போதுதான் இருப்ப‌தாக‌ உண‌ர்கிறேன். என் அம்மா நீ இன்னும் வ‌ள‌ர‌வே இல்லைடின்னு இப்போதும் சொல்வ‌த‌ற்கு இந்த‌ ம‌ன‌நிலையே கார‌ண‌மாக‌ இருக்க‌லாம். ம‌ன‌து எப்போதும் ப‌தினாறை தாண்டி வ‌ருவ‌தில்லையே. அத‌னால் த‌ற்ச‌ம‌ய‌ம் ந‌ட‌க்கும் ஏதாவ‌து சில‌ நிக‌ழ்வை எழுதி இந்த‌ ப‌திவை சுவார‌ஸிய‌மாக‌ ஆக்க‌லாமா என்று நினைக்கிறேன்.

ச‌ரி விச‌ய‌த்துக்கு வ‌ருவோம் என் ப‌தின்ம‌ வ‌ய‌து ஆர‌ம்ப‌த்தில் என் முத‌ல் அக்காவின் திரும‌ண‌ம் ந‌ட‌ந்த‌து. அக்கா என‌க்கு ஒரு ம‌று அன்னை. மிக‌ பிரிய‌மாக‌ இருப்பாள். அவ‌ள் திரும‌ண‌ தின‌ம‌ன்று அவ‌ள் ம‌ட்டும் மாமாவுட‌ன் காரில் ஏறி சென்ற‌ போது என்ன‌வென்றே தெரியாத‌ ம‌ன‌ம் பிழியும் உண‌ர்வுட‌ன் அழுத‌ வ‌ண்ண‌ம் அந்த‌ காரை பின் தொட‌ர்ந்து ஓடிய‌து ம‌ட்டுமே நினைவிருக்கின்ற‌து.

அத‌ன் பின் அவ‌ள் த‌லை தீபாவ‌ளிக்கு வ‌ந்த‌ போது மாமா வாங்கி வ‌ந்த‌ புதுச்ச‌ட்டை ம‌ற்றும் பாட்டாசு என்னை ம‌கிழ்வித்தாலும் அக்கா மாமாவுட‌ன் பாச‌மாக‌ இருந்த‌து மிகுந்த‌ வ‌ருத்த‌தை த‌ந்த‌து.

மேலும் அவ‌ள் த‌லைப்பிர‌வ‌ச‌த்திற்கு வீட்டிற்கு வ‌ந்திருந்த‌ போது நீ வேற‌ இட‌த்தில் ப‌டுத்துக்கோம்மா வ‌யித்துல‌ உதைச்சிட்டா என்ன‌ ஆவ‌ற‌து என்று அவ‌ள் சொன்ன‌ போது முற்றுமாக‌ அக்காவிட‌ம் இருந்து நான் வில‌க்க‌ப்ப‌ட்டு உண‌ர்ந்து மிக‌வும் க‌வ‌லையோடும் ம‌ன‌ம் வ‌ருந்தியுமிருந்தேன்.

என்னுடைய‌ இர‌ண்டாம் அக்காவின் திரும‌ண‌ம் என் ப‌தினான்கு வ‌ய‌தில் ந‌ட‌ந்த‌து அப்போது முத‌ல் அக்காவின் திரும‌ண‌த்தில் ம‌ன‌ம் பாதித்ததை போல‌ அதிக‌ம் பாதிப்பில்லை. ப‌ழ‌கி இருந்தேன் மேலும் கொஞ்ச‌ம் ம‌ன‌ம் முதிர்ச்சியும் பெற்றிருந்தேன்.

ப‌தின்ம‌ வ‌ய‌தில் என‌க்கு தோழிக‌ளில் ஒருத்தி ம‌ட்டுமே இப்போது என்னோடு தொட‌ர்பில் இருக்கின்றாள். மேலும் ப‌தின்ம‌ வ‌ய‌து முழுதும் த‌னிமை ம‌ட்டுமே அதிக‌ம் தோழ‌மையோடு இருந்தாலும் என‌க்கு தோழிக‌ள் அதிக‌ம்.

என்னுடைய‌ தோழி மால‌தி என்ற‌ பெண்ணுக்கு த‌ன் மாமாவின் மேல் மிக‌ பிரிய‌ம். ஆனால் அவ‌ன் அவ‌ளை அதிக‌ம் விரும்புவ‌தில்லை. என‌க்கு இந்த‌ விச‌ய‌ம் செய்ய‌லாம் இது கூடாது என்ற‌ அறிவு அன்னிலிருந்து இன்றுவரை கிடையாது. நான் தீபாவ‌ளிக்கு ஒரு த‌னித்த‌ க‌ருவேல‌ ம‌ர‌ம் இருக்கும் வாழ்த்து அட்டையை வாங்கி. நீ மால‌தியை விரும்பாவிட்டால் இப்ப‌டித்தான் த‌னித்த‌ ம‌ர‌மாகி நிற்பாய் என்று எழுதி மால‌தியின் மாமா இல்ல‌த்துக்கு அனுப்பிவிட்டேன். அந்த‌ பைய‌ன் வ‌ந்து என் அம்மாவிட‌ம் சொல்ல‌ என‌க்கு ந‌ல்ல‌ ம‌ண்ட‌க‌ப‌டி ந‌ட‌ந்த‌து.

இது போல‌ தூது போக‌ க‌டித‌ம் கொடுக்க‌ வெளியூர் போய் அவ‌ர்க‌ள் மண்ட‌ப‌த்தில் இருக்க‌ நான் காவ‌லுக்கு என்று என் தோழிக‌ள் யாவ‌ரும் அவ‌ர்க‌ள் போதைக்கு என்னை ஊறுகாயாக‌ உப‌யோக‌ம் செய்து கொண்ட‌ன‌ர். ந‌ட்பென்றால் உயிர்விடும் குண‌மாச்சே தோழிக்க‌ள் தேர்வு சரியா த‌வ‌றா என்று தெரியாம‌லேயே அவ‌ர்க‌ளுக்கு உத‌வ‌ முன்னால் நிற்பேன். இது உத‌வி தானே என்று கூட‌ தெரியாது.

உல‌க‌ம் அறியா பெண்ணாக‌த் தான் இருந்தேன் க‌ல்லூரியில் இணைந்து என் ப‌தின்ம‌ வ‌ய‌து முடியும் வ‌ரை. இந்த‌ கார‌ண‌த்தாலேயே எல்லோரும் கேலிச் சித்திர‌மாக‌ என்னை வைத்தே சிரிந்து ம‌கிழ்வ‌ர். என்னால் பிற‌ர் ம‌கிழ்ந்திருக்க‌ செய்ய‌ முடிந்த‌து நினைத்து இன்றும் ம‌கிழ்கிறேன். ம‌ற்ற‌ப்ப‌டி வேறு ஒன்றும் பிர‌மாத‌மாக‌ ந‌ட‌க்க‌வில்லை என் வாழ்வில். ஆங்.. காத‌லா அது ந‌ல்ல‌வேளை இருப‌து வ‌ய‌துக்கு அப்புற‌ம் வ‌ந்த‌து அதனால் இந்த‌ ப‌திவில் சொல்ல‌ தேவையில்லை. :)

(சின்ன‌ குறிப்பு ம‌ட்டும் ஆண்டாள் காத‌ல் போன்ற‌து அந்த‌ காத‌ல், ஆனால் அந்த‌ ந‌ப‌ர் என்னை ம‌ண‌க்க‌ கொடுத்து வைக்க‌வில்லை)

ப‌தின்வ‌ய‌து நினைவுக‌ள் தொட‌ரை தொட‌ர‌ ப‌திவர் ‘சுகிர்தா‘ வை அழைக்கிறேன்.

காதலும் காதல் நிமித்தமும்

2010-02-15T20:21:00.001-08:00

1. கண்டு வந்த நாளில்

விண்ணைத் தாண்டி வந்த உயிர்ச்சுடரொன்று
உன்னை அடையாளம் காட்டியது
சுற்றியொரு ஒளிவட்டம் பரவக்கண்டேன்
தேவமணி ஒலிக்க கண்டேன்
நான் தேடிய நா(எ)னை அன்றே கண்டேடுத்தேன்

2. பற்றுதலுக்காய் ஓர் பார்வை

என்னிமை வருடி சென்றதுன் பார்வை
கண்ட காட்சி எங்கும் நீயாக
நேசம் கலந்த நெஞ்செங்கும் உன் சுவடுகளாக
சுவாசமெங்கும் உன் பற்றுதலுக்காக
மெல்ல உடைந்தபடி இருந்தேன்

3. தேவ வினாடிகளில்

தேர்ந்தெடுத்த தேவ வினாடிகளில்
உதிர்த்தெறிந்த நேசமிகும் சொற்கள் யாவும்
உன் உயிரோடு எனை கரைத்திருந்தது
நெஞ்சோடு கலந்த நேசம் மலர்ந்திருந்தது

4. சிறகைப் போலொரு நேசம்

உனக்கான என்னை ஏந்திக்கொண்டாய் சிறகென
கனவுகள் வரைந்து வைத்த வெளிகளில்
பறந்திருந்தோம்
மீண்டு வர இயலாத பல தேசங்களுக்கு

5. சொல்லாது விடுபட்டவை

எதுமற்ற ஒரு கணத்தில்
மௌன நீர்க்குமிழிகள் வெடிக்க
நிறைந்து வழிந்த வெறுமையில்
நீந்தியடியபடி இருந்தது
சொல்லாத சொற்களெல்லாம்

6. கதை போலும் வாழ்க்கை

எதையும் பற்றியெரிக்கும் நெருப்பென
வீசி கொண்டிருந்தோம் குற்றச்சாட்டுகளை
காற்றலைக்கழித்த காய்ந்த சருகென
நதியோடு நகர்ந்து கொண்டிருந்தது நேசம்

7. காதலாகி கசிந்துருகி

நாளேட்டில் கிழித்தெறிந்த நாளொன்றில்
கை மறதியாய் வைத்த நினைவுகளை
தேடிக்கொண்டிருந்தேன்
நம் காதலை உனக்கு நினைவுட்ட
நீயும் அதே தான் செய்து கொண்டிருப்பாயோ?

- லாவண்யா சுந்தரராஜன்

புதுப்புன‌ல் இத‌ழில் வெளியான‌ என‌து க‌விதைகள் இர‌ண்டு

2010-02-08T23:12:00.000-08:00

ஏதும‌ற்ற‌ நிலை

வெளிச்ச‌த்தின் தூவ‌ல்க‌ள்
துளித்துளியாய் தொலைகிற‌து
என் வெளியில்

இருளின் மீட்சியென‌
வ‌ந்தெனை த‌ழுவிக்கொள்கிற‌து
நீ விட்டுச் சென்ற‌ க‌த‌க‌த‌ப்பு

தொலைதூர‌த்தில் என்ன‌வென்ற‌
தெரியாத‌ ஏதோ ஒன்றை
எப்போதும் தேடிய‌ப‌டி இருக்கின்றேன்

கொதித்தெழும் நீராவியிலும்
ஈரமென‌ ப‌ற்றிய‌படி இருக்கின்றேன்
என‌த‌ற்ற‌ ஒவ்வொன்றையும்

ச‌ந்தோச‌ நுரைப்புக‌ளும்
ச‌ங்க‌ட‌ க‌ச‌வுக‌ளும்
நீங்கி நெடும் தூர‌ம் சென்றிருந்தாலும்

ப‌ழ‌கி வைத்த‌ ம‌ன‌மென்றாலும்
ச‌ட்டென‌ அப்பிக் கொள்கிற‌து
ஏதும‌ற்ற‌ நிலையை

எறும்புக‌ளான‌ எண் க‌ணித‌ம்

குழ‌ந்தைமையைக் கொன்ற‌ப‌டியிருக்கிறது
க‌ணித‌ எறும்புக‌ள்.

க‌ல்லா ம‌ண்ணா என்ற‌து
இர‌ட்டை எறும்பு.

ஏழுக‌ல் விளையாட்டை
எறிந்து அக‌ற்றிய‌து
ஏழாலான‌ எறும்பு ஒன்று.

தேர்வின் காய்ச்ச‌லின் போது
எறும்புக‌ள் தீவிர‌வாதியாகின்ற‌ன‌

புத்த‌க‌ எறும்புக‌ள்
ஒவ்வொன்றாய் ஊறி
குழ‌ந்தைக‌ளின் மூளையை அரிக்கின்ற‌ன‌.

பேனா மையிலிருந்து‌ எறும்பின் ப‌டை
வெள்ளை காகிதத்தில்
த‌ன்னுரு தொலைத்த‌ன‌‌

எண்களாலான எறும்புகளால்
நிர்ணயிக்கப்படுகிறது
குழ‌ந்தைக‌ளில் கால‌ம்

எறும்புகளற்ற உலகம்
எப்பொழுது உருவாகும்
குழந்தைகளுக்காக.

- லாவண்யா சுந்தரராஜன்

நாவினால் சுட்ட வடு

2010-02-03T19:20:00.000-08:00

வார்த்தைகளான அணுகுண்டு
வெடிக்கும் போது
அதிக சப்தத்தை
மௌனமாக ஏற்படுத்துகின்றது.

அணுகுண்டு சிதைத்தெரியும்
அனைத்தையும் விட
அதிக சிதைவினையும்
மிக ஆழமான பள்ளத்தையும்
ஏற்படுத்துகின்றது.

அணுகுண்டு வெடிப்பிலும்
பயங்கரமான வார்த்தைகள் வெடிப்பு
உயிர் சேதமற்ற
சில ம‌ர‌ண‌ங்க‌ளையும் ஏற்படுத்துகின்றது.

- லாவ‌ண்யா சுந்த‌ர‌ராஜ‌ன்

த‌விர்க்க‌ப்ப‌ட்ட‌ ந‌ம் ச‌ந்திப்பு

2010-01-27T23:02:00.000-08:00

எப்ப‌டியேனும் ந‌ம் ச‌ந்திப்பு
தற்செயலாய்
நிக‌ழ்ந்து விட‌க்கூடாதா
என்ற‌ த‌விப்புட‌ன்
உன் சுவாசத்தின்
நூலாம்ப‌டை ப‌ற‌ந்திருந்த‌
அர‌ங்கில் புற‌க்க‌ணிப்பின்
முக‌மூடிய‌ணிந்து
உன் திசைக்கு எதிரே
அலைந்த‌ப‌டியிருந்தேன்
ச‌ந்திப்பை த‌விர்த்த‌ப‌டி

வெல்வெட் துணியின்
வ‌ழவ‌ழப்பை ஒத்திருந்த‌
அட‌ர் இள‌ஞ்சிவ‌ப்பு வ‌ண்ண‌
கோழிக்கொண்டை பூக்க‌ள்
நிறைந்த‌ தோட்ட‌மொன்றில்
புன்னகையுட‌ன் புகைப்ப‌ட‌ம்
எடுக்க‌ நினைத்த‌ பிரிய‌ங்க‌ளை
இம்முறையும் க‌ண்ணோடு தேக்கி
பேருந்தின் ஜன்ன‌லோர‌ இருக்கையில்
அம‌ர்ந்து க‌ட‌ந்திருந்தேன்.

-ந‌ன்றி தடாக‌ம்.

வ‌ண்ண‌ப்பிற‌ழ்ச்சி

2010-01-21T21:01:00.000-08:00

ரோஜாவுக்கும் ம‌ல்லிக்கைக்குமிடையில்
தேவ‌த‌ச்ச‌ன் சொன்ன‌ க‌ருநீல‌ ப‌ர‌ப‌ர‌ப்பை
எற்ப‌டுத்திக் கொண்டிருந்த‌து
சின்ன‌ஞ்சிறு வ‌ண்ண‌த்துப் பூச்சி.

ரோஜாவின் வ‌ண்ண‌ம் தொட்டு
ம‌ல்லிகையில் மேல் அம‌ர்ந்து
ரோஜா வண்ண‌ புள்ளிக‌ளிட்ட‌து
அப்பட்டாம் பூச்சி.

ப‌ட்டு வ‌ண்ண‌ ரோஜாவின் இடையிடையே
க‌ருநீல‌ கால் சுவ‌டுக‌ள்
வ‌ண்ண‌த்துப் பூச்சியின் உற்சாக‌ விளையாட்டு
தொட‌ர்ந்திருந்த‌து.

ச‌ற்ற‌ அல‌ர்ந்த‌ ஒரு க‌ண‌த்தில்
ம‌ஞ்ச‌ளுலும் வெளிர் ப‌ச்சையுமாய்
ரோஜாக்க‌ளும் ம‌ல்லிகைக‌ளும்
ப‌ற‌ந்து கொண்டிருந்த‌ன‌.

வ‌ண்ண‌ம் பிற‌ழ்ந்த‌ வ‌ண்ண‌த்துப் பூச்சி
பிடித்த‌ வ‌ண்ண‌ம் தேடி செடியென்றில்
பூத்திருந்த‌து

ஊர்ந்து ந‌க‌ரும் நாட்க‌ள்

2010-01-19T06:16:00.000-08:00

அட‌ர் ஊதா டிச‌ம்ப‌ர் பூக்க‌ளின்
சுருக்க‌ங்க‌ளில்
வ‌ரும் நாட்க‌ளின் என‌து
க‌ன்ன‌க்க‌துப்புக‌ளை க‌ண்டெடுத்தேன்.

உள்ள‌ம் கொள்ள‌ ஆசைக‌ளின்
பாத‌ச்சுவ‌டுக‌ள் என்னை
விட்டு நெடும் தூர‌ம் ப‌ய‌ணித்து விட்ட‌ன‌.

முன்நெற்றியின் வெள்ளை முடிக‌ளை
ம‌றைத்து த‌லைவார‌ பெரிய‌
பிர‌யத்தனம் செய்ய‌ வேண்டியுள்ள‌து.

இப்போதும்
குட்டி ஆன்ட்டி என்றே ஜெனிப‌ர்
என்றும் அழைத்து ம‌கிழ்கிறாள்

என்றாலும் ஒவ்வொரு நாளும்
ம‌ற்றொரு நாள் போலில்லாம‌ல்
வெற்றாய் க‌ழிகின்ற‌ன‌.